முதலமைச்சர் விஜய் vs எதிர்க்கட்சித் தலைவர் உதயநிதி.. அனல் பறக்கும் சட்டமன்றம்.. தமிழக அரசியலில் புதிய அத்தியாயம்!!

முதல்வர் விஜய் vs எதிர்கட்சித் தலைவர் உதயநிதி

தமிழக அரசியல் வரலாற்றில் மே 10-ஆம் தேதி ஒரு மிக முக்கியமான மைல்கல்லாகப் பார்க்கப்படுகிறது. தமிழக வெற்றிக் கழகத்தின் தலைவர் விஜய் முதலமைச்சராகப் பொறுப்பேற்றுள்ள நிலையில், திமுகவின் இளம் தலைவர் உதயநிதி ஸ்டாலின் எதிர்க்கட்சித் தலைவராகத் தேர்வு செய்யப்பட்டுள்ளார். இதனை தமிழகத்தின் அடுத்த தலைமுறை அரசியல் அதிகாரப்பூர்வமாகத் தொடங்கியுள்ளதாக அரசியல் நோக்கர்கள் கருதுகின்றனர். குறிப்பாக இந்த மாற்றம் தமிழக அரசியலை அடுத்த கட்டத்திற்கு எடுத்துச் செல்லும் என்றும் நம்பிக்கை தெரிவிக்கின்றனர்.

இதையும் படிக்க : பணம் இல்லை என பேசாதீங்க.. திசைதிருப்பாதீங்க – முதல்வர் விஜய்க்கு வாழ்த்து தெரிவித்து கேள்விகளை அடுக்கிய முக ஸ்டாலின்!

சட்டமன்றத்தில் முக்கிய தூண்களாக இளைஞர்கள்:

தமிழக அரசியலில் இதுவரை கருணாநிதி – எம்ஜிஆர், கருணாநிதி – ஜெயலலிதா என முதிர்ந்த தலைவர்களுக்கு இடையிலான மோதல்களையே கண்டுள்ளோம். ஆனால் தற்போது, கிட்டத்தட்ட ஒரே வயது வரம்பைச் சேர்ந்த இரு இளைஞர்கள் சட்டமன்றத்தின் இரு முக்கியத் தூண்களாக அமர்ந்துள்ளனர். ஒருவர் ஆட்சியை வழிநடத்தும் முதலமைச்சர், மற்றொருவர் ஆட்சியைக் கண்காணிக்கும் எதிர்க்கட்சித் தலைவர். அந்தஸ்து ரீதியாகப் பார்த்தால், புரோட்டோகால் அடிப்படையில் முதலமைச்சர் உயர்ந்த இடத்தில் இருந்தாலும், ஜனநாயக ரீதியாக எதிர்க்கட்சித் தலைவருக்கும் சமமான மதிப்பும் அதிகாரமும் உண்டு. அதனால், சட்டமன்ற ஜனநாயகத்தில் இருவருமே சம அந்தஸ்து கொண்டவர்களாகவே கருதப்படுவார்கள்.

உதயநிதி ஸ்டாலினின் அனுபவமும், சவால்களும்:

திமுகவின் நீண்ட கால அரசியல் பாரம்பரியத்தில் வந்த உதயநிதி ஸ்டாலினுக்கு, முதலமைச்சர் விஜய்யை விட அரசியல் மற்றும் நிர்வாக அனுபவம் சற்று அதிகம் என்பது ஒரு கூடுதல் பலம். கலைஞர் மற்றும் மு.க.ஸ்டாலின் ஆகிய இருவருமே எதிர்க்கட்சித் தலைவர்களாக இருந்து தமிழக அரசியலில் தங்களை நிலைநிறுத்திக் கொண்டவர்கள். அதே பாதையில் உதயநிதியும் மிகத் தீவிரமாகச் செயல்படுவார் என்று எதிர்பார்க்கப்படுகிறது.

