IND vs SL: கேப்டன் கில் முதல் குல்தீப் வரை.. இலங்கை டெஸ்ட் தொடரில் படைக்கப்போகும் சாதனை!
Indian Players Records: இலங்கைக்கு எதிரான டெஸ்ட் தொடரில் சுப்மன் கில் ஒரு சதம் அடித்தால், கில் உலக டெஸ்ட் சாம்பியன்ஷிப் (WTC) தொடரின் இந்த சுழற்சியில் அதிக சதங்கள் அடித்த பேட்ஸ்மேன் ஆவார். இதன்மூலம், சுப்மன் கில் ஜோ ரூட் சாதனையையும் முறியடிப்பார். இந்த உலக டெஸ்ட் சாம்பியன்ஷிப் சுழற்சியில் கில் இதுவரை 5 சதங்கள் அடித்துள்ளார்.
இந்தியாவும் இலங்கையும் (IND vs SL) வருகின்ற 2026 ஆகஸ்ட் 15ம் தேதி தொடங்கும் 2 போட்டிகள் கொண்ட டெஸ்ட் தொடரில் விளையாடவுள்ளன. முதல் டெஸ்ட் போட்டி காலி சர்வதேச மைதானத்தில் நடைபெறும். இந்தத் தொடரில் இந்திய வீரர்கள் சில முக்கிய சாதனைகளைப் படைக்க காத்திருக்கின்றனர். கேப்டன் சுப்மன் கில் (Shubman Gill) மற்றும் ஆல்ரவுண்டர் வீரர் ரவீந்திர ஜடேஜா ஆகியோருக்கு ஒரு சிறப்புச் சாதனையை நிகழ்த்த இது ஒரு பொன்னான வாய்ப்பாக அமையும். அந்தவகையில், எந்தெந்த இந்திய வீரர்கள் எந்தெந்த சாதனையை படைக்கவுள்ளனர் என்ற விவரத்தை தெரிந்து கொள்வோம்.
ALSO READ: காயத்தால் சிகிச்சையில் 13 இந்திய வீரர்கள்.. குழப்பத்தில் திணறும் கில் – காம்பீர்!
சுப்மன் கில்:
இலங்கைக்கு எதிரான டெஸ்ட் தொடரில் சுப்மன் கில் ஒரு சதம் அடித்தால், கில் உலக டெஸ்ட் சாம்பியன்ஷிப் (WTC) தொடரின் இந்த சுழற்சியில் அதிக சதங்கள் அடித்த பேட்ஸ்மேன் ஆவார். இதன்மூலம், சுப்மன் கில் ஜோ ரூட் சாதனையையும் முறியடிப்பார். இந்த உலக டெஸ்ட் சாம்பியன்ஷிப் சுழற்சியில் கில் இதுவரை 5 சதங்கள் அடித்துள்ளார். அதேநேரத்தில், கில் 2 சதங்கள் அடித்தால், இந்திய டெஸ்ட் கேப்டனாக அதிக சதங்கள் அடித்த சச்சின் டெண்டுல்கரை சமன் செய்வார். கேப்டனாக கில் இதுவரை 6 சதங்கள் அடித்துள்ளார். சச்சின் டெண்டுல்கர் கேப்டனாக 7 சதங்கள் அடித்துள்ளார்.
ரவீந்திர ஜடேஜா:
இலங்கைக்கு எதிரான 2 போட்டிகள் கொண்ட டெஸ்ட் தொடரில் ரவீந்திர ஜடேஜா இரண்டு விக்கெட்டுகளை வீழ்த்தினால், டெஸ்ட் கிரிக்கெட்டில் 350 விக்கெட்டுகளை எட்டிவிடுவார். இதன்மூலம், இந்த மைல்கல்லை எட்டிய 5வது இந்திய பந்துவீச்சாளர் என்ற பெருமையை ஜடேஜா பெறுவார். இதற்கு முன்பு அனில் கும்ப்ளே, ரவிச்சந்திரன் அஸ்வின், கபில் தேவ் மற்றும் ஹர்பஜன் சிங் ஆகிய பந்துவீச்சாளர்கள் மட்டுமே இந்தச் சாதனையை நிகழ்த்தியுள்ளனர்.
குல்தீப் யாதவ்:
இலங்கைக்கு எதிரான டெஸ்ட் தொடரில் ஒரு விக்கெட்டை வீழ்த்தினால், இந்திய சுழற்பந்து வீச்சாளர் குல்தீப் யாதவ் தனது 250 சர்வதேச விக்கெட்டுகளை எட்டுவார். சர்வதேச கிரிக்கெட்டில் இதுவரை குல்தீப், 141 இன்னிங்ஸ்களில் 24.14 என்ற சராசரியில் 249 விக்கெட்டுகளை வீழ்த்தியுள்ளார். இந்த டெஸ்ட் தொடரில் குல்தீப்பின் பங்கு முக்கியமானதாகக் கருதப்படுகிறது.
இஷாந்த் ஷர்மாவை முந்த ஜடேஜாவுக்கு வாய்ப்பு:
இலங்கைக்கு எதிரான டெஸ்ட் தொடரில் இஷாந்த் ஷர்மாவை முந்த ரவீந்திர ஜடேஜாவுக்கு ஒரு வாய்ப்பு உள்ளது. இந்தியா-இலங்கை டெஸ்ட் தொடரில் அதிக விக்கெட்டுகளை எடுத்த இந்திய பந்துவீச்சாளர்கள் பட்டியலில் ஜடேஜா தற்போது 6வது இடத்தில் உள்ளார். ஜடேஜா இதுவரை இலங்கைக்கு எதிராக 7 போட்டிகளில் 33 விக்கெட்டுகளை எடுத்துள்ளார். ஜடேஜா 4 விக்கெட்டுகளை எடுத்தால், ஜடேஜா இஷாந்த் ஷர்மாவை முந்தி முதல் 5 இடங்களுக்குள் நுழைவார். இலங்கைக்கு எதிரான டெஸ்ட் தொடரில் இஷாந்த் 36 விக்கெட்டுகளை எடுத்துள்ளார்.
ALSO READ: இந்திய வீரர்கள் அடுத்தடுத்து காயம்.. அதிரடியாக ஆய்வு மேற்கொள்ளும் பிசிசிஐ செயலாளர்!
கேப்டன் பதவியில் பிஷன் பேடியை முந்த கில்லுக்கு வாய்ப்பு:
இலங்கைக்கு எதிரான டெஸ்ட் தொடரில் கேப்டன் பதவியில் பிஷன் சிங் பேடியை முந்த சுப்மன் கில்லுக்கும் ஒரு பொன்னான வாய்ப்பு கிடைத்துள்ளது. கில்லின் தலைமையில் இந்திய அணி இந்தத் தொடரில் இலங்கையை 2-0 என்ற கணக்கில் தோற்கடித்தால், ஒரு இந்திய கேப்டனாக அதிக வெற்றிகளைப் பெற்றவர்கள் என்ற கணக்கில் அவர் பிஷன் சிங் பேடியை முந்திவிடுவார். கில் இதுவரை 9 டெஸ்ட் போட்டிகளில் இந்தியாவை வழிநடத்தி, 5ல் வெற்றி பெற்று மூன்றில் தோல்வியடைந்துள்ளார். அதே சமயம், பிஷன் பேடியின் தலைமையில் இந்தியா 22 டெஸ்ட் போட்டிகளில் 6ல் வெற்றி பெற்றது.
