இருமல் மருந்தால் பறிபோன 12 குழந்தைகளின் உயிர் – எப்படி எச்சரிக்கையாக இருப்பது? சுகாதார அமைச்சகம் வெளியிட்ட ஆலோசனை
Centre Issues Warning: மத்தியப் பிரதேசம் மற்றும் ராஜஸ்தானில் இருமல் மருந்தால் 12 குழந்தைகள் உயிரிழந்துள்ளனர். இந்த நிலையில் இருமல் மருந்து குறித்து எச்சரிக்கையாக இருப்பது மிகவும் அவசியம். இந்த சூழலில், மத்திய சுகாதார அமைச்சகம் ஒரு முக்கிய அறிக்கையை வெளியிட்டுள்ளது.
இருமல் மருந்து (Cough Syrup) உயிர்களைக் கொல்லும் விஷமாக மாறியிருக்கிறது. ஒன்றல்ல, இரண்டல்ல, 12 குழந்தைகளின் மரணம் நாடு முழுவதும் பரபரப்பை ஏற்படுத்தியுள்ளது. இதுவரை, மத்தியப் பிரதேசத்தில் உள்ள சிந்த்வாராவில், பரத்பூர் மற்றும் ராஜஸ்தானில் சிகார் ஆகிய இடங்களில் 12 குழந்தைகள் சிறுநீரக செயலிழப்பால் இறந்துள்ளனர். இந்த இறப்புகளுக்கு காரணம் இருமல் மருந்து என்று கூறப்படுகிறது. இந்த குழந்தைகளின் இறப்புகள் நாடு முழுவதும் செய்திகளில் இடம் பெற்றுள்ளன. இதற்கிடையில், குழந்தைகளுக்கான இருமல் மருந்து குறித்த ஆலோசனையை மத்திய சுகாதார அமைச்சகம் வெளியிட்டுள்ளது. சுகாதார அமைச்சகம் அனைத்து மாநிலங்களுக்கும் ஒரு முக்கியமான ஆலோசனையை வெளியிட்டுள்ளது. இருமல் மருந்துகளை மிகுந்த எச்சரிக்கையுடனும் குறைந்த அளவிலும் கொடுக்க வேண்டும் என்று கூறியுள்ளது. இருமல் மற்றும் சளி உள்ள பெரும்பாலான குழந்தைகள் தாங்களாகவே குணமடைவார்கள் என்று கூறப்பட்டுள்ளது. 2 வயதுக்குட்பட்ட குழந்தைகளுக்கு இருமல் மற்றும் சளி மருந்துகளை கொடுக்கக்கூடாது என்று கூறப்பட்டுள்ளது.
இனி இருமல் பயன்படுத்தும் முன் என்ன செய்ய வேண்டும்?
இந்த மருந்துகள் பொதுவாக 5 வயதுக்குட்பட்ட குழந்தைகளுக்கு வழங்கப்படுவதில்லை என்று கூறப்பட்டுள்ளது. 5 வயதுக்கு மேற்பட்ட குழந்தைகளுக்கு மருத்துவ பரிசோதனைக்குப் பிறகு மருத்துவர் அவசியம் என்று கருதினால் மட்டுமே மருந்துகள் வழங்கப்பட வேண்டும். இது குறைந்த அளவுகளில், குறுகிய காலத்திற்கு மட்டுமே வழங்கப்பட வேண்டும். குழந்தை பராமரிப்பில் போதுமான நீரேற்றம், ஓய்வு, தொடர் கண்காணிப்பு போன்ற நடவடிக்கைகளுக்கு முன்னுரிமை அளிக்கப்பட வேண்டும் என்று அமைச்சகம் பரிந்துரைக்கிறது.
இதையும் படிக்க : ஆறு பேரை வீட்டில் வைத்து தீ வைத்து கொளுத்திய விவசாயி.. மூட நம்பிக்கையின் உச்சத்தில் நடைபெற்ற சம்பவம்?
