மீண்டும் சினிமாவில் ரீ – என்ட்ரி கொடுக்கும் நடிகர் அப்பாஸ் – யார் இயக்கத்தில் தெரியுமா?

நடிகர் அப்பாஸ்

தமிழ் சினிமா மட்டும் இன்றி தெலுங்கு, மலையாளம் மற்றும் இந்தி மொழிகளிலும் நடித்துள்ளார் நடிகர் அப்பாஸ் (Abbas). கொல்கத்தாவில் 1975-ம் ஆண்டு மே மாதம் 21-ம் தேதி பிறந்த இவர் தனது படிப்பு எல்லாமே மும்பையில் முடித்துள்ளார். மாடலான தனது வாழ்க்கையை தொடங்கிய அப்பாஸ் 1996-ம் ஆண்டு இயக்குநர் கதிர் இயக்கத்தில் வெளியான காதல் தேசம் (Kadhal Desam) படத்தின் மூலம் நடிகராக அறிமுகம் ஆனார். இவருடன் இணைந்து நடிகர் வினீத் நடித்திருந்தார். இரண்டு நாயகன்களின் ஒருவராக அப்பாஸ் இந்தப் படத்தில் அறிமுகம் ஆகியிருந்தார். நண்பர்கள் இருவரும் ஒரே பெண்ணை காதிலிப்பதை மையமாக வைத்து உருவான இந்தப் படம் ரசிகர்களிடையே நல்ல வரவேற்பைப் பெற்றது. மேலும் இந்தப் படத்தில் வரும் முஸ்தபா பாடல் இன்றளவும் ரசிகர்களால் கொண்டாடப்பட்டு வருவது குறிப்பிடதக்கது.

இந்தப் படத்தை தொடர்ந்து அப்பாஸ் நடிப்பில் வெளியான விஐபி, பூவேலி, படையப்பா, சுயம்வரம், மலபார் போலீஸ், கண்டுகொண்டேன் கண்டுகொண்டேன், மின்னலே, ஆனந்தம், பம்மல் கே சம்மந்தம், அடிதடி ஆகிய படங்கள் தமிழ் ரசிகர்களிடையே நல்ல வரவேற்பைப் பெற்றது.

கண்டுகொண்டேன் கண்டுகொண்டேன், மின்னலே, ஆகிய படங்கள் அப்பாஸிற்கு பெண் ரசிகர்களை அதிகமாக கொடுத்தது என்றே சொல்லலாம். 2000 ஆண்டு வரை பல முன்னணி கதாப்பாத்திரங்களில் நடித்து வந்த இவர் பின்பு சப்போர்ட்டிங் ரோல்களில் நடிக்கத் தொடங்கினார்.

2015-ம் ஆண்டு மலையாளத்தில் வெளியான பச்சக்கல்லமின் தான் நடிகர் அப்பாஸ் நடித்த கடைசி படம் ஆகும். அதனைத் தொடர்ந்து அவர் சினிமாவில் எந்தப் படங்களிலும் நடிக்கவில்லை. அப்பாஸ் எங்கே என்று தேடும் அளவிற்கு அவர் திரையுலக வாழ்க்கையை விட்டு விலகியே இருந்தார்.

குடும்பத்துடன் வெளிநாட்டில் அப்பாஸ் செட்டிலாகிவிட்டதாகவும் அங்கு பெட்ரோல் பங்க்கில் வேலை, மெக்கனிக் வேலை என்று கிடைத்த வேலைகளை எல்லாம் அவர் செய்து வந்தகாகவும் முன்னதாக சில செய்திகள் பரவின. ஆனால் இதுகுறித்து நடிகர் அப்பாஸ் இதுவரை எந்த கருத்தும் தெரிவித்தது இல்லை.

இந்த நிலையில் நடிகர் அப்பாஸ் தற்போது மீண்டும் நடிக்க உள்ளதாக சினிமா வட்டாரங்களில் தகவல்கள் பரவி வருகின்றது. அதன்படி அவர் சுமார் 11 ஆண்டுகளுக்குப் பிறகு மீண்டும் நடிக்க வருகிறார். இயக்குநர்கள் புஷ்கர் மற்றும் காயத்ரி தயாரிப்பில் இயக்குநர் சற்குணம் ஒரு புதிய வெப் தொடரை இயக்கி வருகிறா.

இந்த வெப் தொடரில் நடிகை துஷாரா விஜயன் முன்னணி கதாப்பாத்திரத்தில் நடித்துள்ளார். இந்த நிலையில் இந்த வெப் தொடரில் நடிகர் அப்பாஸ் இணைந்துள்ளதாக தகவல்கள் தெரிவிக்கின்றது. முன்னதாக தொடரின் பாதி படப்பிடிப்புகள் முடிந்துள்ள நிலையில் தற்போது மீதமுள்ள பகுதியில் அப்பாஸ் இணைந்துள்ளதாகக் கூறப்படுகின்றது.

இதுகுறித்த அதிகாரபூர்வ அறிவிப்பை நடிகர் அப்பாஸ் அல்லது படக்குழுவினர் இதுவரை வெளியிடவில்லை என்பது குறிப்பிடதக்கது. ஆனால் இதில் அப்பாஸ் நடித்திருந்தால் அவரது ரீ என்ட்ரி ரசிகர்களுக்கு மிகப்பெரிய சர்ப்ரைஸாக இருக்கும் என்பதில் எந்த ஆச்சரியமும் இல்லை.