வலுவான எலும்பு பெற… உடனே தள்ளி வைக்க வேண்டிய 5 ஆபத்தான உணவுகள்!
Bone Health: மனித உடலைத் தாங்கிப் பிடிக்கும் எலும்புகளின் வலிமையைப் பாதுகாக்க உணவுக் கட்டுப்பாடு மிகவும் அவசியமாகும். நாம் உணவில் அதிகளவில் சேர்க்கும் உப்பு மற்றும் சர்க்கரை ஆகியவை எலும்புகளில் உள்ள கால்சியம் சத்தை உறிஞ்சி, அவற்றை எளிதில் பலவீனமடையச் செய்கின்றன. முதுமை காலத்தில் ஏற்படும் எலும்புத் தேய்மானத்தைத் தவிர்க்க அதிகப்படியான காபி குடிப்பதையும், இந்த 5 ஆபத்தான உணவுகளையும் முற்றிலும் தவிர்ப்பது நல்லது.
மனித உடல் சீராக இயங்குவதற்கும், அன்றாட வேலைகளைத் தொய்வின்றிச் செய்வதற்கும் எலும்புகளின் வலிமை மிக அவசியமான ஒன்றாகும். நாம் சுறுசுறுப்பாக நடப்பதற்கும், உடலைத் தாங்கிப் பிடிப்பதற்கும் இந்த எலும்புகளே அடித்தளமாக விளங்குகின்றன. பொதுவாக, வயது முதிர்வின் காரணமாக எலும்புகள் இயல்பாகவே பலவீனமடையத் தொடங்கும். அந்த காலகட்டத்தில் ஏற்படும் கடுமையான உடல் உபாதைகள் மற்றும் எலும்பு முறிவு போன்ற பாதிப்புகளில் இருந்து நம்மைப் பாதுகாத்துக் கொள்ள, இப்போதிலிருந்தே நமது உணவுப் பழக்கத்தில் சில கட்டுப்பாடுகளைக் கொண்டு வருவது அவசியமாகும். குறிப்பாக, எலும்புகளின் அடர்த்தியைக் குறைக்கும் ஐந்து வகையான உணவுகளை நாம் அன்றாட வாழ்வில் தவிர்ப்பது நல்லது என்று மருத்துவர்கள் அறிவுறுத்துகின்றனர்.
அதிக உப்பின் ஆபத்துகள்
உணவில் சுவைக்காகச் சேர்க்கப்படும் உப்பு, அளவுக்கு அதிகமானால் எலும்புகளுக்குப் பெரிய எதிரியாக மாறிவிடும். நாம் அன்றாடம் சாப்பிடும் உணவுகளில் உப்பின் அளவு அதிகரிக்கும் போது, அது எலும்புகளில் உள்ள மிக முக்கியமான சத்தான ‘கால்சியத்தை’ உடல் உறிஞ்சுவதைத் தடுக்கிறது. இதனால் எலும்புகள் படிப்படியாகத் தன் பலத்தை இழந்து பலவீனமடையத் தொடங்குகின்றன. எனவே, சமையலில் உப்பைக் குறைப்பதோடு, பதப்படுத்தப்பட்ட உணவுகளையும் தவிர்ப்பது நல்லது.
சர்க்கரை மற்றும் துரித உணவுகளின் பாதிப்பு
இனிப்புப் பண்டங்களை அளவுக்கு அதிகமாக விரும்பிச் சாப்பிடுவது எலும்புகளின் ஆரோக்கியத்தைச் சீர்குலைக்கும். சர்க்கரை அதிகம் உள்ள உணவுகள் உடலின் ஊட்டச்சத்து சமநிலையைப் பாதிப்பதுடன், எலும்புகளின் அடர்த்தியையும் குறைக்கின்றன. இதனுடன், இன்றைய காலகட்டத்தில் இளைஞர்கள் முதல் பெரியவர்கள் வரை பலரும் விரும்பி உண்ணும் ‘பாஸ்ட் புட்’ எனப்படும் துரித உணவுகளும் எலும்புகளைப் பெருமளவில் பாதிக்கின்றன. இவற்றில் உள்ள ரசாயனங்களும், ஊட்டச்சத்தில்லா தன்மையும் உடலை வலுவிழக்கச் செய்கின்றன.
Also Read: மழை பெய்தாலும் காய்ச்சல் வராது… இதை மட்டும் தவறாமல் செய்யுங்கள்!
குளிர்பானங்கள் மற்றும் காஃபின் எச்சரிக்கை
தாகத்தைத் தணிக்கவும், புத்துணர்ச்சிக்காகவும் நாம் பருகும் கார்போனேட்டட் குளிர்பானங்கள் மற்றும் சோடாக்கள் எலும்புகளுக்குத் தீங்கானவை. இவற்றில் உள்ள சில அமிலங்கள் எலும்புகளில் உள்ள கால்சியத்தை அரிக்கக் கூடியவை. அதேபோல, ஒரு நாளைக்குத் தேவையான அளவைத் தாண்டி அதிகப்படியாகக் காபி குடிக்கும் பழக்கமும் நல்லதல்ல. காபியில் உள்ள காஃபின் (Caffeine) அளவு அதிகரிக்கும் போது, அது உடலின் ஒட்டுமொத்த எலும்பு அமைப்பையும் பலவீனமடையச் செய்யும் ஆற்றல் கொண்டது. எனவே, ஆரோக்கியமான முதுமைக்கும், வலுவான உடலமைப்புக்கும் இந்த உணவுகளைக் தவிர்த்துப் பச்சைக் காய்கறிகளையும், கால்சியம் நிறைந்த இயற்கை உணவுகளையும் உட்கொள்வதே சிறந்த வழிமுறையாகும்.