பாதுகாப்பான மருந்துகளை மட்டுமே கொடுக்க வேண்டும்
அனைத்து மருத்துவமனைகள், மருந்தகங்கள் மற்றும் மருத்துவ மையங்கள் அங்கீகாரம் பெற்ற பாதுகாப்பான மருந்துகள் மட்டுமே வாங்கி குழந்தைகளுக்கு வழங்கப்படுவதை உறுதி செய்ய வேண்டும் என்று அமைச்சகம் கூறியுள்ளது. இந்த ஆலோசனையை அரசு மருத்துவமனைகள், ஆரம்ப சுகாதார நிலையங்கள், மாவட்ட மருத்துவமனைகள் மற்றும் மருத்துவக் கல்லூரிகளுக்கு பரப்புமாறு சுகாதார அமைச்சகம் மாநில மற்றும் மாவட்ட சுகாதார அதிகாரிகளைக் கேட்டுக் கொண்டுள்ளது.
இருமல் மருந்தால் பறிபோன உயிர்
கடந்த இரண்டு வாரங்களில் ராஜஸ்தானில் நடந்த சம்பவங்கள் தாமதமாக வெளிச்சத்திற்கு வந்துள்ளன. செப்டம்பர் 28 , 2025 அன்று, சிகார் மாவட்டத்தைச் சேர்ந்த 5 வயது நிதீஷ் இருமலால் அவதிப்பட்டபோது, அவரது பெற்றோர் அவரை சிரானாவில் உள்ள அரசு மருத்துவமனைக்கு அழைத்துச் சென்றனர். அங்குள்ள மருத்துவர் அவருக்கு சிரப் கொடுத்தார். இரவில் அதைக் குடித்த பிறகு, நிதிஷ் காலையில் எழுந்திருக்கவில்லை. கவலையடைந்த பெற்றோர் அவரை மருத்துவமனைக்கு அழைத்துச் சென்றனர், அங்கு அவர் ஏற்கனவே இறந்துவிட்டதாக மருத்துவர்கள் உறுதிப்படுத்தினர்.
மத்தியப் பிரதேசத்தின் சிந்த்வாரா மாவட்டத்தில், இருமல் மருந்துகளால் பதினைந்து நாட்களில் ஒன்பது குழந்தைகள் சிறுநீரக செயலிழப்பால் இறந்தனர், இது நாடு முழுவதும் பரபரப்பை ஏற்படுத்தியது. கடந்த காலங்களில், காம்பியா மற்றும் உஸ்பெகிஸ்தானில் இந்திய மருந்து நிறுவனங்களால் தயாரிக்கப்பட்ட இருமல் சிரப்களால் குழந்தைகள் இறந்த வழக்குகள் வெளிச்சத்திற்கு வந்துள்ளன. இப்போது, அரசாங்க மருத்துவ திட்டங்களின் கீழ் வழங்கப்படும் அனைத்து மருந்துகளுக்கும் கடுமையான ஆய்வக சோதனைகள் கட்டாயமாக்கப்பட்டுள்ளன. தொடர் குழந்தைகள் இறப்புகளைத் தொடர்ந்து மருந்து தரக் கட்டுப்பாட்டு நடைமுறைகளை மறுபரிசீலனை செய்ய மத்திய அரசு உத்தரவிட்டுள்ளது.
இதையும் படிக்க : விஷவாயு தாக்கி 3 பேர் பலி.. தமிழக தொழிலாளர்களுக்கு கேரளாவில் நடந்த கொடூரம்!
மத்தியப் பிரதேசத்தில் குழந்தைகளின் இறப்புக்குக் காரணமான கோல்ட் ரீஃப் காஃப் சிரப் நிறுவனத்தை மருந்து பாதுகாப்பு அதிகாரிகள் ஆய்வு செய்துள்ளனர். தமிழ்நாட்டின் காஞ்சிபுரம் அருகே உள்ள இந்த நிறுவனத்தில் அதிகாரிகள் சோதனை நடத்தி வருகின்றனர். முழு அறிக்கை கிடைத்த பின்னரே குழந்தைகள் இறப்புக்கான காரணங்கள் தெரியவரும் என்று மத்தியப் பிரதேச துணை முதல்வர் ராஜேந்திர சுக்லா கூறுகிறார்.
