70வது வயதில் குருதேவ் ஸ்ரீ ஸ்ரீ ரவிசங்கர்: உலகத் தலைவர்கள் பங்கேற்ற ஆர்ட் ஆஃப் லிவிங் அமைப்பின் 45வது ஆண்டு விழா..

மே 16, 2026: பெங்களூருவில் உள்ள தி ஆர்ட் ஆஃப் லிவிங் சர்வதேச மையத்தில், குருதேவ் ஸ்ரீ ஸ்ரீ ரவி சங்கர் தனது 70வது வயதில் அடியெடுத்து வைத்ததையும், கலை வாழ்வு அமைப்பு 45 ஆண்டுகளை நிறைவு செய்ததையும் முன்னிட்டு பிரம்மாண்ட விழா நடைபெற்றது. மாதம் முழுவதும் நடைபெறும் இந்த கொண்டாட்டத்தில் அரசியல் தலைவர்கள், ஆன்மீக குருக்கள், தொழிலதிபர்கள், கல்வியாளர்கள், விளையாட்டு வீரர்கள் மற்றும் சமூக மாற்ற செயற்பாட்டாளர்கள் உள்ளிட்ட பலரும் பங்கேற்றனர்.

மகாராஷ்டிர முதலமைச்சர் தேவேந்திர பட்னாவிஸ், ஹரியானா ஆளுநர் அஷிம் குமார் கோஷ் , ஆர்.எஸ்.எஸ் பொதுச்செயலாளர் தத்தாத்ரேய ஹோசபாலே , மத்திய இளைஞர் நலன் மற்றும் விளையாட்டு துறை இணை அமைச்சர் ரக்ஷா காட்சே  உள்ளிட்ட பல முக்கிய பிரமுகர்கள் நிகழ்ச்சியில் பங்கேற்றனர். விழாவில் பேசிய தேவேந்திர பட்னாவிஸ், “குருதேவ் ஸ்ரீ ஸ்ரீ ரவிசங்கர் இந்தியாவின் மிகப்பெரிய ஆன்மீக தூதர். இந்தியாவை உலக குருவாக மாற்றும் பாதையை அவர் வழிநடத்தி வருகிறார்” என்றார்.

மேலும், மகாராஷ்டிராவில் நீர் பாதுகாப்பு, இயற்கை விவசாயம் மற்றும் பேரிடர் நிவாரணப் பணிகளில் கலை வாழ்வு அமைப்பு முக்கிய பங்காற்றி வருவதாகவும் அவர் பாராட்டினார். “எங்கு பேரிடர் ஏற்பட்டாலும் அங்கு ஆயிரக்கணக்கான கலை வாழ்வு தன்னார்வலர்கள் உடனடியாக சேவை செய்கின்றனர்” என்றும் குறிப்பிட்டார்.

ஹரியானா ஆளுநர் அஷிம் குமார் கோஷ் பேசுகையில், “45 ஆண்டுகளுக்கு முன்பு கர்நாடகாவில் ஏற்றப்பட்ட ஆன்மீக விளக்கு இன்று 182 நாடுகளில் ஒளி பரப்பி வருகிறது. மன அழுத்தத்தை அமைதியாகவும், மோதல்களை கருணையாகவும் மாற்றும் பாதையை குருதேவ் உலகிற்கு வழங்கியுள்ளார்” என்றார்.

பிரதமர் மோடி திறந்து வைத்த தியான மண்டபம்:

இந்த நிகழ்ச்சியின் ஒரு பகுதியாக, சமீபத்தில் பிரதமர் மோடி திறந்து வைத்த புதிய தியான மண்டபத்தில் சிறப்பு தியானம் மற்றும் சத்சங்க நிகழ்ச்சியும் நடைபெற்றது. மேலும், “World Meditates with Gurudev for Global Peace” என்ற உலக அமைதி தியான நிகழ்ச்சியில் 182 நாடுகளைச் சேர்ந்த கோடிக்கணக்கான மக்கள் நேரடியாகவும், ஆன்லைன் மூலமும் கலந்து கொண்டனர்.

நிகழ்ச்சியில் உரையாற்றிய ஸ்ரீ ஸ்ரீ ரவி சங்கர், “வாழ்க்கையே ஒரு கொண்டாட்டம். மனம் அமைதியாக இருந்தால் அறிவு கூர்மையாகும்; உடலும் மனமும் வலிமை பெறும்” என்று கூறினார். மேலும், “எப்போதும் மனதை மகிழ்ச்சியாக வைத்திருக்க நம்பிக்கையே முக்கியம். இறைவன் எப்போதும் நம்முடன் இருக்கிறார்” என்றும் அவர் தெரிவித்தார்.

இந்த விழாவில் இந்திய ஹெவிவெயிட் குத்துச்சண்டை சாம்பியன் நுபூர் ஷியோரன்
கலந்து கொண்டு, “2024ஆம் ஆண்டு சுதர்சன் கிரியாவை தொடங்கினேன். அதன் பிறகு 2025ஆம் ஆண்டு உலகக்கோப்பை சாம்பியனாகவும், உலக தரவரிசையில் இரண்டாம் இடத்தையும் பெற்றேன்” என தனது அனுபவத்தை பகிர்ந்துகொண்டார்.

விழாவிற்கு வந்த விருந்தினர்கள், 1,600க்கும் மேற்பட்ட பசுக்கள் பராமரிக்கப்படும் “ஸ்ரீ ஸ்ரீ கோசாலை”, வேத கல்வி வழங்கப்படும் “குருகுல வேத ஆகம பாடசாலை”, இலவச பள்ளி மற்றும் தினமும் 20,000 பேருக்கு உணவு வழங்கும் சமையலறை உள்ளிட்ட அமைப்புகளையும் பார்வையிட்டனர்.

மேலும், குழந்தைகளின் உள்ளுணர்வு திறனை மேம்படுத்தும் “இன்ட்யூஷன் ப்ராசஸ்” பயிற்சியின் நேரடி காட்சிகளும் நடைபெற்றன. கடந்த 45 ஆண்டுகளில், The Art of Living Foundation உலகின் மிகப்பெரிய தன்னார்வ சமூக இயக்கங்களில் ஒன்றாக உருவெடுத்து, தியானம், கல்வி, பெண்கள் முன்னேற்றம், சுற்றுச்சூழல் பாதுகாப்பு, சிறைச்சாலை சீர்திருத்தம், இளைஞர் மேம்பாடு மற்றும் பேரிடர் நிவாரண சேவைகள் மூலம் ஒரு பில்லியனுக்கும் அதிகமான மக்களை சென்றடைந்துள்ளதாக தெரிவிக்கப்பட்டது