குதிரை பேரத்தில் ஈடுபடும் த.வெ.க அரசு.. 18ஆம் தேதி அதிமுக கண்டன ஆர்ப்பாட்டம்..

ஜூலை 13, 2026: குதிரைப் பேரத்தை ஊக்குவிப்பதாக குற்றம்சாட்டப்படும் தமிழக வெற்றிக் கழக அரசைக் கண்டித்து, திருச்சி மாவட்ட அதிமுக சார்பில் வருகிற ஜூலை 18ஆம் தேதி கண்டன ஆர்ப்பாட்டம் நடைபெற உள்ளதாக அதிமுக தலைமை தெரிவித்துள்ளது. பெண்களுக்கு பாதுகாப்பு இல்லாத சூழ்நிலை, போதைப்பொருட்களின் தங்குதடையற்ற புழக்கம், சட்டம்-ஒழுங்கு பாதிக்கப்பட்ட நிலை உள்ளிட்ட பல்வேறு பிரச்சினைகளால், கடந்த திமுக ஆட்சியில் மக்கள் சுதந்திரமாக வாழ முடியாமல் பரிதவித்தனர்.

த.வெ.க அரசுக்கு கண்டனம் – எடப்பாடி பழனிசாமி:

இந்நிலையில், நிறைவேற்ற முடியாத பல்வேறு வாக்குறுதிகளை அளித்து ஆட்சியில் அமர்ந்துள்ள தற்போதைய தமிழக வெற்றிக் கழக அரசு, கடந்த ஆட்சியின் தொடர்ச்சியாகவே செயல்பட்டு வருகிறது என்பதற்கு பல்வேறு உதாரணங்களைச் சொல்லலாம். அண்மையில், திருச்சி புறநகர் கிழக்கு மாவட்டம், லால்குடி தொகுதிக்கு உட்பட்ட புள்ளம்பாடி ஒன்றியத்தின் சிறுகளப்பூர் பகுதியில், ஒரு பெண் பாலியல் வன்கொடுமைக்கு ஆளாக்கப்பட்டு சடலமாக மீட்கப்பட்டார். இந்த விவகாரத்தில் தமிழக வெற்றிக் கழக அரசு துரித நடவடிக்கை எடுக்கவில்லை என அப்பகுதி மக்கள் தங்களது ஆதங்கத்தை வெளிப்படுத்துகின்றனர்.

அதேபோல், போதைப்பொருட்களின் புழக்கத்தை கட்டுப்படுத்துவதில் போதிய அக்கறை காட்டப்படவில்லை என்றும் மக்கள் குற்றம்சாட்டுகின்றனர். இச்செயல் ஆட்சியாளர்களின் அலட்சியத்தையும் மெத்தனப் போக்கையும் வெளிப்படுத்துகிறது. இதற்கு எனது கண்டனத்தைத் தெரிவித்துக்கொள்கிறேன்.

பெண்கள் பாதுகாப்பு, குதிரை பேரம் – அதிமுக ஆர்ப்பாட்டம்:

இந்நிலையில், பெண்களின் பாதுகாப்பில் போதிய அக்கறை செலுத்தாதது, போதைப்பொருட்களின் புழக்கத்தை முற்றிலும் கட்டுப்படுத்தத் தவறியது, குதிரைப் பேரத்தை ஊக்குவிப்பது ஆகியவற்றைக் கண்டித்து, அனைத்திந்திய அண்ணா திராவிட முன்னேற்றக் கழகத்தின் திருச்சி புறநகர் கிழக்கு மாவட்டம் சார்பில், 18.07.2026, சனிக்கிழமை காலை 10.00 மணியளவில், புள்ளம்பாடி அண்ணா திடலில் மாபெரும் கண்டன ஆர்ப்பாட்டம் நடைபெறும்.

மேலும் படிக்க: நடிக்க வாய்ப்பு தருவதாக ஆசை வார்த்தை.. நடிகையை ஆபாச படம் எடுக்க முயன்ற கும்பல் சிக்கியது.. சென்னையில் சம்பவம்!

இந்தக் கண்டன ஆர்ப்பாட்டம், கழக மகளிர் அணிச் செயலாளரும், கழக செய்தித் தொடர்பாளரும், முன்னாள் அமைச்சருமான திருமதி பா. வளர்மதி தலைமையிலும், திருச்சி புறநகர் கிழக்கு மாவட்டக் கழகச் செயலாளர் திரு. டி.என். சிவக்குமார் முன்னிலையிலும் நடைபெறும்.

பெண்கள் நலனையும், மக்கள் நலனையும் முன்னிறுத்தி நடைபெற உள்ள இந்தக் கண்டன ஆர்ப்பாட்டத்தில், அனைத்துத் தரப்பு மக்களும் பெருந்திரளாகக் கலந்துகொள்ளுமாறு அன்புடன் கேட்டுக்கொள்கிறேன்” என அதிமுக பொதுச்செயலாளர் எடப்பாடி பழனிசாமி தெரிவித்துள்ளார்.