நா.த.க வேட்பாளர் கார்த்திகா கைது: விஜய் அரசுக்கு மு.க.ஸ்டாலின், கனிமொழி, எடப்பாடி பழனிசாமி கடும் கண்டனம்!

அக்டோபர் 20, 2026: தாராபுரம் தொகுதி இடைத்தேர்தலின்போது காவல் நிலையத்தை முற்றுகையிட முயன்றதாக தொடரப்பட்ட வழக்கில், நாம் தமிழர் கட்சி வேட்பாளர் கார்த்திகா அக்டோபர் 20ஆம் தேதி கைது செய்யப்பட்டார். இந்த கைது நடவடிக்கைக்கு திமுக தலைவர் மு.க.ஸ்டாலின், திமுக நாடாளுமன்ற உறுப்பினர் கனிமொழி மற்றும் அதிமுக பொதுச் செயலாளர் எடப்பாடி பழனிசாமி உள்ளிட்ட அரசியல் தலைவர்கள் கடும் கண்டனம் தெரிவித்துள்ளனர். எதிர்க்கட்சியினரை ஒடுக்கும் வகையில் தமிழக வெற்றிக் கழக அரசு செயல்படுவதாகவும் அவர்கள் விமர்சித்துள்ளனர்.

மு.க.ஸ்டாலின் கடும் கண்டனம்

நடந்து முடிந்த தாராபுரம் தொகுதி இடைத்தேர்தலின்போது தொடரப்பட்ட வழக்கு காரணமாக, நாம் தமிழர் கட்சியின் வேட்பாளர் திருமதி கார்த்திகா அவர்களைத் த.வெ.க. அரசு கைது செய்திருப்பது வன்மையான கண்டனத்திற்குரியது.

ஒடுக்கப்பட்ட சமுதாயத்தைச் சேர்ந்த பெண்கள் பொதுவாழ்க்கையில் ஈடுபடுவதை, கொள்கை மாறுபாடுகளுக்கு அப்பால் வரவேற்று ஊக்கமளிக்க வேண்டும். அத்தகையோரைக் கைது செய்து அச்சுறுத்துவதன் மூலமாக இந்த அரசு எதைச் சாதிக்கப் போகிறது?

கடந்த காலங்களில் திருமதி கார்த்திகா அவர்கள் தி.மு.கழகத்தையும் அதன் கொள்கைத் தலைவர்களையும் விமர்சனம் செய்த தருணங்களில், அதைக் கொள்கை வழிநின்று தக்க பதிலளித்து தெளிவை ஏற்படுத்துவோம் என்ற வகையில் அணுகினோமே தவிர, பெண் தலைவர்களைச் சிறையில் அடைத்து வாய்ப்பூட்டு போட நாங்கள் நினைத்தது இல்லை. ஆனால், சகிப்புத்தன்மையும் ஜனநாயக உணர்வும் இல்லாத சர்வாதிகார அரசாகத் த.வெ.க. அரசு நடந்துகொள்கிறது.

இடைத்தேர்தலில் த.வெ.க. அரசு அதிகார துஷ்பிரயோகம் செய்ததை நாடே பார்த்தது. அதைத் தட்டிக் கேட்டதற்காக நா.த.க. நிர்வாகிகளைக் கைது செய்து அலைக்கழிப்பது கொடுங்கோன்மையும் குறுகிய மனப்பான்மையும் ஆகும்.

ஜாமீனில் வெளிவரத்தக்க சாதாரண வழக்குகளுக்காக, கைது நடவடிக்கையில் ஈடுபடும் காவல்துறை அதிகாரிகள் நீதிமன்றக் கண்டனத்துக்கு ஆளாவார்கள். த.வெ.க.வின் அரசியல் பழிவாங்கல் நடவடிக்கைகளுக்குக் காவல்துறை அதிகாரிகள் துணைபோகக் கூடாது.

நாட்டையே உலுக்கியுள்ள கொடிய போதை மருந்து கடத்தல் வழக்கில் த.வெ.க. நிர்வாகியும் அவரது கூட்டாளிகளும் கைது செய்யப்பட்ட சம்பவத்தைத் திசைதிருப்பவும் தனது நிர்வாகத் தோல்விகளை மறைக்கவும் இத்தகைய கைது நடவடிக்கையில் த.வெ.க. அரசு ஈடுபடுகிறது. மறுபுறம், செய்தியாளர்களுக்குக் கொலை மிரட்டல் விடுத்தவர்களும், கூட்டுப் பாலியல் வன்கொடுமைக்குத் துணைபோனவர்களும் த.வெ.க.வில் இருப்பதாலேயே வெளியில் சுற்றித் திரிகிறார்கள்.

குற்றவாளிகளைக் காப்பாற்றி, போராடுவோரைக் கைது செய்வதில் தற்போது ரெண்டே ரெண்டு பேருக்கு நடுவில்தான் போட்டியே. ஒன்று டெல்லி பா.ஜ.க., இன்னொன்று தமிழ்நாட்டில் த.வெ.க.! உங்கள் பாசிசம் பாயாசம் நாடகம் எல்லாம் நாளுக்கு நாள் பல்லிளித்துக் கொண்டே வருகிறது.

திருமதி கார்த்திகா அவர்களையும் அவரது கட்சியினரையும் நிபந்தனை இன்றி விடுதலை செய்ய வேண்டும்!

