கனமழையால் தத்தளிக்கும் இலங்கை… கொழும்பு விமான நிலையத்தில் சிக்கிய 150 தமிழர்கள் – உணவு, குடிநீர் இல்லாமல் தவிப்பு

இலங்கையில் சிக்கி தவிக்கும் தமிழர்கள்

இலங்கையை தித்வா (Ditwah) புயலால் இலங்கை மக்களின் வாழ்வாதாரம் பெரிதும் பாதிப்புக்குள்ளாகியுள்ளது. இதுவரை அங்கு வெள்ளம் மற்றும் நிலச்சரிவு காரணமாக 123 பேர் உயிரிழந்துள்ளனர்.  மேலும், கடந்த இரண்டு நாட்களாக கொடூரமாக தாக்கி வரும் கனமழை மற்றும் புயலின் தாக்கம் காரணமாக விமான சேவைகள் முற்றிலும் பாதிக்கப்பட்டது. இந்த நிலையில் இலங்கையில் (Sri Lanka) இருந்து நாடு திரும்ப முடியாமல் மொத்தம் 300க்கும் மேற்பட்ட இந்தியர்கள், அதில் 150க்கும் மேற்பட்ட தமிழர்கள், கொழும்பு சர்வதேச விமான நிலையத்தில் சிக்கியிருக்கின்றனர். அவர்கள் போதிய உணவு குடி நீர் என அடிப்படை வசதி கூட இல்லாமல் தவித்து வருகின்றனர். இதனால் மக்கள் தங்கள் அதிருப்தியை தெரிவித்து வருகின்றனர்.

கொழும்பு விமான நிலையத்தில் சிக்கி தவிக்கும் 300 இந்தியர்கள்

இலங்கையில் கடந்த 2 நாட்களாக பெய்து வரும் கனமழையின் காரணமாக விமான சேவை முற்றிலும் பாதிக்கப்பட்டது. இந்த நிலையில் துபாயில் இருந்து விமானம் மூலம் இந்திய பயணிகள் 300 பேர், இலங்கையில் உள்ள மத்தளை விமான நிலையம் வந்தனர். அங்கிருந்து அவர் சென்னை உள்ளிட்ட நகரங்களுக்கு செல்ல திட்டமிட்டனர்.

இதையும் படிக்க : இலங்கையில் ருத்ரதாண்டவம் ஆடிய ‘தித்வா புயல்’.. பலியானோர் எண்ணிக்கை 123 ஆக உயர்வு.. 130 பேர் மாயம்!!

ஆனால் புயலின் தாக்கம் காரணமாக மத்தளை விமான நிலையத்தில் இருந்து விமான சேவை ரத்து செய்யப்பட்டது. இதனையடுத்து பயணிகள் உடனடியாக கொழும்பு விமான நிலையத்துக்கு மாற்றப்பட்டனர். ஆனால் அங்கும் கனமழை காரணமாக விமான சேவைகள் ரத்து செய்யப்பட்டதால் பயணிகள் விமான நிலையத்திலேயே தங்கும் நிலை ஏற்பட்டது.

உணவு இல்லாமல் பயணிகள் அவதி

இந்த நிலையில் பயணிகள் அங்கு உணவு மற்றும் குடிநீர் உள்ளிட்ட அடிப்படை வசதிகள் கூட இல்லாமல் தவிப்பதாக குற்றச்சாட்டு எழுந்துள்ளது. மேலும், அவர்களிடம் இந்திய ரூபாய், குவைத் கரன்சி மட்டுமே இருந்ததால், விமான நிலையத்திலுள்ள கடைகளில் உணவு வாங்க முடியாமல் பரிதவித்ததாக கூறப்படுகிறது. இந்த நிலையில் விமான நிலையத்தில் நிறைய முதியோர்கள் மற்றும் நோயாளிகள் இருப்பதாகவும் உணவு இல்லாமல் மயக்கமடையும் நிலையில் இருப்பதாகவும் எனவே தங்களுக்கு உடனடியாக தங்களுக்கு அடிப்படை வசதிகள் செய்து தருமாறு கோரிக்கை விடுத்து வருகின்றனர்.

இதையும் படிக்க : இலங்கையில் இடைவிடாது கொட்டித் தீர்க்கும் கனமழை.. விமானங்களை இந்தியாவுக்கு திருப்பிவிட முடிவு!

இலங்கையில் தித்வா புயல் காரணமாக கடந்த 2 நாட்களாக கனமழை பெய்து வருகிறது.  அங்கு வெள்ளம் மற்றும் நிலச்சரிவு காரணமாக  123 பேர் இதுவரை உயிரிழந்துள்ளனர். மேலும் 130 பேரை காணவில்லை எனவும் அவர்களை மீட்கும் பணிகளில் பேரிடர் மீட்பு குழுவினர் ஈடுபட்டு வருகின்றனர். இதனால் அங்கு அவசர நிலை பிரகடனப்படுத்தப்பட்டுள்ளது.