5 ஆண்டுகளை கடந்தது உடன்பிறப்பு படம்… இயக்குநர் இரா.சரவணன் வெளியிட்ட நெகிழ்ச்சிப் பதிவு!
5 Years Of Udanpirappe Movie | நடிகர் சசிகுமார் மற்றும் நடிகை ஜோதிகா இருவரும் அண்ணன் தங்கையாக நடித்து திரையரங்குகளில் வெளியான படம் உடன்பிறப்பே. இந்தப் படம் திரையரங்குகளில் வெளியாகி இன்றுடன் 5 ஆண்டுகள் நிறைவடைந்த நிலையில் இயக்குநர் ரா.சரவணன் எமோஷ்னல் பதிவை வெளியிட்டுள்ளார்.
தமிழ் சினிமாவில் கிளாசிக் காலம் தொட்டே தொடர்ந்து அண்ணன் தங்கை பாசத்தை மையமாக வைத்து பலப் படங்கள் திரையரங்குகளில் வெளியாகி உள்ளது. அப்படி தமிழ் சினிமாவில் வெளியான அண்ணன் – தங்கை படங்கள் அனைத்தும் ரசிகர்களிடையே மாபெரும் வரவேற்பைப் பெற்று வருவது குறிப்பிடத்தக்கது. அது மட்டும் இன்றி இனிவரும் காலங்களிலும் அந்த மாதிரியான கதைகள் வெளியானாலும் ரசிகர்களிடையே வரவேற்பைப் பெறும் என்பது குறிப்பிடத்தக்கது. அதன்படி தமிழ் சினிமாவில் கடந்த 2021-ம் ஆண்டு அக்டோபர் மாதம் 14-ம் தேதி திரையரங்குகளில் வெளியான படம் உடன்பிறப்பே. இயக்குநர் ரா.சரவணன் எழுதி இயக்கிய இந்தப் படம் ரசிகர்களிடையே விமர்சன ரீதியாக நல்ல வரவேற்பைப் பெற்றது. இந்தப் படம் திரையரங்குகளில் வெளியாகி இன்றுடன் 5 ஆண்டுகளை நிறைவு செய்தது குறிப்பிடத்தக்கது.
இந்தப் படத்தில் நடிகர் சசிக்குமார் மற்றும் ஜோதிகா இருவரும் முன்னணி வேடத்தில் நடித்து உள்ள நிலையில் இவருடன் இணைந்து நடிகர்கள் சமுத்திரக்கனி, சூரி, கலையரசன், சித்தார்த் கே டி, நிவேதிதா சதீஷ், சிஜா ரோஸ், வேல ராமமூர்த்தி, தீபா சங்கர், ஆடுகளம் நரேன், நமோ நாராயணா, ஆர்.வேல்ராஜ், கேரவன் அருணாச்சலம் மற்றும் வேங்கைவாசல் மக்கள் என பலர் இந்தப் படத்தில் நடித்து இருந்தனர்.
5 ஆண்டுகளை கடந்தது உடன்பிறப்பு படம்:
இந்தப் படத்தில் அண்ணன் சசிக்குமார் மற்றும் தங்கை ஜோதிகா இருவரும் ஒருவர் மீது ஒருவர் மிகுந்த பாசத்துடன் இருக்கின்றனர். இவர்கள் திருமணத்திற்கு பிறகு எதிர்பாராத சூழலில் ஜோதிகாவின் மகன் உயிரிழந்துவிடுகிறார். அதற்கு காரணம் சசிகுமார் தான் என்று ஜோதிகாவின் கணவர் சமுத்திரகனி நினைத்து அவரின் குடும்பத்தையே எதிர்க்கிறார். இப்படி இருக்கும் நிலையில் இறுதியில் இந்த இரண்டு குடும்பமும் எப்படி ஒன்று சேர்கிறார்கள் என்பதே படத்தின் கதை. இந்தப் படம் தற்போது 5 ஆண்டுகள் நிறைவடைந்த நிலையில் படத்தின் இயக்குநர் இரா.சரவணன் வெளியிட்ட பதிவு இணையத்தில் வைரலாகி வருகின்றது.
