IPL 2026: சின்னசாமி ஸ்டேடியத்தில் ஐபிஎல் போட்டிகள்.. மார்ச் 15 முதல் பயிற்சி.. ஆர்சிபி அணிக்கு 6 நிபந்தனைகள்!

சின்னசாமி ஸ்டேடியம்

ஐபிஎல் 2026 சீசனுக்கான (IPL 2026) அட்டவணை இன்னும் வெளியிடப்படவில்லை. இருப்பினும், சாம்பியன் பட்டத்தை வெல்ல வேண்டும் என்ற காரணத்திற்காக அனைத்து அணிகளும் பயிற்சி முகாம்களை தொடங்கியுள்ளன. இந்தநிலையில், நடப்பு சாம்பியனான ராயல் சேலஞ்சர்ஸ் பெங்களூரு அணி (RCB) 2026 ஐபிஎல் சீசனில் 5 போட்டிகள் பெங்களூருவில் உள்ள எம்.சின்னசாமி ஸ்டேடியத்தில் விளையாடும் என அதிகாரப்பூர்வமாக தெரிவித்துள்ளது. கடந்த 2025ம் ஆண்டு ஜூன் 4ம் தேதி ராயல் சேலஞ்சர்ஸ் பெங்களூரு அணி தனது முதல் ஐபிஎல் பட்டத்தை வென்று, எம்.சின்னசாமி ஸ்டேடியத்தில் கொண்டாடியபோது நிர்வாக குறைபாட்டால் ஸ்டேடியத்திற்கு வெளியே ஏற்பட்ட கூட்ட நெரிசலில் 11 பேர் உயிரிழந்தனர். இதன்பிறகு, இந்த ஸ்டேடியத்தில் எந்தவொரு உள்நாட்டு மற்றும் சர்வதேச போட்டிகள் நடத்தப்படவில்லை. தற்போது ராயல் சேலஞ்சர்ஸ் பெங்களூரு ரசிகர்களுக்கு நல்ல செய்தி கிடைத்துள்ளது.

ஆர்சிபி நிர்வாகம் கூறியது என்ன..?

இதுகுறித்து ஆர்சிபி வெளியிட்ட தகவலின்படி, ”ஐபிஎல் போட்டிகளை பெங்களூருவில் நடத்துவதை உறுதி செய்வதற்காக சம்பந்தப்பட்ட அதிகாரிகளுடன் பல மாதங்களாக பேசி அனுமதி வாங்கியுள்ளோம். மீதமுள்ள ராயல் சேலஞ்சர்ஸ் பெங்களூரு போட்டிகளில் முந்தைய அறிவிப்பின்படி, ராய்ப்பூரில் உள்ள ஷாஹீத் வீர் நாராயண் சிங் சர்வதேச கிரிக்கெட் ஸ்டேடியத்தில் நடைபெறும். பெங்களூரில் போட்டிகளை நடத்துவதற்கு உதவுவதில் உறுதியான வழிகாட்டுதல், ஒத்துழைப்பு மற்றும் ஆதரவை வழங்கிய கர்நாடக அரசு, கர்நாடக மாநில கிரிக்கெட் சங்கம் மற்றும் கர்நாடக காவல்துறைக்கு ஆர்சிபி தனது மனமார்ந்த நன்றியைத் தெரிவித்துக் கொள்கிறது. ஐபிஎல் சீசனுக்கான நேரத்தில் உள்கட்டமைப்பு மற்றும் பாதுகாப்பு நடவடிக்கைகளை மேம்படுத்துவதற்கான கூட்டு முயற்சிகள், நடப்பு சாம்பியனான ராயல் சேலஞ்சர்ஸ் பெங்களூரு தங்கள் சொந்த ஸ்டேடியத்தில் சில போட்டிகள் விளையாடுவதை உறுதி செய்துள்ளன.” என்று தெரிவித்தது.

ஐபிஎல் போட்டியை நடத்துவதற்கு கர்நாடக அரசாங்கம் விதித்த 6 நிபந்தனைகள்

• கர்நாடக மாநில கிரிக்கெட் சங்கத்திடமிருந்து அவ்வப்போது அப்டேட் பெறுதல்.
• மைதானத்தில் உண்மையான செயல்படுத்தலை மதிப்பாய்வு செய்தல்.
• நிர்ணயிக்கப்பட்ட அல்லது திருத்தப்பட்டபடி கூட்டத் திறனைக் கட்டுப்படுத்துதல்.
• தேவைப்பட்டால் மேலும் பாதுகாப்பு நடவடிக்கைகளை எடுக்க KSCA க்கு வழிகாட்டுதல்களை வழங்குதல்.
• உத்தரவுகளை மீறினால் அனுமதி ரத்து செய்யப்படும்.
• கட்டம் 2 மற்றும் கட்டம் 3 இல் மேற்கொள்ளப்பட்ட நடுத்தர மற்றும் நீண்ட காலப் பணிகளின் தொடர்ச்சியைக் கண்காணித்தல்.

5 போட்டிகள்:

ஐபிஎல் 2026 சீசனில் சின்னசாமி ஸ்டேடியத்தில் 5 லீக் போட்டிகளை ராயல் சேலஞ்சர்ஸ் பெங்களூரு அணி விளையாடும். இதில் 2026 ஐபிஎல் தொடக்க போட்டியும் அடங்கும் என்பது குறிப்பிடத்தக்கது. நடப்பு சாம்பியன் என்ற அந்தஸ்தை தக்க வைத்துகொள்ள பயிற்சிக்கான நடப்பு ஐபிஎல் சாம்பியனான ராயல் சேலஞ்சர்ஸ் பெங்களூரு (ஆர்சிபி) அணி மார்ச் 15 ஆம் தேதி எம் சின்னசாமி மைதானத்தில் கூடும் என்று கர்நாடக மாநில கிரிக்கெட் சங்கம் (கேஎஸ்சிஏ) உறுதிப்படுத்தியுள்ளது, மைதான பாதுகாப்பை மேம்படுத்தும் பணிகள் தொடர்ந்து நடைபெற்று வருகின்றன.