— M.K.Stalin (@mkstalin) October 20, 2026

இதுகுறித்து தனது சமூக வலைதளப் பக்கத்தில் பதிவிட்டுள்ள திமுக தலைவர் மு.க.ஸ்டாலின், இடைத்தேர்தலின்போது தொடரப்பட்ட வழக்கைக் காரணம் காட்டி கார்த்திகாவைக் கைது செய்திருப்பது வன்மையான கண்டனத்திற்குரியது எனத் தெரிவித்துள்ளார்.

மேலும், ஒடுக்கப்பட்ட சமூகத்தைச் சேர்ந்த பெண்கள் பொதுவாழ்க்கையில் ஈடுபடுவதை ஊக்குவிக்க வேண்டும் என்றும், அவர்களைக் கைது செய்து அச்சுறுத்துவதன் மூலம் அரசு எதைச் சாதிக்கப் போகிறது என்றும் கேள்வி எழுப்பியுள்ளார். கடந்த காலங்களில் கார்த்திகா திமுகவையும் அதன் தலைவர்களையும் விமர்சித்தபோதும், ஜனநாயக வழியில் பதிலளித்ததாகக் குறிப்பிட்ட அவர், தற்போது எதிர்க்கட்சியினரை ஒடுக்கும் நோக்கில் அரசு செயல்படுவதாகக் குற்றம்சாட்டியுள்ளார்.

மேலும் படிக்க: Fan Boy சம்பவம் – ‘ஜெயிலர் 2’ பார்க்க முழு திரையரங்கையும் முன்பதிவு செய்த சஞ்சு சாம்சன்!

மேலும், ஜாமீனில் வெளிவரக்கூடிய சாதாரண வழக்குகளில் கைது நடவடிக்கைகளை மேற்கொள்ளும் காவல்துறை அதிகாரிகள் நீதிமன்றக் கண்டனத்திற்கு ஆளாக நேரிடும் என்றும் எச்சரித்துள்ளார். கார்த்திகா மற்றும் அவரது கட்சியினரை நிபந்தனையின்றி விடுதலை செய்ய வேண்டும் என்றும் வலியுறுத்தியுள்ளார்.

எம்.பி கனிமொழி கண்டனம்:

தாராபுரம் தொகுதி இடைத்தேர்தலின்போது தொடரப்பட்ட வழக்கைக் காரணம் காட்டி, நாம் தமிழர் கட்சியின் வேட்பாளர் திருமிகு. கார்த்திகா அவர்களைத் த.வெ.க. அரசு கைது செய்திருப்பது வன்மையான கண்டனத்திற்குரியது. கொள்கை முரண்பாடுகள் இருந்தாலும், கழக ஆட்சியில் ஜனநாயக வழியிலேயே அவர்கள் மீதான விமர்சனங்கள் முன்வைக்கப்பட்டன. ஆனால், த.வெ.க. அரசு எதிர்க்கட்சிகளை ஒடுக்கும் நோக்கிலேயே செயல்பட்டுக் கொண்டிருக்கிறது.

சட்டம் ஒழுங்குச் சீர்கேடு, மின்வெட்டு, விலைவாசி உயர்வு என நாள்தோறும் மக்கள் இன்னலுக்குள்ளாகும் வேளையில், மாற்றுக் கட்சியினரை ஒடுக்குவதில் கவனம் செலுத்துவதை நிறுத்திவிட்டு, மக்கள் பிரச்சினைகளைத் தீர்த்து முறையான ஆட்சியை நடத்த வேண்டும்.

— Kanimozhi (கனிமொழி) (@KanimozhiDMK) October 20, 2026

திமுக நாடாளுமன்ற உறுப்பினர் கனிமொழியும் கார்த்திகா கைது நடவடிக்கைக்கு எதிர்ப்பு தெரிவித்துள்ளார். கொள்கை முரண்பாடுகள் இருந்தாலும், ஜனநாயக வழியிலேயே விமர்சனங்களை முன்வைக்க வேண்டும் என்றும், தமிழக வெற்றிக் கழக அரசு எதிர்க்கட்சிகளை ஒடுக்கும் நோக்கில் செயல்படுவதாகவும் அவர் குற்றம்சாட்டியுள்ளார்.

தமிழகத்தில் சட்டம் ஒழுங்குச் சீர்கேடு, மின்வெட்டு, விலைவாசி உயர்வு உள்ளிட்ட பிரச்சினைகளால் மக்கள் பாதிக்கப்பட்டுள்ள நிலையில், மாற்றுக் கட்சியினரை ஒடுக்குவதில் கவனம் செலுத்தாமல் மக்களின் பிரச்சினைகளுக்குத் தீர்வு காண வேண்டும் என்றும் அவர் வலியுறுத்தியுள்ளார்.

மேலும் படிக்க: திருச்செந்தூர் முருகன் கோயில் சொத்தில் அர்ச்சகர் கைவரிசை.. காட்டிக் கொடுத்த 3- ஆம் கண்.. அடுத்து நடந்த தரமான சம்பவம்!

எடப்பாடி பழனிசாமி விமர்சனம்

அதிமுக பொதுச் செயலாளர் எடப்பாடி பழனிசாமியும் கார்த்திகா கைது நடவடிக்கைக்குக் கண்டனம் தெரிவித்துள்ளார். தமிழக வெற்றிக் கழக அரசு பாசிசப் போக்கைக் கையாள்வது வெட்கக்கேடானது என அவர் விமர்சித்துள்ளார்.