தமிழக ஆளுநர் ஆர்.என். ரவி முன்வைத்த கோரிக்கை.. ராஜ் பவன் இனி மக்கள் பவன் என அழைக்கப்படும்..

கோப்பு புகைப்படம்

நவம்பர், 30, 2025: நாட்டில் இருக்கும் அனைத்து மாநிலங்களிலும் ஆளுநர்கள் வசிக்கும் இடம் ‘ராஜ்பவன்’ என அழைக்கப்படுகிறது. ஆனால் மத்திய அரசின் அறிவுறுத்தலின்படி இந்த ‘ராஜ்பவன்’ என்பதின் பெயர் மாற்றப்பட்டுள்ளது. இனி மாநிலங்களில் உள்ள ராஜ்பவன் ‘மக்கள் பவன்’ எனவும், யூனியன் பிரதேசங்களில் உள்ள துணை ஆளுநர்களின் மாளிகைகள் ‘லோக் நிவாஸ்’ எனவும் அழைக்கப்படும் என தெரிவிக்கப்பட்டுள்ளது. இந்திய குடியரசுத் தலைவர் திரௌபதி முர்மு தலைமையில், ஆளுநர்களின் மாநாடு 2024 ஆம் ஆண்டு டெல்லியில் உள்ள ராஷ்டிரபதி பவனில் நடைபெற்றது. இதில் துணை ஜனாதிபதியாக இருந்த ஜக்தீப் தங்கர், பிரதமர் நரேந்திர மோடி, உள்துறை அமைச்சர், பல்வேறு மாநிலங்களின் ஆளுநர்கள், யூனியன் பிரதேசங்களின் துணை ஆளுநர்கள் உள்ளிட்ட பலரும் கலந்து கொண்டனர்.

தமிழக ஆளுநர் ஆர்.என்.ரவியின் கோரிக்கை:

இந்தக் கூட்டத்தில் தமிழ்நாடு ஆளுநர் ஆர். என். ரவி ஒரு முக்கிய கோரிக்கையை முன்வைத்தார். அப்போது பேசிய அவர், “ஆளுநர்கள் வசிக்கும் மாளிகையே ‘ராஜ்பவன்’ என்று குறிப்பிடுவது, ராஜாக்களை குறிக்கும் போல் உள்ளது. நாம் மக்கள் மீது ஆட்சி செய்ய வந்தவர்கள் அல்ல; மக்களுக்கு சேவை செய்ய வந்த ஜனநாயகப் பொறுப்பாளர்கள். எனவே ‘ராஜ்பவன்’ என்ற பெயரை ‘மக்கள் பவன்’ என மாற்ற வேண்டும்” என்று கோரிக்கை வைத்தார்.

மேலும் படிக்க: SIR கணக்கீட்டு படிவங்களை சமர்ப்பிக்க அவகாசம் நீட்டிப்பு: தேர்தல் ஆணையம் அறிவிப்பு

ராஜ் பவன் பெயர் மாற்றம்:

இந்த சூழலில், தமிழக ஆளுநர் ஆர். என். ரவி முன்வைத்த கோரிக்கையை மத்திய உள்துறை அமைச்சகம் ஏற்றுக்கொண்டு, ‘ராஜ்பவன்’ என்றிருந்த ஆளுநர் மாளிகையின் பெயரை ‘மக்கள் பவன்’ என மாற்ற ஒப்புதல் வழங்கியது. அதே சமயத்தில், யூனியன் பிரதேசங்களில் உள்ள துணை ஆளுநர் மாளிகைகள் ‘லோக் நிவாஸ்’ என மாற்றப்படும் என அறிவிக்கப்பட்டுள்ளது. இந்த விதிமுறை நாடு முழுவதும் அமல்படுத்தப்படும் என மத்திய அரசு தெரிவித்துள்ளது.

மேலும் படிக்க: ‘இனி RTO அலுவலகம் செல்ல வேண்டாம்’.. தமிழகம் முழுவதும் நாளை முதல் அமலுக்கு வருகிறது!!

கடந்த ஆண்டு நடந்த ஆளுநர்கள் மாநாட்டில் கவர்னர் ரவி முன்வைத்த கோரிக்கையின் பேரில் இந்த பெயர் மாற்றம் தற்போது அமலுக்கு வந்துள்ளது. இதனை வரவேற்கிறோம் என தமிழக அரசு தெரிவித்துள்ளது. இதனைத் தொடர்ந்து தமிழகத்திலேயே அல்லாமல், கேரளா, அஸ்ஸாம், மேற்குவங்கம் உள்ளிட்ட பல்வேறு மாநிலங்களில் உள்ள ராஜ்பவன்களின் பெயரும் அதிகாரப்பூர்வமாக மாற்றப்பட்டுள்ளது. இது ஆளுநர் மாளிகைகளில் ஏற்பட்டுள்ள ஒரு குறிப்பிடத்தக்க மாற்றமாக கருதப்படுகிறது.