நீர் நோன்பு: எடை குறையுமா? இல்லையெனில் உடலுக்கு ஆபத்தா?

நீர் நோன்பு

சமீப காலங்களில் உடல் எடையை குறைக்கவும், டிடாக்ஸ் பெறவும் “நீர் நோன்பு” என்ற நடைமுறை சமூக வலைதளங்களில் அதிகமாக பரவி வருகிறது. இந்த முறையில் 24 முதல் 72 மணி நேரம் அல்லது அதற்கு மேலாக தண்ணீர் மட்டும் குடித்து, எந்த உணவையும் தவிர்க்க வேண்டும். இது உடனடி எடை குறைப்பை தரும் என்று பலர் நம்புகிறார்கள். ஆனால் மருத்துவ நிபுணர்கள் இதை எச்சரிக்கையுடன் அணுக வேண்டும் என்று கூறுகின்றனர். குறிப்பாக இந்திய மருத்துவர் டாக்டர் அன்ஷுமன் கௌஷல், இந்த நடைமுறை பாதுகாப்பானதா அல்லது உடலுக்கு சேதமா என்று கேள்வி எழுப்பியுள்ளார்.

மருத்துவரின் எச்சரிக்கை – குறுகிய கால லாபம், நீண்ட கால ஆபத்து

மருத்துவரின் விளக்கப்படி, நீர் நோன்பு மூலம் குறுகிய காலத்தில் எடை குறைதல் மற்றும் ரத்த அழுத்தத்தில் சிறிய மாற்றம் காணப்படலாம். ஆனால் இது நீண்ட கால ஆரோக்கிய நன்மைகளை வழங்காது. மருத்துவ கண்காணிப்பின்றி இந்த முறையை செய்வது மிகவும் ஆபத்தானது. சமூக வலைதளங்களில் காணப்படும் தகவல்களை வைத்து தானாக முயற்சி செய்வது தவறு என்றும் அவர் வலியுறுத்துகிறார்.

Red Light – அதிக ஆபத்து உள்ளவர்கள்

டைப் 1 சர்க்கரை நோய் உள்ளவர்கள், உடல் பலவீனமடைந்தவர்கள், குறைந்த ஊட்டச்சத்து கொண்டவர்கள், சமீபத்தில் எடை குறைந்தவர்கள் அல்லது மருந்துகள் எடுத்துக்கொள்வோர் நீர் நோன்பு செய்யக் கூடாது. இவர்கள் இந்த முறையை முயற்சிப்பது விபத்தாக மாறக்கூடும்.

Yellow Light – கவனத்துடன் அணுக வேண்டியவர்கள்

சிலர் குறுகிய கால எடை குறைப்புக்காக இந்த முறையை முயற்சிக்க நினைக்கலாம். ஆனால் முன்னதாக உடல் பரிசோதனை, ரத்த பரிசோதனை மற்றும் மருத்துவர் கண்காணிப்பு அவசியம். நோன்பை முடித்த பிறகு எப்படி உணவு எடுத்துக்கொள்வது என்பது மிகவும் முக்கியம். தவறான “ரீஃபீடிங்” உடலுக்கு தீங்கு விளைவிக்கலாம்.

Green Light – ஆரோக்கியமானவர்களுக்கும் முழு பாதுகாப்பில்லை

ஒருவர் ஆரோக்கியமாக இருந்தாலும், எந்த மருந்துகளும் எடுத்துக்கொள்ளாமல் இருந்தாலும், நீர் நோன்பு முழுமையாக பாதுகாப்பானது அல்ல. இதற்கான காரணம், உடலின் மாற்றங்கள் எப்போதும் கணிக்க முடியாது. எனவே மருத்துவர் ஆலோசனை இல்லாமல் இதை முயற்சிக்க கூடாது.

உடலில் நடக்கும் மாற்றங்கள்

நீர் நோன்பின் முதல் 1 முதல் 3 நாட்களில் உடலில் சேமிக்கப்பட்ட குளைகோஜன் குறைந்து, உடல் எடை திடீரென குறையும். அதன் பிறகு கீட்டோசிஸ் அதிகரித்து, மெதுவாக தசை சிதைவு ஆரம்பமாகும். இதனால் உடலில் நீர் இழப்பு, மினரல் சமநிலை குறைவு போன்ற பிரச்சனைகள் ஏற்படும்.

பாதக விளைவுகள் – கவனிக்க வேண்டியவை

நீர் நோன்பு காரணமாக சோர்வு, தலைவலி, மயக்கம், நீர்ச்சத்து குறைவு போன்றவை ஏற்படலாம். மேலும் யூரிக் அமிலம் அதிகரிப்பு மற்றும் மினரல் சமநிலை பாதிப்பு போன்ற ஆபத்துகளும் உண்டு. மிகவும் ஆபத்தான நிலையாக “ரீஃபீடிங் சிண்ட்ரோம்” ஏற்படலாம். இது இதய துடிப்பு கோளாறு, நரம்பியல் பிரச்சனைகள் போன்ற தீவிர நிலைகளுக்கு வழிவகுக்கும்.