ராமேஸ்வரம்: ஹோட்டல் அறைகளாக மாறும் ரயில் பெட்டிகள்… ஒப்பந்தம் எடுக்க ரயில்வே அழைப்பு..!
Rameshwaram Railway Hotel: ராமேஸ்வரத்தில் பக்தர்களின் கூட்டத்தை கருத்தில் கொண்டு, பயன்பாட்டில் இல்லாத ரயில் பெட்டிகளை ஹோட்டல் அறைகளாக மாற்ற ரயில்வே திட்டமிட்டுள்ளது. உயர்தர படுக்கைகள், ஏர் கண்டிஷனர், மேற்கத்திய பாணி கழிப்பறை வசதிகள் அடங்கும். ஐந்து ஆண்டுகளுக்கு ஏலத்தில் எடுக்கலாம் என தெரிவிக்கப்பட்டுள்ளது.
ராமநாதபுரம் ஜூலை 06: ராமேஸ்வரத்தில் (Rameshwaram) பக்தர்களுக்கான வசதியை மேம்படுத்த ரயில்வே (Railway) நிர்வாகம் புதிய திட்டத்தை அறிவித்துள்ளது. பயன்பாட்டில் இல்லாத ரயில் பெட்டிகள், ஹோட்டல் அறைகளாக மாற்றப்பட உள்ளன. உயர் தர படுக்கை, ஏ.சி., வெஸ்டர்ன் டாய்லெட் (Amenities including high-quality bedding, AC, and Western toilet) உள்ளிட்ட வசதிகள் உள்ளடக்கப்படுகின்றன. இந்த ரயில் பெட்டிகளை 5 ஆண்டுகளுக்கு ஏலத்தில் எடுக்கலாம். 2025 ஜூலை 15-ஆம் தேதிக்குள் விண்ணப்பிக்கலாம் எனவும் திட்டம் வெற்றி பெற்றால், இது நாடு முழுவதும் ஆன்மிக ஸ்தலங்களில் விரிவாக்கப்படும் எனவும் தெரிவிக்கப்பட்டுள்ளது.
ராமேஸ்வரத்தில் நாள்தோறும் குவியும் பக்தர்கள்
ராமேஸ்வரத்திற்கு தினமும் ஆயிரக்கணக்கான பக்தர்கள், குறிப்பாக வட இந்திய மாநிலங்களில் இருந்து பயணிக்கின்றனர். இந்த பக்தர்கள் ராமேஸ்வரத்தில் புனித நீராடி, சிவாலயத்தில் வழிபட்டு நேர்த்திக்கடன் செலுத்துவதை புனித கடமையாகக் கருதுகிறார்கள். ராமாயணத்திலும் முக்கிய பங்கு வகிக்கும் ராமேஸ்வரம், ‘ராமரின் பாதம் பட்ட பூமி’ எனும் பெயரால் பக்தர்களை ஈர்க்கிறது.
ரயில் பெட்டிகளை ஹோட்டல் அறைகளாக மாற்றும் பணி
இந்நிலையில், ராமேஸ்வரத்தில் ஓட்டல் வசதிகள் பண்டிகை காலங்களில் மிக்க கோரிக்கையால் பெரிதும் நிரம்பிவிடுகின்றன. இதனை சமாளிக்கும் வகையில், இந்திய ரயில்வே ஒரு புதிய திட்டத்தை கொண்டு வந்துள்ளது. பயணிகள் நலனை கருத்தில் கொண்டு, தற்போது பயன்பாட்டில் இல்லாத ரயில் பெட்டிகளை ஹோட்டல் அறைகளாக மாற்றும் பணியில் ரயில்வே நிர்வாகம் இறங்கியுள்ளது. இந்த ரயில் பெட்டிகள், உயர் தர படுக்கை வசதி, ஏ.சி. வசதி, வெஸ்டர்ன் டாய்லெட் போன்ற நவீன வசதிகளுடன் மேம்படுத்தப்பட உள்ளன.
ஒப்பந்ததாரர்கள் ஐந்து ஆண்டுகள் காலத்திற்கு ஏலத்தில் எடுக்கலாம்
இந்த ஹோட்டல் போன்ற ரயில் பெட்டிகளை, ஒப்பந்ததாரர்கள் ஐந்து ஆண்டுகள் காலத்திற்கு ஏலத்தில் எடுக்கலாம். இதற்காக ரயில்வே நிர்வாகம் ireps.gov.in என்ற இணையதளத்தின் மூலம் விண்ணப்பங்களைப் பெற்றுவருகிறது. மேலும், விருப்பமுள்ளவர்கள் 9003862967 என்ற எண்ணில் தொடர்பு கொண்டு கூடுதல் தகவல்களையும் பெறலாம். விண்ணப்பிக்க இறுதி தேதி 2025 ஜூலை 15-ஆம் தேதி நண்பகல் 12 மணி வரை என அறிவிக்கப்பட்டுள்ளது.
இதன் மூலம், பயணிகள் நவீன வசதிகளை அனுபவிக்கலாம், பயன்பாட்டில் இல்லாத ரயில் பெட்டிகள் பயனுள்ளதாக மாற்றப்படும், மேலும் ரயில்வேக்கும் கூடுதல் வருவாய் கிடைக்கும் என அதிகாரிகள் தெரிவித்துள்ளனர்.
முயற்சி வெற்றிபெற்றால் நாடு முழுவதும் ஏற்பாடு
ஏற்கனவே சென்னை சென்ட்ரல் ரயில்நிலையத்தில் ரயில் பெட்டி வடிவ உணவகம் சிறப்பாக செயல்பட்டு வரும் நிலையில், இதே மாதிரி திட்டம் ராமேஸ்வரத்திலும் முன்னெடுக்கப்படுவது குறிப்பிடத்தக்கது. இந்த முயற்சி வெற்றிபெற்றால், நாடு முழுவதும் உள்ள பல ஆன்மீக இடங்களில் இதுபோன்ற ரயில் பெட்டிகள் ஹோட்டல் அறைகளாக மாற்றப்படும் என எதிர்பார்க்கப்படுகிறது.
இதே நேரத்தில், இந்த திட்டத்தில் பயணிகளின் பாதுகாப்பு குறித்த சீரான நடவடிக்கைகள் எடுக்கப்பட வேண்டும் என பல பயணிகள் வலியுறுத்தி வருகின்றனர்.
