விடுமுறை நாட்களில் வகுப்புகள் எடுக்கக்கூடாது.. மீறினால் கடும் நடவடிக்கை – பள்ளிக்கல்வித் துறை..

கோப்பு புகைப்படம்

சென்னை, செப்டம்பர் 26, 2025: தமிழகத்தில் காலாண்டுத் தேர்வுகள் முடிந்த நிலையில் மாணவர்களுக்கு விடுமுறை அளிக்கப்பட்டுள்ளது. இந்த விடுமுறை நாட்களில் சிறப்பு வகுப்புகள் நடத்தக் கூடாது; மீறினால் கடும் நடவடிக்கை எடுக்கப்படும் என பள்ளிக்கல்வித் துறை இயக்குநர் எச்சரிக்கை விடுத்துள்ளார். பொதுவாக விடுமுறை நாட்களில் சில தனியார் பள்ளிகளில் மாணவர்களுக்கு சிறப்பு வகுப்புகள் நடத்தப்படும். பள்ளிக்கல்வித் துறையின் உத்தரவையும் மீறி இந்த வகுப்புகள் நடைபெறுவதாக இருந்தால், மாணவர்களின் மனநலத்திற்கு பாதிப்பு ஏற்படும் எனக் குறிப்பிடப்பட்டுள்ளது. மாணவர்களின் நலனை கருத்தில் கொண்டு இந்த விடுமுறை நாட்கள் வழங்கப்பட்டுள்ளன. எனவே, பள்ளிக்கல்வித் துறை இயக்குநர் தனியார் பள்ளிகளுக்கு இந்த சுற்றறிக்கையை அனுப்பியுள்ளார்.

சிறப்பு வகுப்புகள் கூடாது – பள்ளிக்கல்வித்துறை:

இதில், உயர்நீதிமன்றம் மாணவர்களுக்கு விடுமுறை நாட்களில் ஓய்வு மற்றும் மனஅழுத்தமின்மை அவசியம் என்று கருதி, சிறப்பு வகுப்புகள் நடத்துவதற்கு தடை விதித்துள்ளது. காலாண்டு விடுமுறை என்பது மாணவர்கள் புத்துணர்ச்சி பெறவும், பாடத்திட்டத்துக்கு அப்பாற்பட்ட தங்கள் ஆர்வங்களை வளர்க்கவும் உதவும் நேரமாகும். ஆனால், சில தனியார் பள்ளிகள் இந்த விடுமுறை நாட்களில் கூடுதல் பயிற்சி வகுப்புகள் அல்லது சிறப்பு வகுப்புகள் நடத்துவதாக புகார்கள் எழுந்தன. இதன் காரணமாக நீதிமன்றம் தலையிட்டு தடை உத்தரவு பிறப்பித்தது.

மேலும் படிக்க: உங்கள் ITR Refund கோரிக்கை நிராகரிக்கப்பட்டு விட்டதா?.. அப்போ உடனே இத பண்ணுங்க!

பள்ளிக்கல்வித் துறை இயக்குநரின் சுற்றறிக்கையில், இந்த நீதிமன்ற உத்தரவை மீறும் பள்ளிகளுக்கு கடுமையான நடவடிக்கை எடுக்கப்படும் என எச்சரிக்கப்பட்டுள்ளது. இதில், பள்ளிகளின் அங்கீகாரத்தை ரத்து செய்வது உள்ளிட்ட தண்டனைகளும் அடங்கும்.

புகாரின் அடிப்படையில் கடும் நடவடிக்கை எடுக்கப்படும் என எச்சரிக்கை:

பெற்றோர்கள் மற்றும் மாணவர்களிடமிருந்து வரும் புகார்களை உடனடியாக விசாரித்து, தவறு செய்யும் பள்ளிகளை அடையாளம் காண மாவட்டக் கல்வி அதிகாரிகளுக்கு உத்தரவிடப்பட்டுள்ளது. எந்த உத்தரவும் மாணவர்களின் நலனை முதன்மையாகக் கொண்டே வழங்கப்படும் என்பதையும், கல்வி முறையில் சமநிலையை உறுதி செய்யும் முயற்சியாக இதை பார்க்கப்படுவதாகவும் குறிப்பிடப்பட்டுள்ளது.

மேலும் படிக்க: இறந்த 45 தெருநாய்களில் 25 நாய்களுக்கு ரேபிஸ் தொற்று உறுதி.. கோயம்புத்தூரில் அதிர்ச்சி!

பெற்றோர்களும் மாணவர்களும் இந்த விடுமுறையை பயனுள்ள வகையில் பயன்படுத்த ஊக்குவிக்கப்படுகின்றனர். தனியார் பள்ளிகள் இந்த சுற்றறிக்கையை பின்பற்றி, நீதிமன்ற உத்தரவுக்கு இணங்க வேண்டும் என வலியுறுத்தப்பட்டுள்ளது.