முட்டை மஞ்சள் கரு கொழுப்பா?  மஞ்சள் கருவைத் தூக்கிப் போடுறீங்களா?

முட்டை என்பது தினசரி உணவில் மிக எளிதாகச் சேர்க்கக்கூடிய ஊட்டச்சத்துக்கள் நிறைந்த ஒரு முக்கிய உணவாகக் கருதப்படுகிறது. இருப்பினும், தற்காலத்தில் உடல் எடையைக் குறைக்க விரும்புபவர்களும், உடற்பயிற்சி செய்பவர்களும் முட்டையின் மஞ்சள் கருவில் கொழுப்பு அதிகம் இருப்பதாகக் கூறி அதைத் தவிர்த்துவிட்டு வெள்ளைக்கருவை மட்டும் உண்ணும் பழக்கம் அதிகரித்துள்ளது. ஆனால், மஞ்சள் கருவை முற்றிலுமாக ஒதுக்குவது உடலுக்குத் தேவையான எண்ணற்ற அத்தியாவசியச் சத்துக்களை இழக்க நேரிடும் என ஊட்டச்சத்து வல்லுநர்கள் எச்சரிக்கின்றனர்.

மஞ்சள் கருவில் ஒளிந்துள்ள ஊட்டச்சத்துக்களின் களஞ்சியம்

முட்டையின் வெள்ளைக்கருவில் புரதச்சத்து மட்டுமே பிரதானமாக அமைந்திருக்கும் நிலையில், உடலுக்குத் தேவையான பெரும்பாலான வைட்டமின்களும் தாதுக்களும் மஞ்சள் கருவிலேயே செறிந்துள்ளன. இதில் வைட்டமின் ஏ, டி, ஈ, கே மற்றும் பி-காம்பளக்ஸ் வைட்டமின்கள் பெருமளவில் காணப்படுகின்றன. மேலும், உடலின் வளர்சிதை மாற்றத்திற்கும் உறுப்புகளின் சீரான இயக்கும் துணைபுரியும் இரும்புச்சத்து, கால்சியம், பாஸ்பரஸ், துத்தநாகம் மற்றும் ஃபோலேட் போன்ற தாதுக்களும் இதில் நிறைந்துள்ளன.

கொலஸ்ட்ரால் பற்றிய தவறான எண்ணங்களும் ஆரோக்கியமான கொழுப்பும்

மஞ்சள் கருவில் கொலஸ்ட்ரால் உள்ளது என்பது உண்மைதான் என்றாலும், மிதமான அளவில் முட்டை உட்கொண்டு வழக்கமான உடற்பயிற்சிகளை மேற்கொள்பவர்களுக்கு இது எவ்வித பாதிப்பையும் ஏற்படுத்தாது. மாறாக, உடலின் ஹார்மோன் உற்பத்திக்கும், எலும்புகளின் வலிமைக்குத் தேவையான வைட்டமின் டி இணைப்புக்கும் இந்த நல்ல கொழுப்பு அவசியமாகிறது. மேலும், இது நீண்ட நேரத்திற்குப் பசியைக் கட்டுப்படுத்தி உடலைச் சுறுசுறுப்பாக வைத்திருக்கவும் உதவுகிறது.

Also Read: முட்டையுடன் சேர்த்து சாப்பிடக் கூடாத உணவு எது தெரியுமா?

சரியான முறையில் உட்கொள்ளும் உணவுப் பழக்கம்

அதிக அளவிலான வெள்ளைக்கருவை மட்டும் உண்பதை விட, இரண்டு முழு முட்டைகளைச் சாப்பிடுவது உடலுக்குத் தேவையான அனைத்து ஊட்டச்சத்துக்களையும் சமச்சீராக அளிக்கும். மஞ்சள் கருவில் உள்ள முக்கிய ஆன்டிஆக்ஸிடன்ட்கள் மூளையின் செயல்பாட்டைச் சீராக்கி, நரம்பு மண்டலத்தை வலுப்படுத்த துணைபுரிகின்றன. எனவே, தேவையின்றி மஞ்சள் கருவைத் தவிர்ப்பதை விட்டுவிட்டு, முழு முட்டையைச் சரியான அளவில் உணவில் சேர்த்துக்கொள்வதே ஒட்டுமொத்த உடல்நலனுக்கும் சிறந்தது.

பொறுப்புத் துறப்பு: இத்தளத்தில் உள்ள லைப்ஸ்டைல், ஆரோக்கியம் மற்றும் உணவு சார்ந்த தகவல்கள் பொதுவான விழிப்புணர்விற்காக மட்டுமே; இவை மருத்துவ ஆலோசனையல்ல. இதில் உள்ள குறிப்புகளைப் பின்பற்றும் முன் தகுந்த நிபுணர் அல்லது மருத்துவரின் ஆலோசனையைப் பெறுவது அவசியமாகும்.