உலகளாவிய முதலீட்டாளர்களுடன் கைகோக்கும் இந்திய ஸ்டார்ட்-அப்ஸ்.. பாரத் இன்னோவேட்ஸ் 2026 திட்டம் இதுதான்!

பிரதான நிகழ்வின் முன்னோட்டமாக நடைபெற்ற பாரிஸ் ரோட்ஷோ, இந்திய அரசின் கல்வி அமைச்சகம், பாரிஸில் உள்ள இந்தியத் தூதரகம், இந்தியத் தொழில் கூட்டமைப்பு ஆகியவற்றின் பிரதிநிதிகளையும், பல்வேறு பங்குதாரர்களிடமிருந்து 50-க்கும் மேற்பட்ட பிரதிநிதிகளையும் ஒன்றிணைத்தது. லா பிரெஞ்ச் டெக், விவாடெக் போன்ற பிரெஞ்சு வணிக மற்றும் புத்தாக்கச் சூழல் அமைப்புகளும், பிரான்சின் முக்கிய கல்வி நிறுவனங்களும் இதில் பங்கேற்றன. ESCP பிசினஸ் ஸ்கூல், ESSEC, பிரான்ஸ், INRIA, எகோல் நார்மல் சுப்பீரியர், ஏஜென்ஸ் ஃபிரான்சேஸ் டி டெவலப்மென்ட் போன்ற அமைப்புகளின் மூத்த பிரதிநிதிகளும், இந்தோ-பிரெஞ்சு வர்த்தக சபையின் பிரதிநிதிகளும், மற்றும் பிற துணிகர முதலீடு, ஆலோசனை, சட்டம், தொழில் மற்றும் புத்தொழில் வலையமைப்புகளும் இந்த முன்னோட்ட நிகழ்வில் பங்கேற்றனர்.

பாரத் இன்னோவேட்ஸ் 2026 திட்டத்துடன் தொடர்புடைய செயல் எல்லை, நோக்கங்கள் மற்றும் முதலீட்டு வாய்ப்புகள் குறித்து வருங்கால முதலீட்டாளர்கள் மற்றும் கூட்டாளர்களுக்கு விளக்கமளிப்பதற்கான ஒரு தளமாக இந்த ரோட்ஷோ அமைந்தது. கூட்டத்தில் உரையாற்றிய கல்வி அமைச்சகத்தின் இணைச் செயலாளர் திரு கே.எம். பிரபுல்லச்சந்திர சர்மா, குறிப்பாக இந்தியா-பிரான்ஸ் சிறப்பு உலகளாவிய மூலோபாய கூட்டாண்மையின் பின்னணியில், சர்வதேச ஒத்துழைப்பை வலுப்படுத்துவதில் ‘பாரத் இன்னோவேட்ஸ் 2026’ திட்டத்தின் முக்கியத்துவத்தை எடுத்துரைத்தார்.

வீடியோ

பாரத் இன்னோவேட்ஸ் 2026

கல்வி அமைச்சகத்தின் இணைச் செயலாளர் திரு கோவிந்த் ஜெயஸ்வால், ‘பாரத் இன்னோவேட்ஸ் 2026’ குறித்து ஒரு விளக்கக்காட்சியை வழங்கினார். மேலும், இந்தியாவின் வேகமாக விரிவடைந்து வரும் புத்தாக்கச் சூழலமைப்பில் பிரெஞ்சு மற்றும் உலகளாவிய முதலீட்டாளர்கள் ஈடுபடுவதற்கான வாய்ப்பையும் அவர் கோடிட்டுக் காட்டினார். இந்த ரோட்ஷோவின் போது, ​​கண்டுபிடிப்பாளர்கள், நிறுவனங்கள்/கல்வித்துறை, முதலீட்டாளர்கள் மற்றும் தொழில்துறை ஆகியவற்றுக்கு இடையேயான பாலத்தை வலுப்படுத்தும் நோக்கத்தில், மேம்பட்ட கணினி, குறைக்கடத்திகள், அடுத்த தலைமுறைத் தகவல் தொடர்பு, மேம்பட்ட பொருட்கள் மற்றும் முக்கிய கனிமங்கள், உயிரி தொழில்நுட்பம், விண்வெளி மற்றும் பாதுகாப்பு, உற்பத்தி மற்றும் தொழில் 4.0 உள்ளிட்ட 13 முன்னணி தொழில்நுட்பத் துறைகளில் பாரத் இன்னோவேட்ஸ் கவனம் செலுத்துகிறது என்பது எடுத்துரைக்கப்பட்டது.

