பக்ரீத் பண்டிகை முன்னிட்டு ஆடு தொட்டியில் ஆடுகள் விற்பனை அமோகம்.. வெள்ளாடுகள் ரூ. 30,000 வரை விற்பனை..

மே 25, 2026: வழக்கமாக பக்ரீத் பண்டிகைக்கு ஆடுகளை குர்பானி கொடுப்பது இஸ்லாமியர்களின் முக்கியமான மத வழக்கங்களில் ஒன்றாக இருந்து வருகிறது. இந்த ஆண்டு பக்ரீத் பண்டிகை வருகிற 28ஆம் தேதி உலகம் முழுவதும் கொண்டாடப்பட இருக்கிறது. இதனை முன்னிட்டு தமிழகத்தின் பல்வேறு பகுதிகளில் உள்ள ஆட்டு சந்தைகளில் விற்பனை மிகவும் களைகட்டியுள்ளது. குறிப்பாக சென்னை, மதுரை, திருச்சி, கோயம்புத்தூர், விழுப்புரம் உள்ளிட்ட பகுதிகளில் உள்ள ஆட்டு சந்தைகளில் அதிகாலை முதலே மக்கள் திரண்டு ஆடுகளை வாங்கிச் செல்கின்றனர்.

ஆடு தொட்டியில் ஆடுகள் விற்பனை அமோகம்:

சென்னையில் உள்ள பிரபலமான புளியந்தோப்பு ஆடு தொட்டியில் இந்த ஆண்டு வழக்கத்தை விட அதிகமான ஆடுகள் விற்பனைக்கு வந்துள்ளதாக வியாபாரிகள் தெரிவிக்கின்றனர். தமிழகம் மட்டுமல்லாமல் ஆந்திரா, கர்நாடகா உள்ளிட்ட அண்டை மாநிலங்களிலிருந்தும் ஏராளமான ஆடுகள் விற்பனைக்காக கொண்டு வரப்பட்டுள்ளன. சந்தையில் சிறிய அளவிலான ஆடுகள் முதல் பிரமாண்டமான கடா ஆடுகள் வரை விற்பனைக்காக நிறுத்தப்பட்டுள்ளதால், பொதுமக்கள் ஆர்வத்துடன் அவற்றை பார்வையிட்டு வாங்கி வருகின்றனர்.

பக்ரீத் பண்டிகை:

இறைவனின் தூதரான இப்ராஹீம் தனது மகனை இறைவனுக்காக தியாகம் செய்ய முனைந்த நிகழ்வை நினைவுகூரும் வகையில் ஆண்டுதோறும் பக்ரீத் பண்டிகை அனுசரிக்கப்படுகிறது. தியாகத்தையும், பகிர்வையும் எடுத்துக்கூறும் இந்த பண்டிகை இஸ்லாமியர்களின் மிக முக்கியமான பெருநாள்களில் ஒன்றாக கருதப்படுகிறது.

மேலும் படிக்க: அதிமுக எம்.எல்.ஏக்கள் 3 பேர் ராஜினாமா.. ஆதவ் அர்ஜுனாவை சந்தித்து த.வெ.கவில் இணைந்தனர்..

பக்ரீத் பண்டிகையை முன்னிட்டு, பல குடும்பங்கள் ஒரு வாரத்திற்கு முன்பாகவே ஆடுகளை வாங்கி வீடுகளில் பராமரித்து வருகின்றனர். பண்டிகை நாளன்று குர்பானி கொடுக்கப்படும் ஆடுகளின் இறைச்சி உறவினர்கள், நண்பர்கள், அக்கம் பக்கத்தினர் மற்றும் ஏழை எளிய மக்களுக்கும் பகிர்ந்து வழங்கப்படும். இதன் மூலம் ஒற்றுமை மற்றும் மனிதநேயத்தின் முக்கியத்துவம் வலியுறுத்தப்படுகிறது.

50,000 ரூபாய் வரை ஆடுகள் விற்பனை:

இந்த ஆண்டு சந்தைகளில் ஆடுகளின் விலை கடந்த ஆண்டுகளை விட சற்று அதிகரித்துள்ளதாக கூறப்படுகிறது. தீவன விலை உயர்வு, போக்குவரத்து செலவு மற்றும் பராமரிப்பு செலவுகள் அதிகரித்திருப்பதே இதற்குக் காரணம் என வியாபாரிகள் தெரிவிக்கின்றனர். அதன்படி, வெள்ளாடுகள் ரூ.15,000 முதல் ரூ.30,000 வரை விற்பனையாகின்றன. நல்ல எடை கொண்ட மற்றும் ஆரோக்கியமான கடா ஆடுகள் ரூ.50,000 முதல் ரூ.1 லட்சம் வரை விற்பனை செய்யப்படுகின்றன. சில பிரமாண்டமான ஆடுகள் அதற்கும் மேல் விலைக்கு விற்கப்படுவதாக கூறப்படுகிறது.

செம்மறி ஆடுகள் ஒரு ஜோடி ரூ.35,000 முதல் ரூ.50,000 வரை விற்பனையாகி வருகிறது. குறிப்பாக நல்ல உடல் அமைப்புடன் இருக்கும் ஆடுகளுக்கு அதிக வரவேற்பு காணப்படுகிறது. பலரும் குடும்பத்துடன் சந்தைக்கு வந்து ஆடுகளை தேர்வு செய்து வாங்கிச் செல்கின்றனர். குழந்தைகளும் ஆடுகளை ஆர்வமாக பார்த்து மகிழ்கின்றனர்.

ஆடு தொட்டிகளில் மட்டும் அல்லாமல், கிராமப்புறங்களில் நடைபெறும் வார சந்தைகளிலும் விற்பனை பரபரப்பாக நடைபெற்று வருகிறது. விழுப்புரம் மாவட்டம் செஞ்சி வார ஆட்டு சந்தையில் மட்டும் சுமார் 15,000 ஆடுகள் விற்பனைக்காக கொண்டு வரப்பட்டதாக கூறப்படுகிறது. அங்கு மட்டும் சுமார் 4 கோடி ரூபாய் வரை விற்பனை நடைபெற்றுள்ளதாக விவசாயிகள் மற்றும் ஆடு வளர்ப்போர் தெரிவித்துள்ளனர்.