நேரம் போதவில்லை என்று நினைப்பவர்களா? உண்மையில் உங்கள் நாளில் மறைந்திருக்கும் நேரம் இதோ!

இன்றைய வேகமான வாழ்க்கையில் “நேரமே இல்லை”, “வேலைகள் முடிவதே இல்லை” என்ற உணர்வு பலரிடமும் அதிகரித்துள்ளது. ஆனால், நிஜத்தில் நாம் நினைப்பதைக் காட்டிலும் அதிக நேரம் நமக்குக் கிடைக்கிறது என நேர மேலாண்மை நிபுணர்கள் கூறுகின்றனர். பலர் தாங்கள் நாள் முழுவதும் மிகப் பிஸியாக இருப்பதாக நினைத்தாலும், நேரத்தை பதிவு செய்து பார்த்தால் பல மணி நேரங்கள் கவனிக்கப்படாமல் வீணாகின்றன என்பது தெரியவருகிறது. வேலை, குடும்பம், ஓய்வு ஆகியவற்றுக்கிடையில் சரியான திட்டமிடல் இருந்தால் மன அழுத்தத்தையும் குறைத்து, வாழ்க்கையை சீராக மாற்ற முடியும் என புதிய ஆய்வுகள் மற்றும் நேர மேலாண்மை ஆலோசனைகள் சுட்டிக்காட்டுகின்றன.

ஒரு வாரம் உங்கள் நேரத்தை பதிவு செய்து பாருங்கள்

நேரம் எங்கே செல்கிறது என்பதை உணராமல் இருப்பதே பெரும்பாலானோரின் பிரச்சினையாக இருக்கிறது. ஒரு வாரத்திற்கு தினசரி என்ன செய்கிறோம் என்பதை குறித்துக் கொண்டால், உண்மையில் எவ்வளவு நேரம் பயனுள்ளதாக செல்கிறது, எவ்வளவு நேரம் கவனிக்கப்படாமல் வீணாகிறது என்பது தெளிவாகத் தெரியும். பலர் சமூக வலைத்தளம், தொலைக்காட்சி அல்லது தேவையற்ற செயல்களில் அதிக நேரம் செலவழிப்பதையும் அப்போது உணர்கிறார்கள். இதனால் “நேரம் இல்லை” என்ற எண்ணம் மாறி, “நேரத்தை சரியாக பயன்படுத்தவில்லை” என்ற புரிதல் உருவாகும் என நிபுணர்கள் கூறுகின்றனர்.

வாரத்திற்கான திட்டமிடல் வாழ்க்கையை எளிதாக்கும்

ஒவ்வொரு வாரத்தின் தொடக்கத்திலேயே முக்கியமான வேலைகளைத் திட்டமிடுவது பல சிக்கல்களைத் தவிர்க்க உதவுகிறது. வேலை, குடும்பம் மற்றும் தனிப்பட்ட ஆரோக்கியம் என மூன்று பகுதிகளுக்கும் சமநிலை கொடுத்து முன்னுரிமை நிர்ணயிக்க வேண்டும். “எல்லா வேலைகளும் முக்கியம்” என்று நினைத்தால் எந்த ஒன்றும் சரியாக முடியாது. அதற்குப் பதிலாக குறைந்த எண்ணிக்கையிலான முக்கிய இலக்குகளை நிர்ணயித்து செயல்படுவது மனநிறைவை அதிகரிக்கும் என்று நிபுணர்கள் பரிந்துரைக்கின்றனர்.

வேலை நேரத்தை புத்திசாலித்தனமாக மாற்றுங்கள்

முக்கியமான வேலைகளை நாளின் ஆரம்பத்திலேயே முடிக்க முயற்சிப்பது நல்ல பலனை தரும். நாள் முழுவதும் இடையூறுகள் அதிகரிப்பதால், அதிக கவனம் தேவைப்படும் பணிகளை காலை நேரத்தில் செய்வது உற்பத்தித் திறனை உயர்த்தும். வேலை இடையே சிறிய இடைவெளிகளை எடுத்துக்கொள்வதும், ஒரே நேரத்தில் பல வேலைகளைச் செய்ய முயற்சிக்காமல் ஒவ்வொன்றாக கவனம் செலுத்துவதும் வேலை தரத்தை மேம்படுத்தும்.

மாலைக்குப் பிறகு கிடைக்கும் நேரத்தை வீணாக்காதீர்கள்

பலருக்கு வேலை முடிந்த பிறகு கிடைக்கும் சில மணி நேரங்கள் திட்டமின்றி கழிகின்றன. ஆனால், தினமும் குறைந்தது 30 நிமிடங்களாவது புத்தகம் படித்தல், உடற்பயிற்சி, தோட்டப் பணி அல்லது புதிய திறன் கற்றல் போன்ற செயல்களில் செலவிட்டால் மனநிறைவும் மகிழ்ச்சியும் அதிகரிக்கும். குறிப்பாக ஓய்வு நேரத்தை நாமே தேர்வு செய்து பயன்படுத்தும் போது, வாழ்க்கை அதிக அர்த்தமுள்ளதாக உணரப்படும் என கூறப்படுகிறது.

Also Read: குழந்தைக்கு மொபைல் ஏன் வேண்டாம்? வளர்ச்சியை பாதிக்கும் மறைமுக காரணங்கள்!

பெரிய இலக்குகளை சிறிய படிகளாக மாற்றுங்கள்

“ஒருநாள் இதை செய்வேன்” என்று நினைக்கும் பல கனவுகள் திட்டமிடல் இல்லாததால் தாமதமாகின்றன. ஒரு பெரிய இலக்கை தினசரி சிறிய செயல்களாகப் பிரித்து செயல்பட்டால் அதை அடைவது எளிதாகும். தினமும் சிறிய முன்னேற்றம் கூட காலப்போக்கில் பெரிய மாற்றத்தை உருவாக்கும். நேரம் குறைவாக இருப்பதாக எண்ணுவதற்கு பதிலாக, கிடைக்கும் நேரத்தை புத்திசாலித்தனமாக பயன்படுத்துவதே வெற்றிக்கான முக்கிய திறவுகோல் என நிபுணர்கள் வலியுறுத்துகின்றனர்.