Jio IPO: ரூ.30,213 கோடி மதிப்பிலான ஐபிஓ: விலை, தேதிகள் மற்றும் முழு விவரங்கள்

இந்தியாவின் டிஜிட்டல் சேவைகள் துறையில், ஜியோ பிளாட்ஃபார்ம்ஸ் மற்றொரு முக்கிய மைல்கல்லை எட்டத் தயாராகி வருகிறது. ரிலையன்ஸ் இண்டஸ்ட்ரீஸின் துணை நிறுவனமான ஜியோ பிளாட்ஃபார்ம்ஸின் இந்த ஐபிஓ, நாட்டின் டிஜிட்டல் வளர்ச்சியின் அடுத்த கட்டத்தில் முதலீட்டாளர்கள் பங்கேற்பதற்கான ஒரு வாய்ப்பை வழங்குகிறது என்று கோடக் மஹிந்திரா கேபிடல் நிறுவனத்தின் நிறுவனர் உதய் கோடக் தெரிவித்துள்ளார். அக்டோபர் 21-ஆம் தேதி தொடங்கவுள்ள இந்த ஐபிஓ மீது முதலீட்டாளர்கள் மிகுந்த ஆர்வம் காட்டி வருகின்றனர்.

ரூ.30,213 கோடி மதிப்பிலான ஐபிஓ

ஐபிஓ தொடங்குவதற்கு முன்னதாக, வியாழக்கிழமை நடைபெற்ற செய்தியாளர் சந்திப்பில் பேசிய உதய் கோடக், சில சாதனைகள் அவற்றின் பிரம்மாண்டமான அளவிற்காக அறியப்படுகின்றன, அதே சமயம் சில சாதனைகள் அவற்றின் பின்னணியில் உள்ள பயணத்திற்காக முக்கியத்துவம் பெறுகின்றன என்று குறிப்பிட்டார். பல ஆண்டுகால தொலைநோக்குப் பார்வை மற்றும் விடாமுயற்சியால் பெறப்படும் வெற்றிகள் வரலாற்றில் நீங்காத இடத்தைப் பிடிக்கின்றன என்று அவர் கூறினார்.

மேலும் பேசிய அவர், “சுமார் இருபது ஆண்டுகளில் ரிலையன்ஸ் குழுமத்திலிருந்து வரும் இந்த வரலாற்றுச் சிறப்புமிக்க ஐபிஓ, இந்தியாவின் மிகப்பெரிய ஐபிஓவாக அமையும். இது ஆகாஷ் அம்பானி மற்றும் இஷா அம்பானி போன்ற அடுத்த தலைமுறைத் தலைவர்கள், நவீன கால வணிகங்களை உருவாக்கி வருவதற்கான சான்றாகவும் திகழ்கிறது. இவை அனைத்தும் ரிலையன்ஸ் இண்டஸ்ட்ரீஸ் தலைவர் முகேஷ் அம்பானியின் வழிகாட்டுதலின் கீழ் நடைபெறுகின்றன,” என்று அவர் தெரிவித்தார்.

மேலும், “பங்குச் சந்தையில் பட்டியலிடப்பட்ட நிறுவனங்களின் சந்தை மூலதனத்தின் அடிப்படையில், ரிலையன்ஸ் குழுமம் இந்தியாவின் மிகப்பெரிய தொழில் குழுமமாக உள்ளது,” என்றும் உதய் கோடக் குறிப்பிட்டார். “ஜியோ குழுமத்தை மற்றவர்களிடமிருந்து வேறுபடுத்துவது எது? 53 கோடி சந்தாதாரர்கள் மற்றும் ஒரு அசாதாரணமான செயல்திறன். இது இந்தியாவில் மொபைல் இணைப்பு மற்றும் டிஜிட்டல் தளத்தின் எதிர்காலத்தை மறுவரையறை செய்துள்ளது. மேலும், மிகவும் மலிவு விலையில் சேவைகளை வழங்குவதன் மூலம் மக்களின் வாழ்க்கையை மாற்றியமைத்துள்ளது, இதன் மூலம் நம் நாட்டில் உள்ள அனைவருக்கும் இணைப்பு வசதியை அணுகக்கூடியதாக மாற்றியுள்ளது,” என்று அவர் குறிப்பிட்டார்.

ஜியோ ஐபிஓ எப்போது தொடங்கி எப்போது முடிவடைகிறது?

