ரெட் அலர்ட்: பால், மருந்துகளை முன்கூட்டியே வாங்கி வையுங்கள்: அமைச்சர் செங்கோட்டையன் அறிவுறுத்தல்
Tamil Nadu Heavy Rain Alert : சென்னை எழிலகத்தில் செய்தியாளர்களைச் சந்தித்த அமைச்சர் செங்கோட்டையன், மழைக் கால முன்னெச்சரிக்கை தொடர்பாகப் பொதுமக்களுக்குப் பல்வேறு அறிவுறுத்தல்களை வழங்கினார். குறிப்பாக மழைநீர் தேங்கியுள்ள பகுதிகளுக்குப் பொதுமக்கள் யாரும் செல்ல வேண்டாம் என்றும், குழந்தைகளுக்கான பால், முதியவர்களுக்கான மருந்துகள் போன்றவற்றை முன்கூட்டியே வாங்கி வைத்துக்கொள்ள வேண்டும் என்றும் அவர் கேட்டுக்கொண்டார்.
சென்னை, அக்டோபர் 18 : சென்னைக்கு அதிகனமழைக்கான ரெட் அலர்ட் விடுக்கப்பட்டுள்ள நிலையில், குழந்தைகளுக்குத் தேவையான பால், முதியவர்களுக்குத் தேவையான மருந்துகள் உள்ளிட்ட அத்தியாவசியப் பொருள்களை முன்கூட்டியே வாங்கி வைத்துக்கொள்ளுமாறு பேரிடர் மேலாண்மைத் துறை அமைச்சர் செங்கோட்டையன் (Minister Sengottaiyan) பொதுமக்களை அறிவுறுத்தியுள்ளார்.
சென்னைக்கு ரெட் அலர்ட்
தென்மேற்குப் பருவமழை எதிர்பார்த்த அளவுக்குக் கைகொடுக்காத நிலையில், வடகிழக்குப் பருவமழை தமிழகத்தில் பரவலாகப் பெய்யத் தொடங்கியுள்ளது. கடந்த 2 நாட்களாக மாநிலத்தின் பெரும்பாலான இடங்களில் மழை பெய்து வருகிறது. சென்னையில் அக்டோபர் 17, 2026 நேற்று மாலை தொடங்கிய கனமழை, பல மணி நேரம் இடைவிடாமல் கொட்டித் தீர்த்தது. குறிப்பாக சென்னையில் 6 இடங்களில் அதிகனமழை பதிவானது.
இதையும் படிக்க : சென்னையில் கனமழை எதிரொலி.. அமைச்சர்கள் உடனே திரும்ப முதலமைச்சர் விஜய் அதிரடி உத்தரவு!
இந்நிலையில், சென்னையில் அக்டோபர் 18, 2026 இன்றும் அதி கனமழை பெய்யக்கூடும் என வானிலை ஆய்வு மையம் ரெட் அலர்ட் விடுத்துள்ளது. மேலும் திருவள்ளூர், செங்கல்பட்டு, நீலகிரி, கோவை, தேனி ஆகிய ஐந்து மாவட்டங்களில் மிக கனமழைக்கு வாய்ப்புள்ளதாகவும் தெரிவிக்கப்பட்டுள்ளது.
முன்னெச்சரிக்கை நடவடிக்கையாக, அரக்கோணத்தில் உள்ள தேசியப் பேரிடர் மீட்புப் படை தளத்திலிருந்து 3 மீட்புக் குழுக்கள் அக்டோபர் 18, 2026 இன்று சென்னைக்கு அனுப்பி வைக்கப்பட்டுள்ளன. ஒவ்வொரு குழுவிலும் தலா 30 வீரர்கள் என மொத்தம் 90 பேர் இதில் இடம்பெற்றுள்ளனர். இவர்களில் ஒரு குழுவினர் ஏற்கெனவே வேளச்சேரியில் படகுகள், உயிர்காக்கும் உபகரணங்களுடன் முகாமிட்டுள்ளனர்.
அமைச்சர் செங்கோட்டையன் அறிவுறுத்தல்
சென்னை எழிலகத்தில் செய்தியாளர்களைச் சந்தித்த அமைச்சர் செங்கோட்டையன், மழைக் கால முன்னெச்சரிக்கை தொடர்பாகப் பொதுமக்களுக்குப் பல்வேறு அறிவுறுத்தல்களை வழங்கினார். மழைநீர் தேங்கியுள்ள பகுதிகளுக்குப் பொதுமக்கள் யாரும் செல்ல வேண்டாம் என்றும், குழந்தைகளுக்கான பால், முதியவர்களுக்கான மருந்துகள் போன்றவற்றை முன்கூட்டியே வாங்கி வைத்துக்கொள்ள வேண்டும் என்றும் அவர் கேட்டுக்கொண்டார்.
மேலும் பேசிய அவர், சென்னையில் பெய்த அதிகனமழையால் இதுவரை எந்த உயிர்ச்சேதமும் ஏற்படவில்லை. 31 செ.மீ. மழை பெய்தபோதும் மழைநீர் தேங்கவில்லை. எனினும், அக்டோபர் 17, 2026 நேற்றிரவு பெய்த மழையால் நகரின் சில முக்கியச் சாலைகளிலும் தாழ்வான பகுதிகளிலும் மழைநீர் தேங்கியதாகவும், அதனை அகற்றும் பணியில் மாநகராட்சி ஊழியர்கள் ஈடுபட்டதாகவும் தகவல்கள் வெளியாகியிருந்தன. முந்தைய ஆண்டுகளின் வெள்ளக் காட்சிகளைச் சமூக வலைதளங்களில் பரப்பி, பொதுமக்களை அச்சத்தில் ஆழ்த்த வேண்டாம் என்றும் அமைச்சர் வேண்டுகோள் விடுத்தார்.
இதையும் படிக்க : நள்ளிரவில் களமிறங்கிய மாநகராட்சி அதிகாரிகள்.. 273 இடங்களில் தேங்கிய மழைநீர் அகற்றம்!
மாநிலம் முழுவதும் உள்ள மாவட்ட ஆட்சியர்களுக்கு முன்னெச்சரிக்கை அறிவுறுத்தல்கள் வழங்கப்பட்டுள்ளது, மழை தொடர்பான மீட்பு மற்றும் நிவாரணப் பணிகளில் 1.40 லட்சம் பேர் ஈடுபடுத்தப்பட்டுள்ளனர். அரசு அலுவலர்கள், தன்னார்வ அமைப்புகள், பொதுமக்கள் என அனைவரும் இணைந்து பணியாற்றும் வகையில் ஏற்பாடுகள் செய்யப்பட்டுள்ளன. என்றும் அவர் தெரிவித்தார்.
