மக்களே இதை நோட் பண்ணூங்க.. இன்றும் நாளையும் அரசு இ சேவை மையம் செயல்படாது..

சென்னை, டிசம்பர் 31, 2025: மென்பொருள் பராமரிப்பு மற்றும் தணிக்கை பணிகள் காரணமாக, டிசம்பர் 31, 2025 மற்றும் ஜனவரி 1, 2026 ஆகிய இரண்டு நாட்களில் இ – சேவை ஆதார் மையங்கள் செயல்படாது என தமிழ்நாடு அரசு கேபிள் டிவி நிறுவனம் (TACTV) தகவல் தெரிவித்துள்ளது. தமிழக அரசின் தகவல் தொழில்நுட்ப துறையின் கீழ் இயங்கும் தமிழ்நாடு மின் ஆளுமை முகமை வாயிலாக, ‘இ – சேவை’ இணையதளம் உருவாக்கப்பட்டு உள்ளது. இதன் வாயிலாக, பட்டா மாறுதல், இருப்பிட சான்று, பிறப்பு, இறப்பு சான்றிதழ் உட்பட பல வகை சான்றிதழ்கள் வழங்கப்படுகின்றன. வேளாண் பயிர் காப்பீட்டிற்கான பதிவும் மேற்கொள்ளப்படுகிறது.

குறிப்பாக ஆதார் தொடர்பான சேவைகள் அனைத்தும் இந்த இ சேவை மையத்தில் மேற்கொள்ளப்படுகிறது. இது ஒரு பக்கம் இருக்க இந்த இ சேவை மையம் என்பது அவ்வப்போது தொழில்நுட்பக் கோளாறு காரணமாக முடங்கப்படுகிறது. இதனால் மக்கள் தொடர்ச்சியாக இது தொடர்பாக புகார் அளித்திருந்தனர். இந்த சூழலில் தற்போது மென்பொருள் பராமரிப்பு மற்றும் தணிக்கை பணிகள் காரணமாக இரண்டு நாட்கள் இ சேவை மையம் செயல்படாது என தெரிவிக்கப்பட்டுள்ளது

இரண்டு நாட்கள் இ சேவை மையம் மூடல்:

இது தொடர்பாக வெளியிடப்பட்டுள்ள அறிவிப்பில், மாநிலம் முழுவதும் இயங்கி வரும் இ-சேவை ஆதார் மையங்களில் பயன்படுத்தப்படும் மைய மென்பொருள் அமைப்புகளில் பராமரிப்பு (Maintenance) மற்றும் தணிக்கை (Audit) பணிகள் மேற்கொள்ளப்பட உள்ளதால், இந்த இரண்டு நாட்களிலும் சேவைகள் தற்காலிகமாக நிறுத்தப்படுவதாக தெரிவிக்கப்பட்டுள்ளது.

மேலும் படிக்க: திமுக தேர்தல் அறிக்கை தயாரிக்க பிரத்யேக செயலி.. இன்று அறிமுகம் செய்கிறார் மு.க.ஸ்டாலின்..

இ-சேவை மையங்களில் வழங்கப்படும் சேவைகள்:

• தமிழகத்தில் செயல்பட்டு வரும் இ-சேவை மையங்கள் மூலம் பொதுமக்கள் பல்வேறு அரசு சேவைகளை எளிதாகப் பெற்றுவருகின்றனர். குறிப்பாக,
• ஆதார் பதிவு, திருத்தம் (பெயர், முகவரி, கைபேசி எண் மாற்றம்)
• வருமானச் சான்று, சமூகச் சான்று, பிறப்பு மற்றும் இறப்பு சான்று
• குடும்ப அட்டை சேவைகள்
• ஓய்வூதிய தொடர்பான விண்ணப்பங்கள்
• மின் கட்டணம், குடிநீர் கட்டணம் செலுத்துதல்
• அரசுத் துறைகளுக்கான ஆன்லைன் விண்ணப்பங்கள்

போன்ற பல்வேறு சேவைகள் இ-சேவை மையங்கள் மூலம் வழங்கப்பட்டு வருகின்றன.

பொதுமக்களுக்கு அறிவுறுத்தல்:

இந்த சேவைகள் அனைத்தும் டிசம்பர் 31 மற்றும் ஜனவரி 1 ஆகிய இரண்டு நாட்களில் கிடைக்காது என்பதால், பொதுமக்கள் அவசர தேவைகள் இருப்பின் அதற்கு முன்பாக அல்லது ஜனவரி 2, 2026 முதல் மீண்டும் சேவைகள் தொடங்கிய பின்னர் இ-சேவை மையங்களை அணுகுமாறு கேட்டுக்கொள்ளப்பட்டுள்ளது.

சேவைகள் மீண்டும் எப்போது?

பராமரிப்பு மற்றும் தணிக்கை பணிகள் முடிவடைந்ததும், ஜனவரி 2, 2026 முதல் வழக்கம்போல் அனைத்து இ-சேவை ஆதார் மையங்களும் இயல்பான நேரங்களில் செயல்படும் என தமிழ்நாடு அரசு கேபிள் டிவி நிறுவனம் தெரிவித்துள்ளது.