பாரத் இன்னோவேட்ஸ் 2026-இன் முதலீட்டாளர் மையப்படுத்தப்பட்ட கட்டமைப்பும் எடுத்துரைக்கப்பட்டது. இதில், பிரத்யேகமாக வடிவமைக்கப்பட்ட நேருக்கு நேர் சந்திப்பு அமர்வுகள், துறை சார்ந்த கலந்துரையாடல்கள் மற்றும் ஸ்டார்ட்அப் நிறுவனங்களின் காட்சிப்படுத்தல்கள் ஆகியவற்றின் மூலம், உலகளாவிய முதலீட்டாளர்களுக்கு உயர் மதிப்புமிக்க, நேரத்தைச் சேமிக்கும் வகையிலான ஈடுபாட்டை இந்த மாநாடு எளிதாக்கும் என எதிர்பார்க்கப்படுவதாக எடுத்துரைக்கப்பட்டது.

பங்கேற்பாளர்கள் இந்தியக் குழுவினருடன் நேரடியாக உரையாடவும், புத்தாக்கம், ஆராய்ச்சி, முதலீடு மற்றும் சந்தை அணுகல் ஆகியவற்றில் சாத்தியமான கூட்டாண்மைகளை ஆராயவும் வழிவகை செய்த ஒரு கலந்துரையாடல் கேள்வி-பதில் அமர்வுடன் இந்த ரோட்ஷோ நிறைவடைந்தது. முதலீட்டாளர்கள், பெருநிறுவனத் தலைவர்கள், கல்வி நிறுவனங்கள், புத்தாக்கத் தளங்கள், தொழில்நுட்ப நிறுவனங்கள் மற்றும் இந்திய-பிரெஞ்சு வர்த்தக சங்கங்களின் பங்கேற்பு, ‘பாரத் இன்னோவேட்ஸ் 2026’ மீதான வலுவான ஆர்வத்தைப் பிரதிபலித்ததுடன், இந்தியாவின் உயர்கல்விப் புத்தாக்கச் சூழலமைப்பிற்கும் உலகளாவிய பங்குதாரர்களுக்கும் இடையே கூட்டாண்மைகளை உருவாக்குவதே இந்த ரோட்ஷோவின் நோக்கம் என்பதையும் அடிக்கோடிட்டுக் காட்டியது.

பாரத் இன்னோவேட்ஸ் முன்னெடுப்பானது, 2026 பிப்ரவரி 17 அன்று, பிரான்ஸ் அதிபர் முன்னிலையில் நடைபெற்ற இந்தியா-பிரான்ஸ் புத்தாக்க ஆண்டின் தொடக்க விழாவின்போது இந்தியப் பிரதமரால் அறிவிக்கப்பட்டது.பாரத் இன்னோவேட்ஸ் 2026, இந்தியக் கல்விச் சூழலுக்கான ஒரு உலகளாவிய முடுக்கியாகக் கருதப்படுகிறது. இது, இந்தியாவின் பல்கலைக்கழகங்கள் தலைமையிலான புத்தாக்கங்களை ஆய்வகத்திலிருந்து சந்தைக்கும், இந்தியாவிலிருந்து உலகிற்கும் கொண்டு செல்லும். இந்நிகழ்ச்சி, 2026 ஜூன் 14 முதல் 16 வரை பிரான்சின் நைஸ் நகரில் உள்ள பலே டி எக்ஸ்போசிஷன்ஸ்-இல் ஏற்பாடு செய்யப்படுகிறது.