ஆடிமாதத்தில் அம்மன் கோவில்களுக்கு இலவச ஆன்மிகப் பயணம்: செல்வது எப்படி?
Free Tamil Nadu Temple Pilgrimage: தமிழ்நாடு அரசு, ஆடி மாதத்தில் அம்மன் கோவில்களுக்கு இலவச ஆன்மிகப் பயணத்தை அறிவித்துள்ளது. 2025 ஜூலை மற்றும் ஆகஸ்ட் மாதங்களில் நடைபெறும் இந்தப் பயணத்தில் 60-70 வயதுக்குட்பட்ட, ரூ.2 லட்சம் வருமானம் உள்ள இந்துக்கள் பங்கேற்கலாம். சென்னை, மதுரை உள்ளிட்ட நகரங்களில் இருந்து சிறப்பு பேருந்துகள் இயக்கப்படும்.
தமிழ்நாடு ஜூன் 22: தமிழ்நாடு அரசு (Tamilnadu Government) ஆடிமாதத்தில் அம்மன் கோவில்களுக்கு கட்டணமில்லா ஆன்மிகப் பயண திட்டத்தை (Spiritual journey plan) அறிவித்துள்ளது. 2025 ஜூலை 18, 25 மற்றும் 2025 ஆகஸ்ட் 1, 8, 15 ஆகிய தேதிகளில் பயணம் நடைபெறும். சென்னை, மதுரை, திருச்சி, கோயம்புத்தூர் உள்ளிட்ட நகரங்களில் இருந்து சிறப்பு பேருந்துகள் இயக்கப்படும். இந்து மதத்தைச் சேர்ந்த, 60-70 வயதுக்குட்பட்ட, ரூ.2 லட்சம் வருமானம் உடையோர் விண்ணப்பிக்கலாம். ஆதார், பான், வருமான சான்று, உடல்நல சான்று ஆகியவை தேவை. www.hrce.tn.gov.in இணையதளத்தில் 2025 ஜூலை 11க்குள் விண்ணப்பிக்கலாம் என தெரிவிக்கப்பட்டுள்ளது.
ஆன்மிக சுற்றுலா திட்டம் அறிமுகம்
தமிழ்நாடு அரசு, ஆடிமாதத்தில் அம்மன் கோவில்களுக்கு ஆன்மிக சுற்றுலா பயணத்தை கட்டணமின்றி நடத்தும் திட்டத்தை அறிமுகப்படுத்தியுள்ளது. இந்த பயணத்திற்காக தமிழகத்தின் முக்கிய நகரங்களான சென்னை, மதுரை, தஞ்சாவூர், கோயம்புத்தூர், திருச்சி, ஈரோடு மற்றும் திருநெல்வேலி ஆகிய இடங்களில் இருந்து சிறப்பு பேருந்துகள் இயக்கப்பட உள்ளன.
பயண தேதிகள் அறிவிப்பு
2025 ஜூலை 18, 25 மற்றும் 2025 ஆகஸ்ட் 1, 8, 15 ஆகிய தேதிகளில் ஆன்மிகப் பயணம் நடைபெறவுள்ளது. இந்த திட்டம், இந்து சமய அறநிலையத்துறை மற்றும் தமிழ்நாடு சுற்றுலா மேம்பாட்டுக் கழகம் இணைந்து செயல்படுத்துகிறது.
கட்டணமில்லா ஆன்மிகப் பயணம்
ஆடி மாதத்தில் அம்மன் திருக்கோயில்களுக்கு
கட்டணமில்லா ஆன்மிகப் பயணம்
தகுதியுடையோர் விண்ணப்பித்து பயன்பெறலாம்.
மாண்புமிகு இந்து சமய அறநிலையத்துறை அமைச்சர் திரு.பி.கே.சேகர்பாபு அவர்கள் தகவல்.ஆடி மாத ஆன்மிகப் பயணம் தொடர்பான விவரங்களுக்கு துறையின் https://t.co/rbCDgP0At8… pic.twitter.com/VwoD3K1pfG
— TN HRCE (@tnhrcedept) June 13, 2025
விண்ணப்பதாரர்களுக்கான தகுதிகள்
இந்த பயணத்திற்கு விண்ணப்பிக்க வேண்டிய நிபந்தனைகள்: விண்ணப்பதாரர்கள் இந்துமதத்தை சேர்ந்தவர்களாக இருக்க வேண்டும், அவர்களின் வயது 60 முதல் 70க்குள் இருக்க வேண்டும் மற்றும் ஆண்டு வருமானம் ரூ.2 லட்சத்தை மீறக்கூடாது. உடல்நல சான்று, வருமான சான்று, ஆதார் மற்றும் பான் கார்ட் ஆகிய ஆவணங்கள் கட்டாயம் தேவைப்படுகிறது.
பயணத்தில் பங்கேற்கும் விதிமுறைகள்
பக்தர்கள் ஒருமுறை மட்டுமே பயணத்தில் பங்கேற்க அனுமதிக்கப்படுவர். குழந்தைகள் இந்த பயணத்தில் அனுமதிக்கப்படமாட்டார்கள். பயணத் திட்டம் துவங்கும் நாளன்று பயணிகள் அறிவிக்கப்பட்ட நகரங்களுக்குச் சென்று பயணத்தில் கலந்துகொள்ள தயாராக இருக்க வேண்டும்.
ஆன்லைனில் எப்படி விண்ணப்பிப்பது?
விண்ணப்பிக்க விருப்பமுள்ளவர்கள் www.hrce.tn.gov.in இணையதளத்தை அணுகி, விண்ணப்ப படிவத்தை பதிவிறக்கம் செய்து, தேவையான தகவல்களுடன் தங்களது பகுதிக்கேற்ப உள்ள அறநிலையத்துறை இணை ஆணையர் அலுவலகத்தில் சமர்ப்பிக்க வேண்டும்.
மேலதிக உதவிக்கு தொடர்பு எண்
மேலும் விவரங்களுக்கு, தமிழக அரசு வழங்கும் இலவச உதவி எண் 1800 425 1757-ஐ தொடர்பு கொள்ளலாம். இந்த வாய்ப்பை பயன்படுத்தி ஆன்மிக சிந்தனையுடன் பயணிக்க ஆர்வமுள்ள மூப்பர்களுக்கு இது ஒரு அரிய சந்தர்ப்பமாக அமையும்.
