2036 Olympics: ஒலிம்பிக் நடத்த இந்தியா விருப்பம்.. சர்வதேச ஒலிம்பிக் குழு அழைப்பு!
India's 2036 Olympics Bid: 2036 ஒலிம்பிக் போட்டிகளை நடத்த இந்தியா ஆர்வம் காட்டியுள்ளது. 'ஒன்றாக எழுவோம்' என்ற தொலைநோக்குடன், விளையாட்டு மூலம் இளைஞர்களை ஊக்குவித்து, சமூக மேம்பாட்டை அடைவதே இந்தியாவின் இலக்கு. சர்வதேச ஒலிம்பிக் குழு இந்தியாவின் ஆர்வத்தை உறுதிப்படுத்தியுள்ளது. நவம்பர் 2026-ல் எதிர்கால புரவலர் ஆணையத்திடம் தங்கள் திட்டங்களை சமர்ப்பிக்க இந்தியா தயாராகிறது. இந்த முயற்சி இந்தியாவுக்குப் புதிய வாய்ப்புகளை உருவாக்கும்.
2036 ஒலிம்பிக் போட்டிகளை (2036 Olympics) நடத்த இந்தியா விரும்புவதாக சர்வதேச ஒலிம்பிக் குழு உறுதிப்படுத்தியது. 2036 ஒலிம்பிக் போட்டிகளை நடத்த ஆர்வம் காட்டியுள்ள 7 நாடுகளில் இந்தியா, ஜெர்மனி, கத்தார் மற்றும் துருக்கி ஆகியவையும் அடங்கும். வருகின்ற 2026 நவம்பர் மாதம் ஐஓசியின் ‘எதிர்கால புரவலர் ஆணையத்தின்’ (Future Host Commission) முன் தங்களது விளையாட்டுத் திட்டங்களைச் சமர்ப்பிக்க அனைத்து நாடுகளுக்கும் அழைப்பு விடுக்கப்பட்டுள்ளதாகத் தெரிவிக்கப்படுகிறது. 2036 ஒலிம்பிக் போட்டிகளை நடத்துவதற்கான இந்தியாவின் முயற்சி, ‘ஒன்றாக எழுவோம்’ என்ற தொலைநோக்குப் பார்வையை அடிப்படையாகக் கொண்டது என்று விளையாட்டுத்துறை அமைச்சர் மன்சுக் மாண்டவியா மற்றும் இந்திய ஒலிம்பிக் சங்கத் தலைவர் பி.டி. உஷா ஆகியோர் நேற்று அதாவது 2026 அக்டோபர் 7ம் தேதி அறிவித்தனர்.
ALSO READ: ஹெலிகாப்டரிலிருந்து ஜெர்சி.. அதிரவைத்த வாணவேடிக்கை.. உலகம் சிலிர்த்த மெஸ்ஸிக்கான பிரியாவிடை!
இந்தியாவின் திட்டம் என்ன..?
2036 ஒலிம்பிக் போட்டிகளுக்கான இந்தியாவின் லட்சியம் ஒரு எளிய கருத்தை அடிப்படையாகக் கொண்டது. விளையாட்டு நமது நாட்டின் எதிர்காலத்தை வடிவமைக்க உதவும். இந்திய ஒலிம்பிக் சங்கம் (IOA) வெளியிட்ட ஒரு பத்திரிக்கை அறிக்கையில், மாண்டவியா கூறுகையில், ”ஒலிம்பிக் மற்றும் பாராலிம்பிக் போட்டிகளை நடத்துவது, மில்லியன் கணக்கான இளம் இந்தியர்களை விளையாட்டுகளில் பங்கேற்க ஊக்குவிக்கும். ஆரோக்கியமான மற்றும் சுறுசுறுப்பான சமூகங்களை வலுப்படுத்தும். மேலும், கல்வி, வேலைவாய்ப்பு மற்றும் சமூக மேம்பாடு ஆகிய துறைகளில் நமது இளைஞர்களுக்கு புதிய வாய்ப்புகளை உருவாக்கும்” என்றார்.
பி.டி. உஷா கூறியது என்ன?
2024-ஆம் ஆண்டு ஒலிம்பிக் போட்டிகளை நடத்துவதற்கான தனது விருப்ப வெளிப்பாட்டை இந்தியா சமர்ப்பித்துள்ளது. இதுகுறித்து ஒலிம்பிக் சங்க தலைவர் பி.டி.உஷா கூறுகையில், “எங்களைப் பொறுத்தவரை, ‘ஒன்றிணைந்து எழுவோம்’ என்பது வெறும் முழக்கம் மட்டுமல்ல. அது, ஒரு பொதுவான ஒலிம்பிக் கனவின் பின்னால் இந்தியாவின் ஆற்றல், லட்சியம் மற்றும் பன்முகத்தன்மையை ஒன்றிணைப்பதற்கான ஒரு வலுவான அர்ப்பணிப்பாகும். 2036-ஆம் ஆண்டுக்கான எங்கள் தொலைநோக்குப் பார்வையை நாங்கள் உருவாக்கும்போது, இளம், ஆற்றல்மிக்க மற்றும் வளர்ந்து வரும் இந்தியாவின் நம்பிக்கையைப் பிரதிபலிக்கும் போட்டிகளை நடத்த விரும்புகிறோம். அதே நேரத்தில், உலகெங்கிலும் புதிய தலைமுறைகள், புதிய சமூகங்கள் மற்றும் புதிய சாத்தியக்கூறுகளைச் சென்றடைவதற்கான ஒலிம்பிக் மற்றும் பாராலிம்பிக் இயக்கங்களின் இலக்கிற்கும் பங்களிக்க விரும்புகிறோம்,” என்று கூறினார்.
தொடர்ந்து பேசிய அவர், “சர்வதேச ஒலிம்பிக் குழுவுடனான எங்கள் உரையாடலைத் தொடரவும், அக்டோபர் மாத இறுதியில் முதல் முறையாக எதிர்கால புரவலர் ஆணையத்திடம் எங்கள் அபிலாஷைகளை முன்வைக்கவும் நாங்கள் ஆவலுடன் காத்திருக்கிறோம்.”என்றார்.
ALSO READ: 21 தங்கம்! 27 வெள்ளி! 2026 ஆசிய விளையாட்டு போட்டியில் இந்தியாவிற்கு எத்தனையாவது இடம்?
“ரைசிங் டுகெதர்” (Rising Together) என்பது, விளையாட்டின் மூலம் இந்தியாவின் மாற்றத்தில் 2036 ஒரு திருப்புமுனையாக அமையக்கூடும் என்ற கருத்தைப் பிரதிபலிக்கிறது என்று இந்திய ஒலிம்பிக் சங்கம் (IOA) கூறியுள்ளது. இது மில்லியன் கணக்கான இளைஞர்களை விளையாட்டுகளைப் பார்ப்பதிலிருந்து விலகி விளையாடத் தூண்டுவதோடு, ஆரோக்கியமான மற்றும் சுறுசுறுப்பான சமூகங்களை வளர்த்து, விளையாட்டைக் கல்வி மற்றும் தொழில்முறை வாய்ப்புகளுக்கான ஒரு கருவியாக மாற்றும் என்று இந்திய ஒலிம்பிக் சங்கம் நம்புகிறது.
