டிஜிட்டல் யுகத்தில் கண்பார்வையை மேம்படுத்த உதவும் எளிய யோகா பயிற்சிகள்!

தொடர் திரை பயன்பாட்டால் ஏற்படும் கண் சோர்வைத் தவிர்க்க முறையான யோகா பயிற்சிகள் அவசியம். கைகளைத் தேய்த்து வெப்பத்தை கண்களுக்கு அளிப்பதன் மூலம் நரம்புகள் புத்துணர்ச்சி பெறுகின்றன. அவ்வப்போது கண்களைச் சிமிட்டுவது விழித்திரை வறண்டு போகாமல் பாதுகாக்கிறது. கண்களைச் சுழற்றும் பயிற்சி தசைகளின் நெகிழ்வுத்தன்மையை அதிகரிக்கிறது. அருகில் மற்றும் தொலைவில் உள்ள பொருட்களை மாறி மாறிப் பார்ப்பது பார்வைத்திறனைச் சீராக்கும். த்ராடகா பயிற்சி மன ஒருமைப்பாட்டையும் கண்களின் ஆற்றலையும் மேம்படுத்துகிறது. இவற்றுடன் சத்தான உணவும் முறையான ஓய்வும் இணைந்தால் மட்டுமே கண்களின் ஆரோக்கியம் முழுமையடையும்.

கண்களின் சோர்வும் இன்றைய வாழ்க்கைமுறையும்

இன்றைய டிஜிட்டல் உலகில், கணினிகள் மற்றும் ஸ்மார்ட்போன்களின் அதீத பயன்பாட்டினால் கண்கள் பெரும் பாதிப்புக்கு உள்ளாகின்றன. அலுவலகப் பணி முதல் இரவு நேர சமூக வலைதளப் பயன்பாடு வரை, நமது கண்களுக்கு ஓய்வு என்பதே கிடைப்பதில்லை. இதனால் கண் வறட்சி, மங்கலான பார்வை மற்றும் அடிக்கடி ஏற்படும் தலைவலி போன்ற பிரச்சனைகள் உருவாகின்றன. பி.ஏ.எம்.எஸ் (BAMS) மருத்துவர் கணேஷ் சவுத்ரி அவர்களின் கூற்றுப்படி, யோகா பயிற்சிகள் கண்பார்வைக் குறைபாட்டை முழுமையாக சரிசெய்யாவிட்டாலும், கண் தசைகளைத் தளர்த்தி, ரத்த ஓட்டத்தை சீராக்கி, டிஜிட்டல் அழுத்தத்தைக் குறைக்க பெரிதும் உதவுகின்றன.

கண் அழுத்தத்தைத் தணிக்கும் எளிய பயிற்சிகள்

கண்களுக்கு உடனடி புத்துணர்ச்சி அளிக்க ‘பாமிங்’ (Palming) முறை சிறந்தது. உள்ளங்கைகளை ஒன்றாகத் தேய்த்து வரும் வெப்பத்தை மூடிய கண்களின் மேல் மென்மையாக வைப்பதன் மூலம் நரம்புகள் அமைதி பெறுகின்றன. அதேபோல், திரைகளைப் பார்க்கும்போது நாம் கண் சிமிட்ட மறக்கிறோம்; எனவே திட்டமிட்டு அவ்வப்போது கண்களைச் சிமிட்டுவது வறட்சியைத் தடுக்கும். மேலும், கண்களைக் கடிகாரச் சுற்றிலும், அதற்கு எதிர்த்திசையிலும் சுழற்றுவது (Chakra Aasan) கண் தசைகளின் இருக்கத்தைத் தளர்த்துகிறது.

ஒருங்கிணைப்பு மற்றும் கவனத்தை மேம்படுத்தும் நுட்பங்கள்

பார்வைத் திறனைத் துல்லியமாக்க ‘போகஸ் ஷிஃப்டிங்’ (Focus Shifting) பயிற்சி அவசியம். கட்டை விரலையும், தூரத்தில் உள்ள ஒரு பொருளையும் மாறி மாறிப் பார்ப்பதன் மூலம் கண்களின் ஒருங்கமைவு மேம்படும். கற்பனையாக ஒரு ‘8’ வடிவத்தை வரைந்து அதைப் பின்தொடர்வதும் சிறந்த பயிற்சியாகும். இறுதியாக, ‘த்ராடகா’ (Trataka) எனப்படும் மெழுகுவர்த்தி ஜோதியைப் பார்க்கும் பயிற்சி, கவனச்சிதறலைக் குறைத்து கண்களின் கட்டுப்பாட்டை அதிகரிக்கிறது.

ஆரோக்கியமான கண்களுக்கான வாழ்வியல் மாற்றங்கள்

வெறும் பயிற்சிகள் மட்டும் போதாது; 20-20-20 விதியைப் பின்பற்றுவது அவசியம் (ஒவ்வொரு 20 நிமிடத்திற்கும், 20 அடி தூரத்தில் உள்ள பொருளை 20 விநாடிகள் பார்க்க வேண்டும்). அத்துடன் போதிய தூக்கம், வைட்டமின்-ஏ நிறைந்த கேரட், கீரை போன்ற உணவுகள் மற்றும் போதுமான நீர்ச்சத்து ஆகியவை கண்களைப் பாதுகாக்கும். இவை கண்ணாடி அணிவதைத் தவிர்க்காவிட்டாலும், கண்களில் ஏற்படும் அசதி மற்றும் அழுத்தத்தை நீக்கி நீண்ட கால ஆரோக்கியத்தை உறுதிப்படுத்தும்.