Also Read… Nayanthara: அரசியலுக்கு வருகிறாரா நயன்தாரா? கணவர் விக்னேஷ் சிவன் கொடுத்த விளக்கம்!
இயக்குநர் இரா.சரவணன் வெளியிட்ட பதிவு:
எந்த நேரத்தில் என்ன நடக்கும் என்பதை அரசியலிலும் சினிமாவிலும் கணிக்கவே முடியாது. ‘கத்துக்குட்டி’ பட ரிலீஸ்க்குப் பிறகு கிட்டத்தட்ட ஐந்து வருடங்கள் அலைந்து அல்லாடிய எனக்கு, சூர்யா சாரின் அலுவலகம் திறந்தது அப்படித்தான்.
“மேனேஜர் தங்கதுரை சாரை போய் பாருங்களே…” என்றார் ஒருவர். எல்லா கதவுகளையும் தட்டியாகிவிட்டது. அவர் அலுவலகத்திலும் போய் நின்றேன். நிமிர்ந்தவர், “எவ்வளவு நேரம் கதை சொல்வீங்க?” என்றார். “எவ்வளவு நேரத்துல சார் சொல்லனும்?” என்றேன். “ஐடியா மட்டும் சொல்லுங்க…” என்றார். சொல்லத் தொடங்கினேன். அவர் கட் சொல்லும் வரை கதை போகட்டும் என முக்கால் மணி நேரம் சொன்னேன். அவர் முகத்தில் எந்த ரியாக்ஷனும் இல்லை. கிளம்பு என்பதற்குள் கிளம்பிவிடுவது தான் நாகரிகம். வந்துவிட்டேன்.
அப்போதெல்லாம் கால்நடை காலம்தான்… லக்ஷ்மண் ஸ்ருதி சிக்னலில் ஒரு வாகனம் உரச வந்து, தட்டுத் தடுமாறி மீள்வதற்குள் பெரும் பாடாகிவிட்டது. வீடு நோக்கி நடந்தேன். தலை கிறுகிறுக்க, லேசான மயக்கம் வந்தது. கொஞ்சம் தண்ணீர் குடித்தால் தேவலாம் போலிருந்தது. நம்மையும் மீறி விழுந்து விடுவோமோ எனச் சுதாரித்துச் சாலையின் ஓரத்திற்கு வந்தேன். ஒரு நாளும் உடல்நிலை இந்த நிலைக்கு ஆளானதில்லை.
மனைவிக்கு போன் பண்ண நினைத்தேன். எனக்கு போன் வந்தது. ‘ட்ரீம் வாரியர்ஸ்’ நிறுவனத்தின் எஸ்.ஆர்.பிரகாஷ் சார் அழைத்தார். “சார்…” எனச் சொல்லக்கூடச் சக்தி இல்லை. அதற்காக அவர் காத்திருக்கவும் இல்லை. “சரவணன், அப்படி என்ன கதை சொன்னீங்க? கல்லு மாதிரி இருக்கிற மனுஷன் தங்கதுரை… அவரையே கதற வைச்சிட்டீங்களே…” என்றார். மயக்கமும் தாகமும் இறக்கைகளாக மாறி சட்டென இந்த உடல் பறந்த வேகம் இருக்கிறதே… எங்கிருந்து எனர்ஜி வந்ததோ… “என்ன சார் சொல்றீங்க?” என்றேன். “தங்கதுரை சார் உங்க கதையைக் கொண்டாடிட்டார். நாளைக்கு ஜோதிகா மேடம்கிட்ட நீங்க கதை சொல்றீங்க…” என்றார்.
எப்போது வீடு வந்தேன், எப்படி வந்தேன் என்பதெல்லாம் தெரியாது. இற்று விழுகிற அளவுக்குச் சோர்ந்து கிடந்த இந்த உடல், சில சொற்களில் துள்ளிக் கிளம்பிய மாயம், எனக்கு இன்றைக்கும் ஆச்சர்யம். வாழ்நாள் முழுக்க பிரகாஷ் சாரை நான் மறக்க முடியாததற்குக் காரணம், அன்றைக்கு அவர் ஊற்றியது உயிர்த்தண்ணீர்! பிறகு 2D ராஜா சாரின் கைவண்ணத்தில் சசிகுமார், ஜோதிகா, இமான், வேல்ராஜ், சமுத்திரக்கனி, சூரி எனப் படம் பிரமாண்டமாக மாறியது. திரைக்கு வந்திருந்தால் ‘உடன்பிறப்பே’யின் வெற்றி வேறு விதமாக இருந்திருக்கும். கொரோனா பாதிப்பால் படம் ஓடிடியில் வெளியானது.
