இந்தியாவின் கடைசி சாலை எங்கே இருக்கிறது என தெரியுமா?

அரிச்சல் முனை

இந்தியாவின் தென்முனையில் பல்வேறு இயற்கை மற்றும் வரலாற்று சிறப்புகள் மறைந்துள்ளன. அவற்றில் மிகவும் ஆர்வத்தை ஏற்படுத்தும் இடமாக இந்தியாவின் கடைசி சாலை கருதப்படுகிறது. தமிழகத்தின் ராமநாதபுரம் மாவட்டத்தில் உள்ள ராமேஸ்வரம் பகுதியில் இருந்து தொடங்கும் தேசிய நெடுஞ்சாலை 87, தனுஷ்கோடி வழியாக அரிச்சல் முனை வரை செல்கிறது. இந்த அரிச்சல் முனை தான் இந்திய நிலப்பரப்பின் கடைசி அணுகக்கூடிய பகுதி எனக் கூறப்படுகிறது. இங்கு நிலம் முடிந்து கடல் தொடங்குகிறது என்பதால் இந்த இடம் பயணிகளுக்கு தனித்துவமான அனுபவத்தை வழங்குகிறது.

ராமேஸ்வரம் முதல் அரிச்சல் முனை வரை பயணம்

இந்த சாலை ராமேஸ்வரத்தில் தொடங்கி சுமார் 20 கிலோமீட்டர் தூரம் தனுஷ்கோடி வரை செல்கிறது. ஒருகாலத்தில் மக்கள் வசித்து வந்த கடலோர நகரமாக இருந்த தனுஷ்கோடி தற்போது வெறிச்சோடிய இடமாக மாறியுள்ளது. அங்கிருந்து மேலும் சில கிலோமீட்டர்கள் பயணித்தால் அரிச்சல் முனை என்ற மணற்பரப்பை அடையலாம். இது பாம்பன் தீவின் தெற்குப் பகுதியில் அமைந்துள்ள இந்தியாவின் கடைசி நிலப்பகுதியாகும். தெளிவான வானிலையில் இலங்கை நாட்டின் கரையோரம் தொலைவில் இருந்து காணக்கூடும் என்று பயணிகள் கூறுகின்றனர்.

புராணமும் வரலாறும் இணைந்த தனுஷ்கோடி

தனுஷ்கோடி பகுதி புராண வரலாற்றுடன் தொடர்புடையதாக கருதப்படுகிறது. இராமாயணக் கதையின் படி, இலங்கைக்கு செல்ல ராமர் மற்றும் அவரது படைகள் ராமர் சேதுவை கட்டத் தொடங்கிய இடமாக இந்த பகுதி குறிப்பிடப்படுகிறது. “தனுஷ்கோடி” என்ற பெயருக்கு “வில் முனை” என்ற பொருள் இருப்பதாக கூறப்படுகிறது. அதாவது ராமர் தனது விலால் பாலம் அமைக்க தொடங்கிய இடம் என்ற நம்பிக்கை உள்ளது. இதனால் இந்த பகுதி மத மற்றும் ஆன்மிக முக்கியத்துவம் பெற்றதாக கருதப்படுகிறது.

1964 புயலின் பேரழிவு

ஒருகாலத்தில் தனுஷ்கோடி ஒரு பரபரப்பான துறைமுக நகரமாக இருந்தது. இங்கு ரயில் நிலையம், தபால் நிலையம் மற்றும் பல குடியிருப்புகள் இருந்தன. ஆனால் 1964ஆம் ஆண்டு டிசம்பர் மாதத்தில் ஏற்பட்ட கடுமையான புயல் அந்த நகரை முழுவதுமாக அழித்தது. கடும் சூறாவளி காரணமாக கட்டிடங்கள் இடிந்து, நிலப்பகுதிகள் கடலில் மூழ்கி, ரயில் பாதைகளும் அழிந்தன. இதனால் அந்த பகுதியை மக்கள் வாழ்வதற்கு தகுதியற்ற இடமாக அரசு அறிவித்தது. அந்த நகரின் இடிபாடுகள் இன்றும் அந்த பேரழிவின் நினைவாக காணப்படுகின்றன.

Also Read: குழந்தைகளுக்கு இந்த வயதில் மொபைல் போனா..? எச்சரிக்கும் மருத்துவர்

கடைசி சாலையின் தனித்துவம்

இந்தியாவின் கடைசி சாலை என அழைக்கப்படும் இந்த பாதை பல காரணங்களால் தனித்துவம் பெற்றதாக கருதப்படுகிறது. சாலையின் இருபுறங்களிலும் கடல் காணப்படுவதால் பயணிகள் விசித்திரமான இயற்கைக் காட்சிகளை அனுபவிக்க முடிகிறது. புராண வரலாற்று முக்கியத்துவம், வெறிச்சோடிய தனுஷ்கோடி நகரின் இடிபாடுகள் மற்றும் இலங்கை நாட்டிற்கு மிக அருகில் அமைந்துள்ள நிலப்பகுதி ஆகியவை இந்த இடத்தின் முக்கிய அம்சங்களாகும். தேசிய நெடுஞ்சாலை 87 விரிவாக்கப்பட்டதன் மூலம் தற்போது இந்த சாலை முழுவதும் வாகனங்கள் செல்லக்கூடியதாக மாற்றப்பட்டுள்ளது.

அரிச்சல் முனையில் முடியும் பயணம்

இந்த சாலை இறுதியாக அரிச்சல் முனை என்ற இடத்தில் முடிகிறது. அதன் பின்னர் வாகனங்கள் செல்ல அனுமதி இல்லை. கடலால் சூழப்பட்ட இந்த இடம் இயற்கை அழகும் அமைதியும் நிறைந்ததாக இருப்பதால் பல்வேறு மாநிலங்களிலிருந்தும் சுற்றுலா பயணிகள் இங்கு வருகை தருகின்றனர். இந்தியாவின் கடைசி சாலை என்ற தனித்துவம் காரணமாக இந்த இடம் சுற்றுலாப் பயணிகள் மற்றும் புகைப்பட கலைஞர்களுக்கு முக்கியமான பயண தலமாக மாறியுள்ளது.