Nitish Kumar Reddy: இந்திய அணியில் அடுத்தடுத்து காயம்.. இங்கிலாந்து டெஸ்டில் இருந்து நிதிஷ் குமார் ரெட்டி விலகலா..?

நிதிஷ் குமார் ரெட்டி

இங்கிலாந்துக்கு எதிரான டெஸ்ட் தொடரில் (India – England Test Series) இந்திய அணி வீரர்களுக்கு அடுத்தடுத்து காயம் ஏற்பட்டு வருகிறது. மான்செஸ்டரில் நடைபெறும் டெஸ்ட் தொடரின் நான்காவது போட்டிக்கு முன்னதாக, இந்திய அணியில் உள்ள வீரர்களின் காயங்களின் எண்ணிக்கை வேகமாக அதிகரித்து வருகிறது. வேகப்பந்து வீச்சாளர்கள் அர்ஷ்தீப் சிங் மற்றும் ஆகாஷ் தீப் (Akash Deep) ஆகியோருக்கு காயங்கள் ஏற்பட்டது தெரிந்த ஒன்றே. இப்போது இளம் ஆல்ரவுண்டர் நிதிஷ் குமார் ரெட்டியின் (Nitish Kumar Reddy) பெயரும் இந்தப் பட்டியலில் சேர்க்கப்பட்டுள்ளது. காயம் காரணமாக தொடரின் மீதமுள்ள இரண்டு போட்டிகளில் இருந்து ரெட்டி விலகியுள்ளார் என்று தகவல்கள் வெளியாகியுள்ளது.

ALSO READ: அன்ஷுல் கம்போஜை அழைத்த இந்திய அணி.. நாடு திரும்பும் அர்ஷ்தீப் சிங்! காரணம் என்ன..?

நிதிஷ் குமார் ரெட்டிக்கு காயம்:

இந்தியாவுக்கும் இங்கிலாந்துக்கும் இடையிலான டெஸ்ட் தொடரின் நான்காவது போட்டியானது வருகின்ற 2025 ஜூலை 23ம் தேதி மான்செஸ்டரில் தொடங்க திட்டமிடப்பட்டுள்ளது. இதற்காக, இந்திய அணி தொடர்ந்து பயிற்சியில் ஈடுபட்டுள்ளது. ஆனால் இந்தப் பயிற்சியிலிருந்து, ரெட்டியின் காயம் என்ற மோசமான செய்தியை இந்திய அணி பெற்றுள்ளது. ஊடக அறிக்கையின்படி, போட்டிக்கு 3 நாட்களுக்கு முன்பு, நேற்று அதாவது 2025 ஜூலை 20ம் தேதி ஜிம்மில் பயிற்சி மேற்கொண்டபோது நிதிஷ் குமார் ரெட்டிக்கு முழங்கால் காயம் ஏற்பட்டது. இதன் பிறகு, அவருக்கு உடனடியாக ஸ்கேன் செய்யப்பட்டது. இதில் தசைநார் காயம் ஏற்பட்டதாக கூறப்படுகிறது.

விலகும் நிதிஷ் குமார் ரெட்டி:

நிதிஷ் குமார் ரெட்டியின் காயம் எவ்வளவு கடுமையானது. அவர் எவ்வளவு காலம் களத்தில் இருந்து விலகி இருப்பார் என்பது வரும் நாட்களில் மட்டுமே தெரியும். இருப்பினும், இந்திய கிரிக்கெட் கட்டுப்பாட்டு வாரியம் ரெட்டியின் காயத்தை இன்னும் அதிகாரப்பூர்வமாக அறிவிக்கவில்லை. எனவே அவருக்குப் பதிலாக யாராவது அனுப்பப்படுவார்களா இல்லையா என்பது தெளிவாகத் தெரியவில்லை.

ALSO READ: அடுத்த 3 உலக டெஸ்ட் சாம்பியன்ஷிப் இறுதிப்போட்டியும் இங்கேதான்.. இடத்தை குறித்த ஐசிசி!

அர்ஷ்தீப்-ஆகாஷ் காயம்:

அர்ஷ்தீப் சிங்-ஆகாஷ் தீப் காயம் காரணமாக இந்திய அணியில் பிரச்சனைகள் அதிகரித்துள்ளது.  அதேநேரத்தில், நிதிஷ் குமார் ரெட்டியின் காயம், தொடரில் பின்தங்கியிருக்கும் இந்திய அணிக்கு கூடுதல் அழுத்தத்தை ஏற்படுத்தியுள்ளது, ஏற்கனவே காயங்களால் அவதிப்பட்டு வருகிறது. ஏற்கனவே ஆகாஷ் தீப் (முதுகுவலி) மற்றும் இடது கை வேகப்பந்து வீச்சாளர் அர்ஷ்தீப் (கையில் காயம்) ஆகியோர் காயம் காரணமாக நான்காவது டெஸ்டில் இருந்து கிட்டத்தட்ட விலகிவிட்டனர். இதன் காரணமாக, தேர்வாளர்கள் இளம் வேகப்பந்து வீச்சாளர் அன்ஷுல் காம்போஜை அணியில் சேர்த்துள்ளனர். ரெட்டிக்கு பதிலாக, ஆல்ரவுண்டராக ஷர்துல் தாக்கூரை தேர்வு செய்ய அணிக்கு வாய்ப்பு உள்ளது.