‘ஆபரேஷன் சிந்தூர்’க்கு முழு ஆதரவு – தமிழக முதலமைச்சர் ஸ்டாலின் அறிவிப்பு
India's Operation Sindoor: இந்திய ராணுவம் பாகிஸ்தானில் உள்ள பயங்கரவாத முகாம்கள் மீது 'ஆபரேஷன் சிந்தூர்' என்ற பெயரில் வான்வழி தாக்குதல் நடத்தியது. பஹல்காம் தாக்குதலுக்கு இது பதிலடியாகும். தமிழ்நாட்டில், சென்னை துறைமுகம் மற்றும் கல்பாக்கம் அணுமின் நிலையத்தில் போர்க்கால ஒத்திகை நடைபெற்றது. ஐ.டி. நிறுவனங்களுக்கு விடுமுறை அளிக்கப்பட்டது. தமிழக அரசு மற்றும் அரசியல் தலைவர்கள் இந்த நடவடிக்கையை வரவேற்றுள்ளனர்.
சென்னை மே 07: இந்திய ராணுவம் (Indian Army) ‘ஆபரேஷன் சிந்தூர்’ (Operation Sindoor) என்ற பெயரில் பாகிஸ்தான் மற்றும் ஆக்கிரமிப்பு காஷ்மீர் பகுதிகளில் உள்ள 9 பயங்கரவாத முகாம்கள் மீது வான்வழி தாக்குதல் நடத்தியுள்ளது. இது, பஹல்காம் பகுதியில் 2025 ஏப்ரல் 22-ஆம் தேதி நடைபெற்ற பயங்கரவாத தாக்குதலுக்கு பதிலடி அளிக்கும் நடவடிக்கையாகும். இதைத் தொடர்ந்து நாடு முழுவதும் 259 இடங்களில் போர்க்கால ஒத்திகை நடைபெறுகிறது. தமிழ்நாட்டில் 2025 மே 7 இன்று மாலை 4 மணிக்கு சென்னை துறைமுகம் மற்றும் கல்பாக்கம் அணுமின் நிலையத்தில் இந்த ஒத்திகை நடைபெறுகிறது. இதையொட்டி, ஐ.டி. நிறுவனங்களுக்கு விடுமுறை அளிக்கப்பட்டுள்ள நிலையில், பொதுமக்கள் அச்சம் கொள்ளத் தேவையில்லை என்று அரசு அறிவுறுத்தியுள்ளது. தமிழகம் இந்திய ராணுவத்துடன் உறுதியாக துணைநிற்கும் என்று முதல்வர் மு.க. ஸ்டாலின் (Chief Minister M.K. Stalin) தெரிவித்துள்ளதுடன், இப்பயிற்சியை எடப்பாடி பழனிசாமியும் வரவேற்றுள்ளார்.
பாகிஸ்தானுக்கு எதிராக இந்தியாவின் நடவடிக்கைகள் தீவிரம்
பஹல்காம் பகுதியில் பாகிஸ்தான் ஆதரவு பயங்கரவாத இயக்கம் நடத்திய பயங்கரத் தாக்குதலுக்கு பதிலடி அளிக்கும் வகையில், இந்தியா பலதரப்பட்ட பாதுகாப்பு நடவடிக்கைகளை மேற்கொண்டு வருகிறது.
இந்திய ராணுவம் கடந்த 2025 ஏப்ரல் 22-ம் தேதி நிகழ்ந்த தாக்குதலுக்குப் பின்னர், ‘ஆபரேஷன் சிந்தூர்’ என்ற பெயரில் பாகிஸ்தான் மற்றும் பாகிஸ்தான் ஆக்கிரமிப்பு காஷ்மீர் பகுதிகளில் பயங்கரவாத முகாம்களை குறிவைத்து வான்வழி தாக்குதல் நடத்தியது. இதில் 9 பயங்கரவாத முகாம்கள் அழிக்கப்பட்டதாக பாதுகாப்புத் துறை தெரிவித்துள்ளது.
நாடு முழுவதும் போர்க்கால ஒத்திகை
இந்த நிலையை முன்னிட்டு, நாடு முழுவதும் 259 இடங்களில் போர்க்கால ஒத்திகை நடைபெறுகிறது. சில வடமாநிலங்களில் இந்த பயிற்சி ஏற்கனவே துவங்கிவிட்டது. மத்திய உள்துறை அமைச்சகம் வெளியிட்ட அறிவுறுத்தலின்படி, தமிழ்நாட்டிலும் இன்று (2025 மே 7) மாலை 4 மணிக்கு, சென்னை துறைமுகம் மற்றும் கல்பாக்கம் அணுமின் நிலையத்தில் இந்த பாதுகாப்பு ஒத்திகை நடத்தப்படுகிறது. அரசு, இந்த பயிற்சி குறித்து பொதுமக்கள் அச்சமோ பதற்றமோ கொள்ள தேவையில்லை என்று தெரிவித்துள்ளது.
ஐ.டி. நிறுவனங்களுக்கு விடுமுறை அறிவிப்பு
பாதுகாப்பு ஒத்திகையையொட்டி, சென்னையில் இயங்கி வரும் ஐ.டி. நிறுவனங்களுக்கு 2025 மே 7 இன்று விடுமுறை அறிவிக்கப்பட்டுள்ளது. இன்ஃபோசிஸ் உள்ளிட்ட நிறுவனங்கள், பணியாளர்கள் இன்று அலுவலகம் வரத் தேவையில்லை என்று தெரிவித்துள்ளன.
இந்திய ராணுவத்துக்கு தமிழ்நாடு துணை நிற்கும்- முதலமைச்சர்
Tamil Nadu stands with the Indian Army against terrorism. With our Army, for our nation. Tamil Nadu stands resolute.#OperationSindoor
— M.K.Stalin (@mkstalin) May 7, 2025
தமிழக அரசியல் தலைவர்கள் கருத்து
இந்த நடவடிக்கையை வரவேற்கும் விதமாக, தமிழக முதல்வர் மு.க.ஸ்டாலின் வெளியிட்டுள்ள கருத்தில், “பயங்கரவாதத்துக்கு எதிராக இந்திய ராணுவம் மேற்கொள்ளும் நடவடிக்கையில், தமிழகம் உறுதியாக துணை நிற்கிறது” என்று தெரிவித்துள்ளார்.
அதிமுக பொதுச் செயலாளரும் எதிர்க்கட்சி தலைவருமான எடப்பாடி கே. பழனிசாமி, “பாகிஸ்தான் மற்றும் ஆக்கிரமிப்பு காஷ்மீர் பகுதிகளில் பயங்கரவாத முகாம்களை அழித்த ‘ஆபரேஷன் சிந்தூர்’ திட்டத்தை துல்லியமாக செயல்படுத்தியதற்காக இந்திய ராணுவத்தை பாராட்டுகிறேன்” என குறிப்பிட்டுள்ளார்.