ஜியோ பிளாட்ஃபார்ம்ஸ் ஐபிஓ 2026 அக்டோபர் 21 அன்று தொடங்கி அக்டோபர் 23 அன்று முடிவடையும். நிறுவனம் தாக்கல் செய்த வரைவு விவரக்குறிப்பின்படி, இந்த வெளியீட்டின் ஒரு பகுதியாக 27 கோடி புதிய ஈக்விட்டி பங்குகள் வரை வெளியிடப்படும். ஒவ்வொரு பங்கின் முகமதிப்பும் ரூ.10 ஆகும். ஒவ்வொரு பங்கின் விலை வரம்பு ரூ.1,065 முதல் ரூ.1,119 வரை நிர்ணயிக்கப்பட்டுள்ளது. இந்த விலை வரம்பின் உயர் மட்டத்தில், இந்த ஐபிஓ மூலம் சுமார் ரூ.30,213 கோடி திரட்டப்படும் என்று எதிர்பார்க்கப்படுகிறது. இந்த எண்ணிக்கையின் அடிப்படையில், ஜியோ பிளாட்ஃபார்ம்ஸ் ஐபிஓ இந்தியாவில் இதுவரை இல்லாத மிகப்பெரிய பங்கு விற்பனையாக மாறும் என்று கணிக்கப்பட்டுள்ளது.

ஜியோ பிளாட்ஃபார்ம்ஸ் ஐபிஓ-விற்கு கோடக் மஹிந்திரா கேப்பிட்டல் முதன்மை ஒருங்கிணைப்பாளராகச் செயல்படுகிறது. மூலதனக் கட்டமைப்பு, வரைவு விவர அறிக்கையைத் தயாரித்தல், செபி மற்றும் நிறுவனப் பதிவாளர் விதிமுறைகளுக்கு இணங்குவதை உறுதி செய்தல், சட்டப்பூர்வ வெளிப்படுத்தல்களை நிர்வகித்தல், இடைத்தரகர்களை நியமித்தல் மற்றும் உள்நாட்டு நிறுவன முதலீட்டாளர்களுக்கு இந்த வெளியீட்டை சந்தைப்படுத்துதல் போன்ற பொறுப்புகளை இந்நிறுவனம் கையாளுகிறது.

ஜியோ பிளாட்ஃபார்ம்ஸ் சுமார் 530 மில்லியன் பயனர்களைக் கொண்டிருப்பதாலும், தனது சேவைகளை மிக விரைவாக விரிவுபடுத்தும் திறன் கொண்டிருப்பதாலும் தனித்து விளங்குகிறது என்று உதய் கோட்டக் குறிப்பிட்டார். மொபைல் இணைப்பு மற்றும் டிஜிட்டல் சேவைகள் குறித்த இந்தியர்களின் அனுபவத்தை ஜியோ பெருமளவில் மாற்றியமைத்துள்ளது என்று அவர் கூறினார்.

மலிவு விலையில் மொபைல் சேவைகளை வழங்குவதன் மூலம், நாடு முழுவதும் டிஜிட்டல் இணைப்பை விரிவுபடுத்துவதில் ஜியோ முக்கியப் பங்காற்றியுள்ளது என்று அவர் விளக்கினார். பயனர் எண்ணிக்கையை அதிகரிப்பது மட்டுமின்றி, அதிகரித்து வரும் தரவுப் பயன்பாட்டை மதிப்புமிக்க டிஜிட்டல் சேவைகள் மூலம் வருவாயாக மாற்றும் திறனும் ஜியோவிடம் உள்ளது என்று அவர் மேலும் தெரிவித்தார். கடந்த பத்தாண்டுகளில், தரவுப் பற்றாக்குறை கொண்ட நாடாக இருந்த இந்தியா, இன்று தரவு தாராளமாகக் கிடைக்கும் நாடாக மாறியுள்ளது என்று உதய் கோட்டக் குறிப்பிட்டார்.

ஒரு காலத்தில் 10 மில்லியனுக்கும் (1 கோடி) குறைவாக இருந்த 4G பயனர்களின் எண்ணிக்கை, தற்போது 4G மற்றும் 5G நெட்வொர்க்குகள் வாயிலாக 1 பில்லியனை (100 கோடி) எட்டியுள்ளது என்று அவர் சுட்டிக்காட்டினார். மொபைல் சேவைகள் மற்றும் வீட்டு பிராட்பேண்ட் துறைகளில் ஜியோ அடைந்த இந்த விரிவுபடுத்தல், இம்மாற்றத்திற்கு மிக முக்கியக் காரணமாக அமைந்தது என்று அவர் விளக்கினார். மேலும், முழுமையான டிஜிட்டல் இணைப்புச் சூழலமைப்பை (digital connectivity ecosystem) சொந்தமாக உருவாக்கியுள்ள ஒரு நிறுவனமாக, உலக அளவில் ஜியோ தனித்துவமானது என்றும் அவர் குறிப்பிட்டார்.