பிசிஓஎஸ் மற்றும் எண்டோமெட்ரியோசிஸை கடந்து குழந்தை பெற்றெடுத்த பெண்..!

அயர்லாந்தின் லிமெரிக் நகரத்தை சேர்ந்த 34 வயதான தொழில்சிகிச்சை நிபுணர் கெய்த்ரியோனா ஓ’டொன்னல் மற்றும் அவரது கணவர் ரூரி இருவரும் பள்ளி நாட்களிலிருந்தே காதலித்து வந்தவர்கள். 2018ஆம் ஆண்டு நிச்சயதார்த்தம் செய்து, 2019ஆம் ஆண்டில் குழந்தை பெற முயற்சியைத் தொடங்கினர். ஆரம்பத்தில் எளிதாக குழந்தை பிறக்கும் என நினைத்த அவர்கள், பல ஆண்டுகள் முயன்றும் கருத்தரிக்க முடியாததால் மனவேதனை அனுபவித்தனர். இரண்டு முறை ஐவிஎப் சிகிச்சை எடுத்தும் ஒரு முறை கருக்கலைப்பு ஏற்பட்டதும், மற்றொரு முறை கரு வளர்ச்சி ஏற்படாததாலும் 2024ஆம் ஆண்டில் குழந்தை பெறும் நம்பிக்கை அவர்களுக்கு குறைந்தது.

பிசிஓஎஸ் கண்டறியப்பட்ட தருணம்

கெய்த்ரியோனா கர்ப்பத்தடை மாத்திரையை நிறுத்திய சில மாதங்களில் உடல் எடை அதிகரிப்பு, முகப்பரு, மனநிலை மாற்றம் மற்றும் கடும் சோர்வு போன்ற பிரச்சினைகள் ஏற்பட்டன. பின்னர் மருத்துவர் பரிசோதனையில் அவருக்கு பாலிசிஸ்டிக் ஓவேரி சிண்ட்ரோம் (PCOS) இருப்பது கண்டறியப்பட்டது. இந்த நோய் பெண்களின் கருத்தரிப்பை பாதிக்கக்கூடியதாக இருப்பதால், தொடர்ந்து மருத்துவ பரிசோதனைகள் மேற்கொள்ளப்பட்டது. இருப்பினும் அவருடைய உடலில் முட்டை வெளிவரும் செயல்பாடு சாதாரணமாகவே இருந்தது என்றும், கணவரின் பரிசோதனைகளும் சீராகவே இருந்தன.

எண்டோமெட்ரியோசிஸ் கண்டறியப்பட்ட பின்னணி

2022ஆம் ஆண்டு மேலும் காரணம் கண்டறிய அறுவை சிகிச்சை செய்யப்பட்டபோது, கெய்த்ரியோனாவுக்கு நான்காம் நிலை எண்டோமெட்ரியோசிஸ் இருப்பது தெரியவந்தது. இந்த நோயில் கருப்பை உள் சுவரைப் போன்ற திசுக்கள் கருப்பைக்கு வெளியே வளர்ந்து அழற்சி மற்றும் ஒட்டுதல்கள் உருவாக்கும். இந்த நிலை பெண்களின் கருத்தரிப்பை பாதிக்கும் முக்கிய காரணமாக கருதப்படுகிறது. இதனால் தம்பதியினர் ஐவிஎப் சிகிச்சையை தேர்வு செய்தனர்.

ஐவிஎப் சிகிச்சையின் சவால்கள்

2023 பிப்ரவரி மாதத்தில் முதல் ஐவிஎப் சிகிச்சை மேற்கொள்ளப்பட்டது. அது கர்ப்பம் உறுதியானாலும் சில வாரங்களில் கருக்கலைப்பாக முடிந்தது. அதே ஆண்டு அக்டோபரில் இரண்டாவது ஐவிஎப் முயற்சி செய்தபோது கரு பதியாததும் பின்னர் மீண்டும் கருக்கலைப்பு ஏற்பட்டதும் அவர்களை மனஅழுத்தத்தில் ஆழ்த்தியது. இதன் பின்னர் 2024ஆம் ஆண்டில் வேறு அணுகுமுறையை முயற்சிக்க வேண்டும் என்று கெய்த்ரியோனா முடிவு செய்தார்.

இம்யூனாலஜி சிகிச்சையின் புதிய வழி

அவர் டப்ளினில் உள்ள ஒரு கருத்தரிப்பு நிபுணரை அணுகி, உடலின் நோய் எதிர்ப்பு அமைப்பு கர்ப்பத்தை பாதிக்கிறதா என்பதைப் பரிசோதித்தார். ‘சிகாகோ’ ரத்தப் பரிசோதனை மூலம் உடலில் உள்ள நேச்சுரல் கில்லர் செல்கள் மற்றும் சைட்டோகைன் என்ற புரதங்களின் அளவு அதிகமாக இருப்பது கண்டறியப்பட்டது. இந்த செல்கள் அதிகமாக இருந்தால் கரு வளர்ச்சியை உடல் எதிர்க்கும் அபாயம் உள்ளது என்று மருத்துவர் தெரிவித்தார்.

சிகிச்சை மற்றும் கர்ப்பம்

அந்த பரிசோதனை முடிவுகளின் அடிப்படையில் நோய் எதிர்ப்பு அமைப்பை சமநிலைப்படுத்தும் மருந்துகள் வழங்கப்பட்டன. அதன் பின்னர் செய்யப்பட்ட கரு மாற்று (Embryo transfer) வெற்றிகரமாக கர்ப்பமாக மாறியது. கர்ப்பத்தின் முதல் மூன்று மாதங்களில் தொடர்ந்து இரத்தப் பரிசோதனைகள் செய்து தனிப்பட்ட சிகிச்சை முறையை அவர் பின்பற்றினார்.

இறுதியில் கிடைத்த மகிழ்ச்சி

நீண்ட கால போராட்டத்துக்குப் பிறகு 2025 அக்டோபரில் கெய்த்ரியோனா ஒரு பெண் குழந்தையைப் பெற்றெடுத்தார். தங்களது கருத்தரிப்பு சிக்கல்களுக்கு காரணமாக இருந்த நோய் எதிர்ப்பு அமைப்பு பிரச்சினைகளை கண்டறிந்து சிகிச்சை பெற்றதால்தான் இந்த மகிழ்ச்சி கிடைத்தது என அவர் கூறுகிறார். கருத்தரிப்பு சிக்கல்கள் உள்ளவர்கள், குறிப்பாக பல முறை கருக்கலைப்பு ஏற்பட்டவர்கள், உடலின் அழற்சி மற்றும் நோய் எதிர்ப்பு தொடர்பான பரிசோதனைகளை மேற்கொள்வது பயனுள்ளதாக இருக்கலாம் என்றும் அவர் ஆலோசனை வழங்குகிறார்.