“இலங்கைக்கு துணை நிற்க தமிழ்நாடு தயார்”.. முதல்வர் ஸ்டாலின் உறுதி!!

முதல்வர் ஸ்டாலின்

தித்வா புயல் காரணமாக பாதிக்கப்பட்ட இலங்கைக்கு துணை நிற்க தமிழ்நாடு தயாராக உள்ளதாக முதலமைச்சர் மு.க.ஸ்டாலின் தெரிவித்துள்ளார். தித்வா புயல் காரணமாக நமது அண்டை நாடான இலங்கை பேரழிவை சந்தித்துள்ளதாக கூறிய அவர், மத்திய அரசின் மூலம் உணவுப் பொருட்கள், மருந்து பொருட்கள் உள்ளிட்டவற்றை தந்து உதவிக்கரம் நீட்ட தயார் என்றும் தெரிவித்துள்ளார். அதோடு, மத்திய அரசுடன் இணைந்து செயல்பட அதிகாரிகள் குழுவை அமைக்க தலைமைச் செயலருக்கு அறிவுறுத்தப்பட்டுள்ளதாக கூறிய அவர், இலங்கையில் சிக்கித் தவிக்கும் தமிழ்நாட்டைச் சேர்ந்த 177 பேர் திரும்ப அழைத்து வரப்பட்டுள்ளதாகவும் தெரிவித்தார்.

மேலும் படிக்க: ‘தித்வா புயல்’ எதிரொலி: தென் தமிழகத்தில் 100 ஆண்டுகளில் இல்லாத அளவு குளிர்!!

இலங்கையில் கொட்டித்தீர்க்கும் கனமழை:

இலங்கையில் உருவான தித்வா புயல் சின்னம் காரணமாக அங்கு மோசமான வானிலை நிலவி வருகிறது. இதனால், கடந்த ஒரு வாரமாக அங்கு பல்வேறு பகுதிகளில் கனமழை கொட்டித்தீர்த்து வருகிறது. இதனால், பல்வேறு பகுதிகளிலும் தாழ்வான பகுதிகளில் மழை நீர் தேங்கியுள்ளது. அதோடு, பல பகுதிகளில் நிலச்சரிவும் ஏற்பட்டுள்ளது. குறிப்பாக இலங்கை தலைநகரான கொழும்பு மழைநீரால் பெரியளவில் பாதிப்பை சந்தித்துள்ளது.

உயிரிழப்பு எண்ணிக்கை அதிகரிப்பு:

இலங்கையில் இருந்து இந்தியா நோக்கி தித்வா புயல் நகர்ந்த நிலையிலும், அங்கு அதி கனமழை பெய்து வருகிறது. தொடர்ந்து, தித்வா புயலால் ஏற்பட்ட அதி கனமழை மற்றும் நிலச்சரிவால் உயிரிழந்தவர்கள் எண்ணிக்கை 159ஆக அதிகரித்துள்ளது. அதோடு, 203 பேர் காணாமல் போனதாகவும் இலங்கை அரசு அறிவித்துள்ளது. கடந்த 24மணி நேரத்தில் அங்கு அதிகபட்சமாக கிளிநொச்சியில் 27 செ.மீ., போர்டகெர்னி பகுதியில் 21 செ.மீ., மன்னார் பகுதியில் 20 செ.மீ., மழை பெய்துள்ளது.

இலங்கை மக்களின் துயரில் பங்கெடுக்கிறோம்:

இந்நிலையில், முதல்வர் ஸ்டாலின் வெளியிட்டுள்ள அறிக்கையில், தித்வா புயல் காரணமாக நமது அண்டை நாடான இலங்கை பேரழிவைச் சந்தித்துள்ளது. நூற்றுக்கும் மேற்பட்டோர் இறந்தும் – பல இடங்கள் கடும் பாதிப்புக்கு உள்ளாகியும் இலங்கை மக்கள் அவதியுறுகின்றனர். இந்த இயற்கைச் சீற்றத்தில் இறந்தவர்களுக்கு ஆழ்ந்த இரங்கலைத் தெரிவித்துக் கொள்வதோடு, இலங்கை மக்களின் இப்பெருந்துயரில் தமிழ்நாடும் தமிழ்நாட்டு மக்களும் பங்கெடுக்கிறோம் என்று கூறியுள்ளார்.

தமிழகம் அழைத்து வரப்பட்ட 177 பேர்:

மேலும், இலங்கையில் சிக்கித் தவிக்கும் தமிழ்நாட்டைச் சேர்ந்த பயணிகளை மீட்க அயலகத் தமிழர் நலன் மற்றும் மறுவாழ்வுத் துறை சார்பில் நடவடிக்கைகளை மேற்கொள்ளப்பட்டு, இன்று காலை 11:05 மணியளவில் முதற்கட்டமாக 177 பேர் (ஆண்கள் – 113, பெண்கள் – 60, குழந்தைகள் – 4) தமிழ்நாட்டிற்குத் திரும்ப அழைத்துவரப்பட்டுள்ளதாக தெரிவத்துள்ளார்.

மேலும் படிக்க: கோவையில் 3 மணி நேரத்தில் 13 வீடுகளில் கொள்ளை – என்ன நடந்தது?

இலங்கைக்கு துணை நிற்க தயார்:

அதோடு, தித்வா புயல் காரணமாகப் பாதிக்கப்பட்டுள்ள இலங்கை மக்களுக்கு ஒன்றிய அரசின் மூலம் உணவுப் பொருட்கள் – மருந்துப் பொருட்கள் உள்ளிட்டவற்றைத் தந்து, அவர்கள் மீண்டெழுந்திட உதவிக்கரம் நீட்டிடத் தமிழ்நாடு அரசு தயாராக இருக்கிறது. இதற்காக மத்திய அரசுடன் இணைந்து செயல்பட அதிகாரிகள் குழுவை அமைத்திடத் தலைமைச் செயலாளர் அவர்களுக்கு அறிவுறுத்தியுள்ளதாகவும் அவர் குறிப்பிட்டுள்ளார்.