பொருளாதார ஆய்வு 2025–26: எளிய வரி அமைப்பு, விரைந்த தீர்வு நடைமுறை அவசியம்..
தொடர்ச்சியான வளர்ச்சிக்காக நீண்டகால மூலதன சந்தைகளை வலுப்படுத்த வேண்டும் என ஆய்வு வலியுறுத்தியுள்ளது. 2026–27 நிதியாண்டில் இந்திய பொருளாதாரம் 6.8 முதல் 7.2 சதவீதம் வரை வளர்ச்சி காணும் என்றும், நடுத்தர கால வளர்ச்சி திறன் 7 சதவீதத்திற்கு அருகில் இருக்கும் என்றும் கணிக்கப்பட்டுள்ளது.
பொருளாதார ஆய்வு 2025–26, எளிய வரி அமைப்புகள், காலக்கெடு நிர்ணயிக்கப்பட்ட சர்ச்சை தீர்வு நடைமுறை மற்றும் தொழில்நுட்ப குற்றங்களின் குற்றவியல் நீக்கம் ஆகியவை முதலீட்டு நிச்சயத்தன்மையை உருவாக்கி, மூலதன இயக்கத்தை மேம்படுத்த அவசியம் என வலியுறுத்தியுள்ளது. நாடாளுமன்றத்தில் தாக்கல் செய்யப்பட்ட இந்த ஆய்வில், நடு நூற்றாண்டுக்குள் “விக்சித் பாரத்” என்ற இலக்கை அடைய, நிதியை வெறும் செலவினமாக அல்லாமல், பொருளாதார மாற்றத்திற்கான கட்டமைப்பாக மறுபரிசீலனை செய்ய வேண்டும் என கூறப்பட்டுள்ளது.
‘விக்சித் பாரத்’ இலக்கை அடைய நிதி மறுபரிசீலனை:
“ஒரு நாடு அதிகம் செலவிடுவதால் அல்ல; உற்பத்தி அடித்தளத்தை விரிவுபடுத்துவதன் மூலமே வளர்ச்சி அடைகிறது. நிறுவனங்கள் முதலீடு செய்து வளர, குடும்பங்கள் பாதுகாப்பாக வருமானம் ஈட்டிச் சேமிக்க, சந்தைகள் மூலதனத்தை திறம்பட வழிநடத்த வேண்டியது அவசியம்,” என ஆய்வு குறிப்பிடுகிறது. இதற்காக, தொழில்முனைவோருக்கு ஆதரவான வரி அமைப்பு, போட்டியை ஊக்குவிக்கும் ஒழுங்குபடுத்துநர்கள், ஆழமான நிதிச் சந்தைகள் மற்றும் வெளிப்படையான நிர்வாக அமைப்புகள் தேவை என வலியுறுத்தப்பட்டுள்ளது.
Also Read: இந்தியாவிலும் சமூக வலைத்தளங்களை பார்க்க வயது கட்டுப்பாடு.. ஆய்வறிக்கையில் தகவல்
நிச்சயத்தன்மை மற்றும் முன்னறிவிக்கக்கூடிய சூழல் உருவாக, எளிமையான சேவைமுக வரி அமைப்பு, நேரம் கட்டுப்படுத்தப்பட்ட நியாயமான சர்ச்சை தீர்வு முறை, தொழில்நுட்ப குற்றங்களின் குற்றவியல் நீக்கம் அவசியம் என ஆய்வு தெரிவித்துள்ளது. வங்கிகளை மட்டும் சார்ந்திராமல், விரிவான மூலதன சந்தைகள் மற்றும் நவீன நிதி கட்டமைப்புகள் உருவாக்கப்பட வேண்டும் என்றும் கூறப்பட்டுள்ளது.
நீண்டகால நிதி சந்தைகள் அவசியம்:
தொடர்ச்சியான வளர்ச்சிக்காக நீண்டகால மூலதன சந்தைகளை வலுப்படுத்த வேண்டும் என ஆய்வு வலியுறுத்தியுள்ளது. 2026–27 நிதியாண்டில் இந்திய பொருளாதாரம் 6.8 முதல் 7.2 சதவீதம் வரை வளர்ச்சி காணும் என்றும், நடுத்தர கால வளர்ச்சி திறன் 7 சதவீதத்திற்கு அருகில் இருக்கும் என்றும் கணிக்கப்பட்டுள்ளது.
நிறுவன கடன் பத்திர சந்தை குறைந்த அளவிலும், உயர்தர நிறுவனங்களின் ஆதிக்கத்திலும் உள்ளதாகவும், நகராட்சி பத்திரங்கள் மற்றும் பத்திரமயமாக்கல் (securitisation) முறைகள் போதிய அளவில் வளரவில்லை என்றும் ஆய்வு சுட்டிக்காட்டியுள்ளது. இதை சரிசெய்ய, கடன் கருவிகளுக்கான வரி சீரமைப்பு, குறைந்த தர நிறுவனங்களுக்கு கடன் ஆதரவு அமைப்புகள், நகராட்சி நிதி திறன் மேம்பாடு உள்ளிட்ட ஆறு அம்ச திட்டத்தை பரிந்துரைத்துள்ளது.
உயர் மூலதனச் செலவு:
இந்தியாவின் உயர்ந்த மூலதனச் செலவு, தனியார் முதலீட்டுக்கும் நீண்டகால வளர்ச்சிக்கும் தடையாக இருப்பதாக ஆய்வு தெரிவித்துள்ளது. 1995–2025 காலகட்டத்தில் இந்தியாவின் சராசரி நீண்டகால வட்டி விகிதம் 7.61% ஆக இருந்தது. இருப்பினும், பிற வளர்ந்து வரும் நாடுகளை விட இது சிறந்த நிலையில் உள்ளது.
மூலதனச் செலவைக் குறைக்க, நிதி சீர்திருத்தங்களுடன் சேர்த்து உற்பத்தி, ஏற்றுமதி, உள்கட்டமைப்பு, ஆராய்ச்சி மற்றும் உலகளாவிய மதிப்பு சங்கிலிகளில் இந்தியாவின் பங்கேற்பை வலுப்படுத்த வேண்டும் என ஆய்வு தெரிவித்துள்ளது.
