மளிகை பொருட்களுக்கு இவ்வளவு செலவா? பணத்தை மிச்சப்படுத்த சூப்பர் வழி

மளிகைப் பொருட்களின் செலவை குறைக்க முன்கூட்டியே உணவுத் திட்டம் தயாரிப்பது உதவும். பருவகாலத்தில் கிடைக்கும் காய்கறிகள் மற்றும் பழங்களை தேர்வு செய்வது செலவை கட்டுப்படுத்தலாம். வாரத்தில் சில வேளைகளில் இறைச்சிக்கு பதிலாக பருப்பு, காய்கறி போன்றவற்றை சேர்க்கலாம். வீட்டில் ஏற்கனவே இருக்கும் பொருட்களை முதலில் பயன்படுத்துவதன் மூலம் தேவையற்ற வாங்குதலை தவிர்க்கலாம். குளிர்சாதன பெட்டி மற்றும் சமையலறை அலமாரியில் உள்ள பொருட்களை அடிக்கடி சரிபார்ப்பது உணவு வீணாவதை குறைக்கும். சில சமயங்களில் உறைந்த காய்கறிகள் போன்ற நீண்ட நாட்கள் சேமிக்கக்கூடிய பொருட்களை பயன்படுத்தலாம்.

மளிகை செலவு ஏன் அதிகரிக்கிறது?

அன்றாட மளிகைப் பொருட்களின் விலை தொடர்ந்து உயர்ந்து வருவதால் குடும்பங்களின் மாதாந்திர பட்ஜெட்டில் உணவுச் செலவுக்கு அதிக தொகை ஒதுக்க வேண்டிய நிலை ஏற்பட்டுள்ளது. காலநிலை மாற்றம், இறக்குமதி வரிகள் மற்றும் எரிபொருள் செலவு போன்ற பல்வேறு காரணிகள் உணவுப் பொருட்களின் விலையை பாதிப்பதாக Fast Company வெளியிட்டுள்ள கட்டுரை குறிப்பிடுகிறது.

பருவகால உணவுகளை தேர்வு செய்யுங்கள்

பருவத்திற்கு ஏற்ற காய்கறிகள் மற்றும் பழங்களை வாங்குவது செலவை கட்டுப்படுத்த உதவும் வழிகளில் ஒன்றாகும். குறிப்பாக உள்ளூரில் கிடைக்கும் பருவகால விளைபொருட்களை தேர்வு செய்தால் நீண்ட தூர போக்குவரத்து செலவுகளின் தாக்கமும் குறைய வாய்ப்புள்ளது.

வாரத்திற்கு ஒரு நாள் இறைச்சியை தவிர்க்கலாம்

ஒவ்வொரு வாரமும் குறைந்தது ஒரு வேளை இறைச்சி உணவுக்கு பதிலாக காய்கறி, பருப்பு அல்லது தானியங்களை அடிப்படையாகக் கொண்ட உணவை தேர்வு செய்வது மளிகை செலவை குறைக்க உதவும். சிறிய மாற்றமாக இருந்தாலும் தொடர்ந்து கடைப்பிடிக்கும்போது குடும்ப உணவுச் செலவில் வித்தியாசத்தை ஏற்படுத்தலாம்.

குளிர்சாதன பெட்டியை அடிக்கடி சரிபாருங்கள்

வீட்டில் வாங்கி வைத்த உணவுப் பொருட்கள் பயன்படுத்தப்படாமல் வீணாகும் நிலையை தவிர்ப்பது மிகவும் முக்கியம். குளிர்சாதன பெட்டி, ஃப்ரீசர் மற்றும் சமையலறை அலமாரிகளை அவ்வப்போது சுத்தம் செய்து, ஏற்கனவே இருக்கும் பொருட்களை முதலில் பயன்படுத்துவது தேவையற்ற புதிய கொள்முதலை குறைக்க உதவும்.

வார உணவு திட்டத்தை உருவாக்குங்கள்

ஒரு வாரத்திற்கு என்னென்ன உணவுகளை சமைக்க வேண்டும் என்பதை முன்கூட்டியே திட்டமிடுவது தேவையற்ற பொருட்களை வாங்குவதை கட்டுப்படுத்தும். இதன் மூலம் வீட்டில் ஏற்கனவே உள்ள பொருட்களை சரியாக பயன்படுத்துவதுடன் உணவு வீணாவதையும் குறைக்க முடியும்.

உறைந்த காய்கறிகளையும் பயன்படுத்தலாம்

புதிய காய்கறிகள் மற்றும் பழங்களுடன் ஒப்பிடும்போது சில நேரங்களில் உறைந்த உணவுப் பொருட்கள் நீண்ட நாட்கள் சேமித்து வைக்கக்கூடியதாகவும் குறைந்த விலையில் கிடைக்கக்கூடியதாகவும் இருக்கும். முறையாக சேமிக்கப்பட்ட உறைந்த காய்கறிகள் மற்றும் பழங்களையும் உணவில் சேர்த்துக்கொள்வது மளிகை பட்ஜெட்டை சமாளிக்க உதவும்.

Also Read: 60-லும் மாறாத ‘பூவே பூச்சூடவா’ நதியா… இதுதான் அந்த அழகு ரகசியம்!

உணவின் தரத்தையும் சேமிப்பு முறையையும் கவனியுங்கள்

‘Best by’ அல்லது ‘Sell by’ போன்ற தேதிகளை உணவு காலாவதியான தேதியாகவே கருதாமல், பொருள் முறையாக சேமிக்கப்பட்டுள்ளதா என்பதையும் அதன் வாசனை, தோற்றம் போன்றவற்றையும் கவனிப்பது அவசியம். இருப்பினும் குழந்தைகளுக்கான இன்ஃபன்ட் ஃபார்முலா போன்ற குறிப்பிட்ட பொருட்களில் லேபிளில் குறிப்பிடப்பட்ட பாதுகாப்பு வழிமுறைகளை கட்டாயம் பின்பற்ற வேண்டும்.