FD Schemes : ரெப்போ வட்டி குறைப்பு எதிரொலி.. FD வட்டியை குறைத்த எஸ்பிஐ!
SBI Reduces FD Interest Rate of Special FD Scheme | இந்திய ரிசர்வ் வங்கி ரெப்போ வட்டி விகிதத்தை குறைத்ததன் எதிரொலியாக பல வங்கிகள் தங்களின் நிலையான வைப்பு நிதி திட்டங்களின் வட்டியை குறைத்து வருகின்றன. அந்த அவகையில் எஸ்பிஐ வங்கி தனது நிலையான வைப்பு நிதி திட்டத்துக்கான வட்டியை குறைத்துள்ளது.
இந்தியாவின் நிதி சார்ந்த நடவடிக்கைகளை கையாண்டு வரும் இந்திய ரிசர்வ் வங்கி (RBI – Reserve Bank of India) அது குறித்து அவ்வப்போது பல புதிய அறிவிப்புகளை வெளியிடும். அந்த வகையில், கடந்த சில நாட்களுக்கு முன்பு ரெப்போ வட்டி விகிதத்தை (Repo Interest Rate) குறைத்து அறிவித்தது. ரெப்போ வட்டி விகிதம் குறைக்கப்பட்டதன் எதிரொலியாக சில வங்கிகள் தங்களின் கடன் வட்டி விகிதங்களில் மாற்றம் செய்து வருகின்றனர். அந்த வகையில், எஸ்பிஐ வங்கி தனது நிலையான வைப்பு நிதி (FD – Fixed Deposit) திட்டங்களுக்கான வட்டி விகிதத்தில் மாற்றம் செய்துள்ளது. அது குறித்து விரிவாக பார்க்கலாம்.
6 மாதங்களில் 3 முறை ரெப்போ வட்டி விகிதத்தை குறைத்த ஆர்பிஐ
இந்திய ரிசர்வ் வங்கி கடந்த சில மாதங்களாக ரெப்போ வட்டி விகிதத்தை தொடர்ச்சியாக குறைத்து வருகிறது. குறிப்பாக 2025, ஜனவரி மாதம் 6.50 சதவீதமாக இருந்த ரெப்போ வட்டி விகிதத்தை, 6.25 சதவீதமாக குறைத்தது. அதனை தொடர்ந்து 2025, மார்ச் மாதம் ரெப்பொ வட்டியை 6 சதவீதமாக குறைத்தது. அதனை தொடர்ந்து சமீபத்தில் ஜூன் 07, 2025 அன்று ரெப்போ வட்டி விகிதத்தை வெறும் 5.50 சதவீதமாக குறைத்துள்ளது.
மூன்றாவது முறையாக ரெப்போ வட்டி விகிதத்தை குறைத்த ஆர்பிஐ
MPC (Monetary Policy Committee) decides to cut repo rate by 50bps to 5.5%: RBI Governor Sanjay Malhotra pic.twitter.com/ywHFaNYZlM
— ANI (@ANI) June 6, 2025
எஃப்டி வட்டி விகிதத்தை குறைத்த எஸ்பிஐ
இந்திய ரிசர்வ் வங்கி ரெப்போ வட்டி விகிதத்தை குறைத்ததன் எதிரொலியாக சில வங்கிகள் தங்களது நிலையான வைப்பு நிதி திட்டத்தின் வட்டியை குறைத்தன. குறிப்பாக கடந்த வாரம் ஐசிஐசிஐ வங்கி, எச்டிஎஃப்சி வங்கி மற்றும் கனவரா வங்கி உள்ளிட்ட வங்கிகள் தங்களின் நிலையான வைப்பு நிதி திட்டங்களுக்கான வட்டியை குறைத்தன அந்த வகையில், தற்போது எஸ்பிஐ வங்கி தனது வட்டி விகிதத்தை குறைத்துள்ளது.
எஸ்பிஐ வங்கி தனது சிறப்பு திட்டமான அம்ரித் விருஷ்டி (Amrit Vrishti) திட்டத்தின் வட்டி விகிதத்தை குறைத்துள்ளது. 444 நாட்கள் கால அளவீடு கொண்ட இந்த திட்டத்தின் வட்டியில் 25 அடிப்படை புள்ளிகள் குறைக்கப்பட்டுள்ளன. இதன் காரணமாக இந்த திட்டத்தின் வட்டி விகிதம் 6.85 சதவீதத்தில் இருந்து 6.6 சதவீதமாக குறைக்கப்பட்டுள்ளது குறிப்பிடத்தக்கது.
