அடுத்த 5 நாட்களுக்கு ஈரான் மீது தாக்குதல் நடத்தப்படாது – அதிபர் டிரம்ப் அதிரடி அறிவிப்பு..

அதிபர் டிரம்ப்

மார்ச் 23, 2026: ஈரான் மீது அடுத்த ஐந்து நாட்களுக்கு தாக்குதல் நடத்தப்படாது என அதிபர் டொனால்ட் டிரம்ப் அறிவித்துள்ளார். ஈரானுடன் நடைபெற்ற பேச்சுவார்த்தைகள் ஆக்கப்பூர்வமாக இருந்ததாகவும், அந்த நாட்டின் மின்சாரம் மற்றும் எரிசக்தி கட்டமைப்புகள் மீது அடுத்த ஐந்து நாட்களுக்கு எந்த தாக்குதலும் நடத்தப்படாது எனவும் அவர் தெரிவித்துள்ளார்.  ஈரான் அணுசக்தி ஒப்பந்தத்தில் கையெழுத்திட மறுப்பதாக கூறி, அந்த நாட்டின் மீது அமெரிக்கா மற்றும் இஸ்ரேல் கடந்த மாதம் 28ஆம் தேதி முதல் தாக்குதல் நடத்தி வருகின்றன. இந்த தாக்குதல்களில், ஈரானின் உச்ச தலைவர் ஆயத்துல்லா அலி கமேனி உள்ளிட்ட முக்கிய தலைவர்கள் கொல்லப்பட்டதாக கூறப்படுகிறது. இது உலகளவில் பெரும் அதிர்வலைகளை ஏற்படுத்தியது.

ஈரான் மீது அமெரிக்கா, இஸ்ரேல் தாக்குதல்:

இதற்கு பதிலடியாக, ஈரான் அமெரிக்கா மற்றும் இஸ்ரேலுக்கு எதிராக கடுமையான நடவடிக்கை எடுக்கப்படும் என எச்சரித்தது. அதன் ஒரு பகுதியாக, உலகின் மிக முக்கியமான கடல் வர்த்தக பாதையான ஹோர்முஸ் கடல்சந்தியை ஈரான் மூடியது.

இந்த கடல்சந்தி வழியாக உலகளவில் பெரும்பாலான கச்சா எண்ணெய் ஏற்றுமதி நடைபெறுவதால், இதன் மூடல் பல்வேறு பக்கவிளைவுகளை ஏற்படுத்தியது:

• உலகளவில் கச்சா எண்ணெய் தட்டுப்பாடு ஏற்பட்டது
• ஒரு பேரல் கச்சா எண்ணெய் விலை கடுமையாக உயர்ந்தது,  1000 டாலரைத் தாண்டி விற்பனை செய்யப்பட்டதாக தகவல்கள் வெளியானது
• உலகளாவிய பொருளாதாரத்தில் அதிர்வு ஏற்பட்டது

மேலும், வளைகுடா நாடுகள் மீது ஈரான் ஏவுகணை தாக்குதல்கள் நடத்தியதாகவும் கூறப்படுகிறது. இதனால் மத்திய கிழக்கு பகுதியில் பதற்றம் அதிகரித்தது.

கடுமையான எரிவாயு தட்டுப்பாடு:

ஹோர்முஸ் கடல்சந்தி மூடப்பட்டதன் எதிரொலியாக, இந்தியாவிலும் எரிவாயு தட்டுப்பாடு ஏற்பட்டது. இதனால் பொருளாதார அழுத்தம் அதிகரித்தது. இந்த சூழலில், 48 மணி நேரத்தில் அந்த கடல்சந்தியை திறக்க வேண்டும், இல்லையெனில் ஈரானின் மின்சார கட்டமைப்புகள் மீது தாக்குதல் நடத்தப்படும் என டொனால்ட் டிரம்ப் எச்சரித்திருந்தார்.

அடுத்த 5 நாட்களுக்கு தாக்குதல் நடத்தப்படாது:

இந்த நிலையில், திடீர் திருப்பமாக, ஈரான் மீது அடுத்த ஐந்து நாட்களுக்கு தாக்குதல் நடத்தப்படாது என டிரம்ப் அறிவித்துள்ளார். ஈரானுடன் நடைபெற்ற பேச்சுவார்த்தைகள் நல்ல முன்னேற்றம் அடைந்துள்ளதாகவும் அவர் குறிப்பிட்டுள்ளார். இதனால் இந்த நிலைமை ஒரு முக்கிய திருப்புமுனையாக பார்க்கப்படுகிறது.

இந்த அறிவிப்பின் பின்னர்:

• அமெரிக்க டாலர் மதிப்பு சரிந்தது
• பங்குச் சந்தைகள் உயர்ந்தன
• கச்சா எண்ணெய் விலை குறையத் தொடங்கியது

மொத்தத்தில், அமெரிக்கா – ஈரான் மோதலில் தற்காலிக தளர்வு ஏற்பட்டுள்ள நிலையில், அடுத்த சில நாட்களில் நடைபெறும் பேச்சுவார்த்தைகளே இந்த பிரச்சினையின் எதிர்காலத்தை தீர்மானிக்கும் முக்கிய காரணியாக இருக்கும்.