இந்திய அணியின் அதிர்ச்சித் தோல்வியும்.. சர்ச்சையான அணித் தேர்வும்.. விமர்சனத்திற்கு ஆளான கம்பீர், சூர்யகுமார்!!

IND vs SA இந்திய அணியின் அதிர்ச்சித் தோல்வி

டி20 உலகக்கோப்பை 2026ல் (T20 World Cup 2026) அகமதாபாத்தில் நேற்று (பிப்.23) நடைபெற்ற தென்னாப்பிரிக்காவிற்கு எதிரான போட்டியில், முதல் பந்து வீசப்படுவதற்கு முன்பே இந்திய அணியின் பிளேயிங் 11 பெரும் வியப்பை ஏற்படுத்தியது. ‘சூப்பர் 8’ சுற்றின் மிக முக்கியமான இந்தப் போட்டியில், அணியின் துணை கேப்டனான அக்சர் படேல் மீண்டும் அணியில் சேர்க்கப்படாதது வியப்பை ஏற்படுத்தியது. அவருக்குப் பதிலாக வாஷிங்டன் சுந்தர் அணியில் நீடித்தார். இந்த சர்ச்சைக்குரிய முடிவை எடுத்த தலைமை பயிற்சியாளர் கௌதம் கம்பீர் மற்றும் கேப்டன் சூர்யகுமார் யாதவ் ஆகியோர் தற்போது கடுமையான விமர்சனத்திற்கு உள்ளாகியுள்ளனர்.

இதையும் படிக்க: விராட் கோலி இருந்திருந்தால்.. தென்னாப்பிரிக்காவிடம் தோற்ற பிறகு இந்திய ரசிகர்கள் புலம்பல்!

துணை கேப்டனுக்கு இடமில்லையா?

அக்சர் படேல் வெறும் ஒரு வீரர் மட்டுமல்ல, அவர் அணியின் துணை கேப்டன். தென்னாப்பிரிக்காவிற்கு எதிராக, குறிப்பாக ஒரு உலகக்கோப்பை இறுதிப்போட்டியில் 5வது வரிசையில் இறங்கி பேட்டிங்கில் அசத்தியவர். அப்படிப்பட்ட ஒரு வீரரை, வலைப்பயிற்சியில் தீவிரமாகப் பங்கேற்றும் கூட, தொடர்ந்து இரண்டாவது முறையாக வெளியில் அமர வைத்தது ரசிகர்கள் மத்தியில் பல கேள்விகளை எழுப்பியுள்ளது.

ரையன் டென் டோஸ்கேட் விளக்கம்:

தோல்விக்குப் பிறகு பேசிய இந்திய அணியின் உதவி பயிற்சியாளர் ரையன் டென் டோஸ்கேட், இந்த முடிவு எளிதானது அல்ல என்று ஒப்புக்கொண்டார். “அணியைத் தேர்வு செய்ய நாங்கள் நீண்ட நேரம் ஆலோசித்தோம். தென்னாப்பிரிக்காவின் டாப் ஆர்டர் பேட்ஸ்மேன்களைக் கட்டுப்படுத்த, பவர்பிளேயில் (Powerplay) சிறப்பாகப் பந்துவீசக்கூடிய ஒரு வீரர் தேவை என்று கருதினோம். அதற்காகவே வாஷிங்டன் சுந்தரைத் தேர்வு செய்தோம்,” என்று விளக்கினார். மேலும், எட்டாவது பேட்ஸ்மேனாக ரிங்கு சிங்கைக் கொண்டுவர வேண்டிய கட்டாயம் இருந்ததால், யாராவது ஒருவரை நீக்க வேண்டியிருந்தது என்றும் அவர் கூறினார்.

முரண்பட்ட முடிவுகள்:

அணியின் திட்டத்தில் ஒரு பெரிய ஓட்டை இருப்பதை ரையன் டென் டோஸ்கேட்டின் பேச்சே உணர்த்தியது. வாஷிங்டன் சுந்தர் பவர்பிளேயில் பந்துவீசுவார் என்பதற்காகவே தேர்வு செய்யப்பட்டார், ஆனால் தென்னாப்பிரிக்காவிற்கு எதிரான போட்டியில் அவர் பவர்பிளேயில் பந்துவீசவே இல்லை.

“அவர் மிடில் ஓவர்களில் (Middle overs) பந்துவீசுவதாக இருந்தால், நாங்கள் அக்சர் படேலையே தேர்வு செய்திருப்போம்,” என்று ரையன் டென் டோஸ்கேட் கூறியது, இந்திய அணியின் திட்டமிடலில் இருந்த குளறுபடியைத் தெளிவாகக் காட்டுகிறது.

இதையும் படிக்க: சூப்பர் 8 சுற்றில் இந்தியாவின் முதல் சறுக்கல்.. அரையிறுதிக்கு முன்னேற வாய்ப்புகள் என்னென்ன?

ஐபிஎல் ஃபார்ம் மற்றும் அனுபவம்:

குஜராத் டைட்டன்ஸ் அணிக்காக இந்த ஐபிஎல் தொடரில் மூன்றில் ஒரு பங்கு போட்டிகளில் மட்டுமே விளையாடிய வாஷிங்டன் சுந்தருக்கு முன்னுரிமை அளிக்கப்பட்டது, அனுபவம் வாய்ந்த அக்சர் படேலின் திறமையை விட ‘மேட்ச்-அப்’ (Match-ups) கணக்குகளுக்கே முக்கியத்துவம் தரப்பட்டதைக் காட்டுகிறது. ஆனால், மைதானத்தில் அந்தத் திட்டங்கள் எதுவும் பலிக்கவில்லை என கிரிக்கெட் ரசிகர்கள் ஆதங்கம் தெரிவித்து வருகின்றனர்.