வீட்டு லோன் இஎம்ஐ இருக்கா? ரெப்போ வட்டியை குறைத்த ஆர்பிஐ.. வெளியான அறிவிப்பு

வங்கிகளின் குறுகிய காலக் கடனுக்கான ரெப்போ வட்டி (Repo Rate) விகிதத்தை ரிசர்வ் வங்கி (Reserve bank of india) குறைத்துள்ளது. இதன் மூலம் வாகனம், தனிநபர், வீட்டு கடன்களுக்கான தவணை குறைய வாய்ப்புள்ளது. 0.5  சதவீதம் குறைத்து, தற்போது 5.50 சதவீதமாக உள்ளதாக ரிசர்வ் வங்கி அறிவிப்பை வெளியிட்டுள்ளது. தொடர்ந்து மூன்றாவது முறையாக ரெப்போ விகிதத்தை ரிசர்வ் வங்கி குறைத்துள்ளது. ரிசர்வ் வங்கியின் நாணயக் கொள்கை கூட்டம் 2025 ஜூன் 4ஆம் தேதி தொடங்கியது. மூன்று நாட்கள் நடைபெறும் இந்த கூட்டத்தில் ரெப்போ வட்டி விகிதம் குறித்து ஆலோசிக்கப்படும். இந்த நிலையில், 2025 ஜூன் 6ஆம் தேதியான இன்று நாணயக் கொள்கை கூட்டத்தின் கடைசி நாளாகும். இந்த கூட்டத்தின் முடிவில் ரிசர்வ் வங்கி ஆளுநர் சஞ்சய் மல்ஹோத்ரா ரெப்போ வட்டி விகிதத்தை குறைத்து அறிவிப்பை வெளியிட்டார்.

ரெப்போ வட்டியை குறைத்த ஆர்பிஐ

அதன்படி,  ரெப்போ வட்டி விகிதத்தை  0.5 சதவீதம்  ரிசர்வ் வங்கி குறைத்துள்ளது.  இதன் மூலம் தற்போது ரெப்போ வட்டி விகிதம் 5.50 சதவீதமாக உள்ளதாக. 6 சதவீதமாக இருந்த நிலையில், தற்போது  50 புள்ளிகள் குறைக்கப்பட்டு 5.50 சதவீதமாக உள்ளது.

2025 ஆம் ஆண்டின் தொடக்கத்திலிருந்து ரிசர்வ் வங்கி தொடர்ந்து ரெப்போ விகிதத்தைக் குறைத்து வருகிறது. முன்னதாக, பிப்ரவரி மற்றும் ஏப்ரல் மாதங்களுக்கான ரெப்போ வட்டி விகிதமும் 0.25-0.25 சதவீதம் குறைக்கப்பட்டு, 6.50 சதவீதத்திலிருந்து 6 சதவீதமாகக் குறைக்கப்பட்டது.

இந்த நிலையில்,  2025 ஜூன் மாதமும்  ரெப்போ வட்டி விகிதம் குறைக்கப்பட்டுள்ளது. இதுகுறித்து பேசிய இந்திய ரிசர்வ் வங்கி ஆளுநர் சஞ்சய் மல்ஹோத்ரா, “நாட்டின் பணவீக்கம் அளவு 4 சதவீதத்திற்கும் குறைவாகவே உள்ளது. நாட்டின் மொத்த உள்நாட்டு உற்பத்தி வளர்ச்சியும் சிறந்த நிலையில் உள்ளது.

வட்டி குறையப்போகுது

#WATCH | RBI Governor Sanjay Malhotra says, “… The MPC decided to reduce the policy Repo Rate under the liquidity adjustment facility by 50 basis points to 5.5%. This will be with immediate effect. Consequently, the Standing Deposit Facility (STF) Rate shall stand adjusted to… pic.twitter.com/siUUlBmcrG

— ANI (@ANI) June 6, 2025

பணவீக்கத்திற்கு ஏற்ப 2025-26ஆம் ஆண்டுக்கான மொத்த உள்நாட்டு உற்பத்தி 6.5 சதவீதமாக இருக்கும் என எதிர்பார்க்கப்படுகிறது. முதல் காலாண்டு 6.5 சதவீதமும், இரண்டாம் காலாண்டு 6.7 சதவீதமும், மூன்றாம் காலாண்டு 6.6 சதவீதமூம் இருக்கும் என எதிர்பார்க்கப்படுகிறது” என்றார்.  தொடர்ந்து பேசிய அவர், ”ரெப்போ விகிதத்தைக் குறைப்பது பணப்புழகத்தை அதிகரிக்கும். உள்நாட்டு வளர்ச்சியை அதிகரிப்பதற்கும் உதவும்.

உலகளாவிய நிலைமை தொடர்ந்து நிலையற்றதாக இருக்கும்போது, ​​உள்நாட்டு வளர்ச்சியில் கவனம் செலுத்துவது மிகவும் அவசியம். நாட்டின் விலை ஸ்திரத்தன்மையைக் கருத்தில் கொண்டு உள்நாட்டு வளர்ச்சியை அதிகரிக்கும் நோக்கில் தற்போதைய முடிவு எடுக்கப்பட்டுள்ளது” என்றார். எனவே, ரெப்போ வட்டி குறைவை அடுத்து, வீடு, வாகனம், தனிநபர் கடன்களுக்கான வட்டி விகிதமும் குறைய வாய்ப்புள்ளது என்பது குறிப்பிடத்தக்கது.