கடலூரில் மர்ம நோய் தாக்கி 50,000 கோழிகள் உயிரிழப்பு? பண்ணைகளில் தொடரும் உயிரிழப்புகள் – தீபாவளி நேரத்தில் விவசாயிகள் கடும் அதிர்ச்சி!
கடலூர் மாவட்டத்தைச் சேர்ந்த மோகன் என்பவர் கோழிப் பண்ணை நடத்தி வருகிறார். இவரது பண்ணையில் கடந்த ஒரு வாரத்தில் மட்டும் சுமார் 7,000 கோழிகள் உயிரிழந்துள்ளன. இதனால் பல லட்சம் ரூபாய் முதலீடு செய்த அவர், தனது வாழ்வாதாரத்தை இழக்கும் நிலைக்குத் தள்ளப்பட்டுள்ளார்.
நவம்பர் 6, 2026: தமிழகத்தின் கடலூர் மாவட்டத்தில் கோழிப் பண்ணைகளை மர்ம நோய் தாக்கி வருவதால், ஆயிரக்கணக்கான கோழிகள் அடுத்தடுத்து உயிரிழந்து வருகின்றன. கடந்த 6 நாட்களில் மட்டும் பல்வேறு கிராமங்களில் சுமார் 50,000 கோழிகள் உயிரிழந்துள்ளதாகப் பண்ணை உரிமையாளர்கள் வேதனை தெரிவித்துள்ளனர். இதனால் கோழிப் பண்ணைத் தொழிலில் ஈடுபட்டுள்ள விவசாயிகள் பெரும் பொருளாதார இழப்பைச் சந்தித்துள்ளனர். குறிப்பாக, தீபாவளி பண்டிகையை முன்னிட்டு விற்பனை அதிகரிக்கும் என எதிர்பார்த்திருந்த நிலையில், இந்த மர்ம நோய் பாதிப்பு அவர்களுக்குப் பெரும் அதிர்ச்சியை ஏற்படுத்தியுள்ளது.
ஒரு வாரத்தில் 7,000 கோழிகளை இழந்த விவசாயி
கடலூர் மாவட்டத்தைச் சேர்ந்த மோகன் என்பவர் கோழிப் பண்ணை நடத்தி வருகிறார். இவரது பண்ணையில் கடந்த ஒரு வாரத்தில் மட்டும் சுமார் 7,000 கோழிகள் உயிரிழந்துள்ளன. இதனால் பல லட்சம் ரூபாய் முதலீடு செய்த அவர், தனது வாழ்வாதாரத்தை இழக்கும் நிலைக்குத் தள்ளப்பட்டுள்ளார்.
இதுகுறித்து வேதனை தெரிவித்த மோகன், ஒரு கோழிக்குஞ்சின் விலை ரூ.47 முதல் ரூ.48 வரை இருப்பதாகவும், 50 கிலோ கோழித் தீவன மூட்டையின் விலை ரூ.2,500 முதல் ரூ.2,600 வரை விற்பனை செய்யப்படுவதாகவும் கூறியுள்ளார். மேலும், மின்சாரக் கட்டணமாக மட்டுமே மாதந்தோறும் ரூ.10,000 முதல் ரூ.20,000 வரை செலவாகிறது என்றும் தெரிவித்துள்ளார்.
மேலும் படிக்க: திருவண்ணாமலை மகா தீபம்: பக்தர்கள் மலை ஏறத் தடை! மாவட்ட ஆட்சியர் வந்தனா கார்க் அதிரடி அறிவிப்பு!
தற்போது இந்தப் பாதிப்பால் தங்களால் எதுவும் செய்ய முடியாத நிலை ஏற்பட்டுள்ளதாகவும், ரூ.40 லட்சம் முதல் ரூ.50 லட்சம் வரை முதலீடு செய்துள்ள நிலையில், பாதிக்கப்பட்ட பண்ணைகள் அனைத்தையும் சேர்த்து சுமார் 40,000 முதல் 50,000 கோழிகள் வரை உயிரிழந்துள்ளதாகவும் அவர் வேதனையுடன் தெரிவித்துள்ளார்.
கோழிகளின் உடலில் விசித்திரமான அறிகுறிகள்
இந்த மர்ம நோய் தாக்குதலால் உயிரிழக்கும் கோழிகளின் கால்கள் பின்புறமாக நீட்டிய நிலையிலும், இறக்கைகள் முழுமையாக விரிந்த நிலையிலும் காணப்படுவதாகப் பண்ணை உரிமையாளர்கள் தெரிவிக்கின்றனர். நோய்க்கான காரணம் இதுவரை கண்டறியப்படாததால், எஞ்சியுள்ள கோழிகளுக்கும் பாதிப்பு ஏற்படுமோ என்ற அச்சத்தில் விவசாயிகள் உள்ளனர். உயிரிழந்த கோழிகளை அகற்றி, அவற்றைப் புதைக்கும் பணிகளும் நடைபெற்று வருகின்றன.
மேலும் படிக்க: வழிப்பறி வழக்கு விசாரணைக்கு அழைத்து செல்லப்பட்ட சிறுவன் போலீசாரின் பிடியிலிருந்து தப்பியோட்டம்.. சென்னையில் பரபரப்பு!
26,000 கோழிகள் உயிரிழப்பு – அரசு விளக்கம்
இதற்கிடையே, விவசாயிகள் சுமார் 50,000 கோழிகள் உயிரிழந்துள்ளதாகத் தெரிவிக்கும் நிலையில், மாவட்ட நிர்வாகத்தின் கணக்கின்படி சுமார் 26,000 கோழிகள் உயிரிழந்துள்ளதாகக் கூறப்படுகிறது. இதுகுறித்து மாவட்ட நிர்வாக அதிகாரி ஒருவர் தெரிவித்தபோது, முதற்கட்ட ஆய்வகப் பரிசோதனை முடிவில் பறவைக் காய்ச்சல் பாதிப்பு இல்லை என்பது தெரியவந்துள்ளதாகவும், இருப்பினும் கோழிகள் உயிரிழப்பதற்கான உண்மையான காரணம் இன்னும் கண்டறியப்படவில்லை என்றும் தெரிவித்துள்ளார்.
இதையடுத்து, கூடுதல் மாதிரிகள் சேகரிக்கப்பட்டு மத்தியப் பிரதேச மாநிலம் போபாலில் உள்ள ஆய்வகத்திற்கு அனுப்பி வைக்கப்பட்டுள்ளன. அதன் பரிசோதனை முடிவுகள் வெளியான பின்னரே நோய்க்கான காரணம் தெரியவரும் என எதிர்பார்க்கப்படுகிறது.
