IPL 2027: மீண்டும் மும்பை கேப்டனாக ரோஹித் சர்மா? ஹர்திக் பாண்ட்யா நிலைமை என்ன?
Rohit Sharma Captaincy: ஐபிஎல் 2027 சீசனில் ரோஹித் சர்மா மீண்டும் மும்பை இந்தியன்ஸ் கேப்டனாகத் திரும்ப வாய்ப்புள்ளதாகத் தகவல். ஹர்திக் பாண்ட்யா தலைமையில் அணி எதிர்பார்த்த செயல்படாததே காரணம். ரோஹித் சர்மா தலைமையில் மும்பை அணி 5 முறை கோப்பை வென்றுள்ளது. ஹர்திக் பாண்ட்யா மற்ற அணிகளுடன் பேச்சுவார்த்தை நடத்துவதாகவும் கூறப்படுகிறது.
வரவிருக்கும் ஐபிஎல் 2027 சீசனில் (IPL 2027) ரோஹித் சர்மா மீண்டும் மும்பை இந்தியன்ஸ் அணியை வழிநடத்த வாய்ப்புள்ளதாக தகவல் வெளியாகியுள்ளது. ரோஹித் சர்மா தலைமையில், மும்பை இந்தியன்ஸ் அணி ஐபிஎல் வரலாற்றில் இதுவரை 5 முறை சாம்பியன் பட்டத்தை வென்றுள்ளது. ரோஹித் சர்மா (Rohit Sharma) 2013 முதல் 2023 வரை அணியை வழிநடத்தினார். அதனைத் தொடர்ந்து நடந்த 3 ஐபிஎல் சீசன்களில் ஹர்திக் பாண்ட்யா மும்பை அணிக்குத் தலைமை தாங்கினார். ஆனால், ஹர்திக் பாண்ட்யா தலைமையிலான மும்பை இந்தியன்ஸ் அணி, 2024, 2025 மற்றும் 2026 ஐபிஎல் சீசன்களில் எதிர்பார்த்த அளவிற்கு சிறப்பாக செயல்படவில்லை.
ALSO READ: யுவராஜின் புதிய அத்தியாயம்.. டெல்லி கேப்பிடல்ஸ் அணியின் பேட்டிங் பயிற்சியாளராக நியமனம்!
மீண்டும் மும்பை கேப்டனாக ரோஹித் சர்மா:
கிடைத்த தகவலின்படி, ரோஹித் சர்மா மீண்டும் கேப்டனாகத் திரும்பலாம். தற்போது, ரோஹித் மீண்டும் கேப்டன் ஆவது குறித்து எந்த அதிகாரப்பூர்வ தகவலும் இல்லை. இருப்பினும், மும்பையின் முடிவு என்னவாக இருக்கும் என்பதைப் பொறுத்திருந்துதான் பார்க்க வேண்டும். ரோஹித் சர்மாவுக்கு மீண்டும் கேப்டன் பதவி வழங்கப்பட்டால், தற்போதைய கேப்டன் ஹர்திக் பாண்ட்யாவின் நிலைமை என்னவாகும் என்ற கேள்வியும் எழுகிறது. இந்தநிலையில், ஹர்திக் பாண்ட்யா தற்போது மற்ற அணிகளுடன் பேச்சுவார்த்தை நடத்தி வருவதாகவும் தகவல்கள் தெரிவிக்கின்றன.
ஐபிஎல்-லில் மிகவும் வெற்றிகரமான கேப்டன் ரோஹித் சர்மா:
ஐபிஎல் வரலாற்றில் மிகவும் வெற்றிகரமான கேப்டன் ரோஹித் சர்மா ஆவார். ரோஹித் சர்மா தலைமையில் மும்பை அணி 5 பட்டங்களை வென்றுள்ளது, அதேபோல், எம்.எஸ். தோனி தலைமையில் சென்னை சூப்பர் கிங்ஸ் அணியும் 5 பட்டங்களை வென்றுள்ளது.
ரோஹித் தலைமையில் ஆண்டுவாரியாக மும்பை இந்தியன்ஸ் பெற்ற பட்டங்கள்:
- ஐபிஎல்-2013
- ஐபிஎல்-2015
- ஐபிஎல்-2017
- ஐபிஎல்-2019
- ஐபிஎல்-2020
ரோஹித் சர்மாவின் ஐபிஎல் வாழ்க்கை:
ரோஹித் சர்மா தனது ஐபிஎல் வாழ்க்கையில் இதுவரை 281 போட்டிகளில் விளையாடியுள்ளார். இந்தப் போட்டிகளில் 276 இன்னிங்ஸ்களில் பேட்டிங் செய்து, 29.91 சராசரி மற்றும் 132.91 ஸ்டிரைக் ரேட்டுடன் 7329 ரன்கள் எடுத்துள்ளார். இதில், ரோஹித் 2 சதங்கள் மற்றும் 49 அரை சதங்களை அடித்துள்ளார். மேலும், அவரது அதிகபட்ச ஸ்கோர் 109 நாட் அவுட் ஆகும். ரோஹித் 32 போட்டிகளில் பந்துவீசி 15 விக்கெட்டுகளையும் கைப்பற்றியுள்ளார்.
ALSO READ: ரோஹித், கோலிக்கு ரெஸ்ட்? இந்திய கேப்டன் கில் சொன்ன விஷயம் இதுதான்!
இந்தியாவில் ஐபிஎல் 2027 மினி ஏலம்:
இந்திய கிரிக்கெட் கட்டுப்பாட்டு வாரியம் (பிசிசிஐ), இந்த ஆண்டுக்கான ஐபிஎல் ஏலத்தை இந்தியாவில் நடத்த முடிவு செய்துள்ளது. ஐபிஎல் நிர்வாகக் குழுவின் கூட்டத்தில் இந்த முடிவு எடுக்கப்பட்டது. இம்முறை ஏலம் ஒரு ‘மினி-ஏலமாக’ இருக்கும். இருப்பினும், இந்த நிகழ்விற்காகத் தேர்ந்தெடுக்கப்படும் இந்திய நகரம் இன்னும் முடிவு செய்யப்படவில்லை என்று கிரிக்பஸ் அறிக்கை தெரிவித்தது. கடந்த சில ஆண்டுகளாக ஐபிஎல் ஏலம் தொடர்ந்து வெளிநாடுகளில் நடத்தப்பட்டு வருகிறது. 2023-ல், ஏலம் கொச்சியில் நடைபெற இருந்த நிலையில் வெளிநாட்டிற்கு மாற்றப்பட்டது. அதன் பிறகு, துபாய், ஜெட்டா மற்றும் அபுதாபி போன்ற நகரங்களில் ஐபிஎல் ஏலங்கள் நடத்தப்பட்டு வருகின்றன. இருப்பினும், 2027 மினி-ஏலத்திற்காக, இந்த போக்கை மாற்ற பிசிசிஐ முடிவு செய்துள்ளது.
