திமுக, அதிமுகவை போல த.வெ.கவிலும் தொழிற்சங்க பேரவை.. முதல்வர் விஜய் உத்தரவு..

ஜூன் 11, 2026: திமுக, அதிமுகவைப் போலவே தமிழக வெற்றி கழகமும் அதன் தொழிற்சங்க பேரவையை தொடங்க இருப்பதாக தகவல்கள் வெளியாகியுள்ளன. தமிழக அரசியலில் முக்கிய கட்சிகள் அனைத்தும் தொழிற்சங்கங்களை அமைத்து தொழிலாளர்களின் பிரச்சினைகளுக்கு குரல் கொடுத்து வரும் நிலையில், தற்போது தமிழக வெற்றி கழகமும் அதே பாதையில் நகர இருப்பது அரசியல் வட்டாரங்களில் கவனத்தை ஈர்த்துள்ளது.

திராவிட முன்னேற்றக் கழகத்தைப் பொறுத்தவரையில் தொ.மு.ச. (தொழிலாளர் முன்னேற்றச் சங்கம்) நீண்ட காலமாக செயல்பட்டு வருகிறது. அதேபோல் அனைத்திந்திய அண்ணா திராவிட முன்னேற்றக் கழகத்தில் அண்ணா தொழிற்சங்க பேரவை முக்கிய தொழிற்சங்க அமைப்பாக உள்ளது. மேலும் இடதுசாரி கட்சிகள் சார்பில் ஏ.ஐ.டி.யூ.சி., சி.ஐ.டி.யூ. உள்ளிட்ட பல்வேறு தொழிற்சங்கங்களும் தொழிலாளர்களின் உரிமைகளுக்காக தொடர்ந்து செயல்பட்டு வருகின்றன.

தொழிற்சங்க அமைப்பு:

பொதுவாக அரசியல் கட்சிகளின் தொழிற்சங்கங்கள் தொழிலாளர்களின் சம்பள உயர்வு, பணிநிரந்தரம், பாதுகாப்பு வசதிகள், ஓய்வூதியம், வேலை நேர சலுகைகள் உள்ளிட்ட பல்வேறு கோரிக்கைகளை வலியுறுத்தி அரசிடம் மனுக்கள் அளிப்பது, ஆர்ப்பாட்டங்கள் நடத்துவது, பேச்சுவார்த்தைகள் நடத்துவது போன்ற பணிகளில் ஈடுபட்டு வருகின்றன. மாநிலம் முதல் மாவட்டம் வரை நிர்வாகிகள் நியமிக்கப்பட்டு அமைப்புசார்ந்த முறையில் இந்த தொழிற்சங்கங்கள் செயல்பட்டு வருகின்றன.

தவெக சார்பில் தொழிற்சங்க பேரவை:

இந்த நிலையில், கடந்த சில ஆண்டுகளுக்கு முன்பு தொடங்கப்பட்ட தமிழக வெற்றி கழகத்திலும் தற்போது தொழிற்சங்கம் உருவாக்கப்பட இருப்பதாக கூறப்பட்டுள்ளது. 2026 சட்டப்பேரவை தேர்தலில் தமிழக வெற்றி கழகம் 108 தொகுதிகளில் வெற்றி பெற்று தனிப்பெரும் கட்சியாக உருவெடுத்தது. பின்னர் பல்வேறு கட்சிகளின் ஆதரவுடன் தமிழகத்தில் ஆட்சி அமைத்து, தற்போது ஆட்சியை வழிநடத்தி வருகிறது.

இந்த சூழலில் கட்சியின் கட்டமைப்பை மேலும் வலுப்படுத்தும் நோக்கில் தொழிற்சங்க பேரவை அமைக்க முடிவு செய்யப்பட்டுள்ளதாக தகவல்கள் தெரிவிக்கின்றன. இதற்காக அக்கட்சியின் தலைவரும் தமிழ்நாடு முதலமைச்சருமான விஜய் ஆலோசனைகளை மேற்கொண்டு வருவதாக கூறப்படுகிறது. மேலும் கட்சியின் பொதுச் செயலாளர் என். ஆனந்த் தலைமையில் இதற்கான பணிகள் தீவிரமாக நடைபெற்று வருவதாகவும் தகவல்கள் வெளியாகியுள்ளன.

தமிழக வெற்றி கழக தொழிற்சங்க பேரவை:

“தமிழக வெற்றி கழக தொழிற்சங்க பேரவை” என்ற பெயரில் இந்த புதிய அமைப்பு தொடங்கப்பட இருப்பதாகவும், அதற்கான பதிவு நடவடிக்கைகளும் நிறைவடைந்துள்ளதாகவும் கூறப்படுகிறது. தொழிலாளர் நலன், தொழிற்சாலை பணியாளர்கள் பிரச்சினைகள், தனியார் துறை ஊழியர்களின் கோரிக்கைகள் உள்ளிட்ட பல்வேறு விஷயங்களில் இந்த அமைப்பு செயல்படும் என எதிர்பார்க்கப்படுகிறது.

மேலும் படிக்க: சென்னை உள்ளிட்ட மாவட்டங்களில் மழைக்கு வாய்ப்பு.. கனமழை எச்சரிக்கை எங்கே ?

விரைவில் தமிழக வெற்றி கழக தலைவர் மற்றும் முதலமைச்சர் விஜய் அதிகாரப்பூர்வமாக இந்த தொழிற்சங்க பேரவையை அறிவித்து, மாநில, மாவட்ட, ஒன்றிய அளவிலான நிர்வாகிகள் பட்டியலையும் வெளியிட உள்ளதாக தகவல்கள் தெரிவிக்கின்றன.

சமீபத்தில் அதிமுக தொழிற்சங்க பேரவையிலிருந்து கமலக்கண்ணன் உள்ளிட்ட ஏராளமான நிர்வாகிகள் தமிழக வெற்றி கழகத்தில் இணைந்ததும் அரசியல் வட்டாரங்களில் பேசுபொருளாக அமைந்தது. இதன் மூலம் தொழிலாளர் அமைப்புகளிலும் தமிழக வெற்றி கழகம் தனது செல்வாக்கை விரிவுபடுத்த முயற்சி செய்து வருவதாக அரசியல் விமர்சகர்கள் கருத்து தெரிவித்து வருகின்றனர்.