‘உடன்பிறப்பே’ ரிலீஸாகி இன்றோடு ஐந்தாவது வருடம்… பாராட்டாக, விமர்சனமாக படம் கலவையான கருத்துகளைப் பெற்றாலும், எத்தனையோ குடும்பங்களை அந்தப் படம் இணைத்து வைத்ததில் எல்லையில்லா மகிழ்ச்சி. இன்றைக்கும் உலகின் ஏதோவொரு மூலையில் இருந்து வருகிற போன், கண்ணீரோடு படம் குறித்துப் பேசும்; உருகும். எப்படியோ என் எண் வாங்கி அண்ணன்களின் அருமையைச் சொல்லிக் கலங்கிய பெண்களும், தங்கைகளை எண்ணி உடைந்த அண்ணன்களும் அதிகம்.
காவல் துறையில் கோலோச்சிய ஜாஃபர் சேட் சார் வீட்டுக்குச் சமீபத்தில் போனேன். எப்போதும் மலர்ந்த புன்னகையும் மரியாதையுமாய் அழைக்கும் அவர் மனைவி அமைதியாக நின்றார். “காரணம் நீங்கதான் சரவணன்… உங்களோட ‘உடன்பிறப்பே’ இப்போதான் டி.வி.யில் ஓடினச்சு. அந்தப் படம் பார்க்கிறப்ப எல்லாம் அவங்க கலங்கிடுவாங்க…” என்றார் சார். “எத்தனை தடவை ‘உடன்பிறப்பே’ பார்த்தாலும் என்னால தாங்க முடியாதுப்பா…” என்றார் மேடம். நெகிழ்ந்து போனேன்.
முன்னணி சினிமாகாரர் ஒருவர் சொன்னதுதான் முத்தாய்ப்பு: “என் சித்தப்பா மகள் கோவக்காரி. குடும்ப சண்டையில முறைச்சுக்கிட்டு பேச மாட்டா. கல்யாணத்துக்குக்கூட கூப்பிடலை. பத்து வருசத்துக்கும் மேல ஆகிடுச்சு. திடீர்னு அவகிட்ட இருந்து போன். தேம்பித் தேம்பி அழுவுறா… எந்தச் சாமி கண் திறந்தச்சோன்னு பேசி முடிச்சேன். அப்புறம்தான் சித்தி சொன்னாங்க… ‘உடன்பிறப்பே’ படம் பார்த்துட்டுத்தான் போன் பேசினான்னு… ஒரு படம் இதைவிட வேறென்ன சரவணன் பண்ணனும்?” என்றார்.
இன்று ‘உடன்பிறப்பே’யின் ஐந்தாவது வருடம் என்பதை என் மனைவி கலாவிடம் சொன்னேன். எந்தப் பதிலும் சொல்லாமல் சமையற்கட்டுக்குள் நுழைந்தார்.
“படம் எடுக்கிறது முக்கியம் இல்ல… அந்த மாதிரி வாழனும். அப்புடி எந்தம்பி என்ன தப்பு பண்ணிட்டான்? வருசக்கணக்குல அவன்கிட்ட பேசாம இருக்குறவரு, படத்துல மட்டும் எல்லா உறவுகளும் ஒண்ணா இருக்கனும்னு போதனை பண்ணுவாராம்?” எனக்கும் சேர்த்துப் பாத்திரங்கள் அடி வாங்கின.
#Udanpirappe #உடன்பிறப்பே @SasikumarDir
— இரா.சரவணன் (@erasaravanan) October 14, 2026
Also Read… மலையாள சினிமாவில் இந்த ட்ரைவிங் லைசன்ஸ் படத்தை பார்த்து இருக்கீங்களா? மிஸ் செய்யாதீர்கள்!