கொரோனா பேரிடர் காலத்தில், தனது தந்தை முதலமைச்சராக இல்லாதபோதும், தனிப்பட்ட முயற்சியால் மருந்துகளை வரவழைத்தது போன்ற செயல்பாடுகள் அவரது ஆளுமையின் முதிர்ச்சியைக் காட்டுகின்றன. தனது தந்தை மு.க.ஸ்டாலினின் ஆலோசனைகளைப் பெற்று, சட்டமன்றத்தில் மிகச் சிறந்த ‘வாட்ச்டாக்’ போல அவர் செயல்படுவார் என நம்பப்படுகிறது.

முதல்வர் விஜய்யின் புதிய கலாச்சாரம்:

முதலமைச்சர் விஜய் தனது முதல் சட்டமன்ற அமர்விலேயே கோட்-சூட் அணிந்து ஒரு கார்ப்பரேட் பாணியிலான அல்லது நவீனத் தோற்றத்தில் வந்தது அனைவரது கவனத்தையும் ஈர்த்துள்ளது. இது ஒரு ‘வெல்கம் சேஞ்ச்’ என்று வர்ணிக்கப்படுகிறது. அரசியலில் நீண்ட காலம் நிலவி வந்த பாரம்பரிய உடைக் கலாச்சாரத்தை உடைத்து, ஒரு புதிய தோற்றப்பொலிவுடன் அவர் ஆட்சியைத் தொடங்கியுள்ளார்.

‘நிழல் அமைச்சரவை’ என்ற புதிய உத்தி:

பிரிட்டிஷ் நாடாளுமன்ற ஜனநாயக முறையில் ‘நிழல் அமைச்சரவை’ என்ற ஒரு முறை உண்டு. அதாவது, ஆட்சியின் ஒவ்வொரு அமைச்சரின் செயல்பாட்டையும் கண்காணிக்க எதிர்க்கட்சித் தரப்பில் ஒரு நபர் நியமிக்கப்படுவார். தமிழகத்தில் திமுக இத்தகைய ஒரு முறையைச் செயல்படுத்தினால், அது முதலமைச்சர் விஜய்யின் தலைமையிலான ஆட்சிக்கு ஒரு வலுவான கடிவாளமாக அமையும். இதன் மூலம் ஒவ்வொரு துறையிலும் உள்ள தவறுகளை உடனுக்குடன் சுட்டிக்காட்ட முடியும் என்று அரசியல் விமர்சகர்கள் கூறுகின்றனர்.

வரும் நாட்களில் அனல் பறக்கும் சட்டமன்றம்:

மே 10-ஆம் தேதிக்குப் பிறகான தமிழக அரசியல் களம் மிகவும் அனல் பறப்பதாக இருக்கும். ஒருபுறம் திரையுலகில் இருந்து வந்து மக்களின் பேராதரவுடன் ஆட்சியில் அமர்ந்துள்ள விஜய், மறுபுறம் அரசியல் அனுபவமும் கட்சிப் பலமும் கொண்ட உதயநிதி. இவர்கள் இருவருக்கும் இடையிலான விவாதங்கள் சட்டமன்றத்தில் ஒரு புதிய ஜனநாயகப் பண்பை உருவாக்கும் என எதிர்பார்க்கப்படுகிறது.

இதையும் படிக்க: திமுக சட்டமன்றக் குழு தலைவராக உதயநிதி ஸ்டாலின் தேர்வு – வெளியான அறிவிப்பு

அண்ணா முதலமைச்சராக இருந்தபோது, எதிர்க்கட்சித் தலைவராக இருந்த கிருட்டிணமூர்த்தி அவர்களின் கூர்மையான பேச்சுக்கள் ஜனநாயகத்திற்கு வலிமை சேர்த்தன. அதே போன்றதொரு தரமான அரசியல் விவாதங்களை வரும் காலங்களில் விஜய் மற்றும் உதயநிதி ஸ்டாலின் ஆகியோரிடமிருந்து தமிழக மக்கள் எதிர்பார்க்கலாம். இது ஒரு தனிநபர் மோதல் என்பதைத் தாண்டி, இரு பெரும் சித்தாந்தங்களுக்கு இடையிலான ஆரோக்கியமான போட்டியாக அமையும் என்று எதிர்பார்க்கப்படுகிறது.