டெல்லி முதல் குருகிராம் வரை… உலகின் அதிக வெப்பமான 100 நகரங்களும் இந்தியாவில்..

இந்த பட்டியலில் சிறிய நகரங்கள் மட்டுமின்றி, பல முக்கிய பெருநகரங்களும் இடம்பெற்றிருந்தன. அதில் புதுடெல்லி, குருகிராம், பரிதாபாத், சண்டிகர், ஆக்ரா, வாராணசி, பிரயாக்ராஜ், நாக்பூர் மற்றும் லூதியானா போன்ற நகரங்களும் அடங்கும்.

உலகின் வெப்பமான நகரம்:

AQI.in வெளியிட்ட தரவரிசைப் பட்டியலின்படி, உலகின் அதிக வெப்பமான நகரங்களாக உத்தரப் பிரதேச மாநிலத்தின் அவுரையா, பண்டா மற்றும் இடாவா ஆகிய நகரங்கள் தலா 46 டிகிரி செல்சியஸ் வெப்பநிலையுடன் முதல் மூன்று இடங்களை பிடித்துள்ளன.

அதேபோல், உத்தரப் பிரதேசம் மற்றும் ஹரியானாவில் உள்ள அலிகர், மெயின்புரி, குருக்ஷேத்திரா, பானிபட் மற்றும் கர்னால் உள்ளிட்ட நகரங்களில் 45 டிகிரி செல்சியஸ் வெப்பநிலை பதிவாகியுள்ளது. பஞ்சாப், ஹரியானா, உத்தரப் பிரதேசம், மத்தியப் பிரதேசம், ராஜஸ்தான் மற்றும் ஒடிசா மாநிலங்களில் உள்ள பிரயாக்ராஜ், ஹிசார், ஜலந்தர், பதிந்தா, சத்னா மற்றும் பலாங்கிர் உள்ளிட்ட பல நகரங்களில் 44 டிகிரி செல்சியஸ் வெப்பநிலை பதிவானது.

மேலும், சண்டிகர், ஆக்ரா, குவாலியர், ஜம்மு, பதான்கோட் மற்றும் வாராணசி போன்ற நகரங்களில் 43 டிகிரி செல்சியஸ் வெப்பநிலை பதிவாகியுள்ளது.

உலகின் அதிக வெப்பமான முதல் 100 நகரங்களின் பட்டியலில் கீழ் இடங்களில் இருந்த நகரங்களிலும் கூட கடும் வெப்பம் நீடித்தது. புதுடெல்லி, குருகிராம், பரிதாபாத் மற்றும் ரோத்தக் உள்ளிட்ட நகரங்களில் மதிய நேரத்தில் 41 டிகிரி செல்சியஸ் வெப்பநிலை பதிவாகியுள்ளது.

இந்த பட்டியல், வட இந்தியா, மத்திய இந்தியா மற்றும் கிழக்கு இந்தியாவின் சில பகுதிகளில் வெப்ப அலை எந்த அளவுக்கு தீவிரமாக நிலவி வருகிறது என்பதை வெளிப்படுத்துகிறது. குறிப்பாக உத்தரப் பிரதேசம், ஹரியானா, பஞ்சாப், ராஜஸ்தான் மற்றும் மத்தியப் பிரதேச மாநில நகரங்கள் பட்டியலில் அதிகமாக இடம்பெற்றுள்ளன.

நீடிக்கும் வெப்ப அலை:

இதற்கிடையில், இந்திய வானிலை ஆய்வு மையம் (IMD) வடமேற்கு மற்றும் மத்திய இந்தியாவின் பல பகுதிகளில் அடுத்த சில நாட்களும் கடும் வெப்ப அலை முதல் தீவிர வெப்ப அலை நிலை தொடரும் என எச்சரிக்கை விடுத்துள்ளது. மே 19ஆம் தேதி காலை வெளியிடப்பட்ட வானிலை அறிவிப்பின்படி, ராஜஸ்தான், பஞ்சாப், ஹரியானா, சண்டிகர், டெல்லி, மத்தியப் பிரதேசம் மற்றும் விதர்பா பகுதிகளில் வாரம் முழுவதும் வெப்ப அலை நீடிக்கக்கூடும் என தெரிவிக்கப்பட்டுள்ளது.

மேற்கு உத்தரப் பிரதேசத்தின் சில பகுதிகளில் மே 19 முதல் 24ஆம் தேதி வரை தீவிர வெப்ப அலை நீடிக்க வாய்ப்புள்ளதாகவும், கிழக்கு உத்தரப் பிரதேசத்தில் மே 20ஆம் தேதி வரை கடும் வெப்பநிலை தொடரக்கூடும் எனவும் IMD தெரிவித்துள்ளது.

ஞாயிற்றுக்கிழமை நாட்டிலேயே அதிகபட்சமாக உத்தரப் பிரதேசத்தின் பண்டா நகரில் 47.6 டிகிரி செல்சியஸ் வெப்பநிலை பதிவானதாகவும் வானிலை ஆய்வு மையம் தெரிவித்துள்ளது. மேலும், வடமேற்கு இந்தியாவின் பல பகுதிகளில் அடுத்த சில நாட்களில் வெப்பநிலை மேலும் 2 முதல் 3 டிகிரி செல்சியஸ் வரை அதிகரிக்கக்கூடும் என கணிக்கப்பட்டுள்ளது.

இதனிடையே, வடகிழக்கு மற்றும் தென் இந்தியாவின் சில பகுதிகளில் இடியுடன் கூடிய மழை மற்றும் கனமழை பெய்ய வாய்ப்பு இருப்பதாகவும், அதே நேரத்தில் வட மற்றும் மத்திய இந்தியாவின் பெரும்பாலான பகுதிகள் கடும் வெப்பத்தின் தாக்கத்தில் தொடரும் என்றும் இந்திய வானிலை ஆய்வு மையம் தெரிவித்துள்ளது.