ஜூன் மாதம் ஓடிடியில் வெளியாகும் டூரிஸ்ட் ஃபேமிலி… அப்டேட் இதோ

டூரிஸ்ட் ஃபேமிலி

தமிழ் சினிமாவில் மே மாதம் 1-ம் தேதி 2025-ம் ஆண்டு திரையரங்குகளில் வெளியான படம் டூரிஸ்ட் ஃபேமிலி (Tourist Family). கொரோனா காலத்தில் ஏற்பட்ட பொருளாதார சிக்கல் காரணமாக வறுமையில் இருக்கும் குடும்பம் இலங்கையில் இருந்து தமிழ் நாட்டிற்கு கடல் வழியாக வருகிறார்கள். ராமேஸ்வரம் வந்தடையும் அவர்கள் சென்னையில் குடும்பமாக தங்களது வாழ்க்கையை தொடங்குகிறார்கள். அவர்கள் வாழும் குடியிருப்பு பகுதியில் உள்ளவர்களுடன் அவர்கள் பழகும் விதம் அங்கு இருப்பவர்களுக்கு மிகவும் பிடித்துப்போக அடுத்தடுத்து என்ன நடக்கிறது என்பதே படத்தின் கதை. இந்தப் படம் தமிழ் சினிமாவில் கொண்டாடப்படும் ஃபீல் குட் படமாக அமைந்தது. இந்தப் படத்தை பார்த்த ரசிகர்களும் பிரபலங்களும் கொண்டாடித் தீர்த்தனர். சூப்பர் ஸ்டார் ரஜினிகாந்த் முதல் சிவகார்த்திகேயன் வரை இந்தப் படத்தை வெகுவாகப் பாராட்டினர்.

இந்த டூரிஸ்ட் ஃபேமிலி படத்தை அறிமுக இயக்குநர் அபிஷன் ஜீவிந்த் இயக்கி இருந்தார். மேலும் படத்தில் நடிகர் சசிகுமார் நாயகனாக நடித்து இருந்தார். முன்னதாக இவரது நடிப்பில் வெளியான அயோத்தி படத்தை ரசிகர்கள் கொண்டாடித் தீர்த்தனர். ஆனால் அந்தப் படத்தை விட இது இன்னும் அதிக வெற்றியை சசிகுமாருக்கு கொடுத்தது குறிப்பிடத்தக்கது.

ரசிகர்கள் கொண்டாடும் டூரிஸ்ட் ஃபேமிலி படம்:

மேலும் நடிகர் சசிகுமாருக்கு ஜோடியாக நடிகை சிம்ரன் இந்தப் படத்தில் நாயகியாக நடித்துள்ளார். இவர்களுடன் இணைந்து யோகி பாபு, மிதுன் ஜெய் சங்கர், ரமேஷ் திலம், காமேஷ், எம்.எஸ்.பாஸ்கர், பக்ஸ் என பலர் இந்தப் படத்தில் முக்கிய கதாப்பாத்திரத்தில் நடித்துள்ளது குறிப்பிடத்தக்கது.

பிரபல தயாரிப்பு நிறுவனமான மில்லியன் டாலர் ஸ்டூடியோஸ் நிறுவனம் இந்த டூரிஸ்ட் ஃபேமிலி படத்தை தயாரித்துள்ளது. ஃபீல் குட் படங்களை தயாரிப்பதில் தமிழ் சினிமாவில் முன்னணி வகிக்கும் இந்த நிறுவனம் தற்போது மற்றும் ஒரு ஃபீல் குட் படத்தை ரசிகர்களுக்கு அளித்துள்ளதை ரசிகர்கள் கொண்டாடி வருகின்றனர்.

ஜியோ ஹாட்ஸ்டார் வெளியிட்ட எக்ஸ் தள பதிவு:

படம் திரையரங்குகளில் வெற்றிகரமாக ஓடிக் கொண்டிருக்கும் இந்த நிலையில் படத்தின் ஓடிடி வெளியீடு குறித்த அறிவிப்பை படக்குழு வெளியிட்டுள்ளது. அதன்படி படம் ஜியோ ஹாட்ஸ்டாரில் வெளியாகும் என்று முன்னதாக அறிவித்து இருந்த நிலையில் தற்போது படம் வருகின்ற ஜூன் மாதம் 2-ம் தேதி ஓடிடியில் வெளியாகும் என்று அறிவிப்பு வெளியாகியுள்ளது. இது ரசிகர்களிடையே மகிழ்ச்சியை ஏற்படுத்தியுள்ளது.