SSLC Class 10 results 2026 : 10ம் வகுப்பு ரிசல்ட்.. எந்த மாவட்டம் டாப்.. எது கடைசி.. முழு விவரம்!
Tamil Nadu SSLC Class 10 results 2026: தமிழ்நாட்டில் இன்று வெளியான 10-ஆம் வகுப்பு பொதுத்தேர்வு முடிவுகளில் ஒட்டுமொத்த தேர்ச்சி விகிதம் 94.31% ஆகப் பதிவாகியுள்ள நிலையில், மாவட்ட அளவிலான ஒட்டுமொத்த தேர்ச்சிப் பட்டியலில் புதுக்கோட்டை மாவட்டம் 97.57% பெற்று தமிழகத்திலேயே முதலிடத்தையும் இராணிப்பேட்டை மாவட்டம் (86.58%) கடைசி இடத்தையும் பெற்றுள்ளது.
தமிழ்நாட்டில் மார்ச் மற்றும் ஏப்ரல் மாதங்களில் நடத்தப்பட்ட 10-ஆம் வகுப்பு (SSLC) பொதுத்தேர்வு முடிவுகள் இன்று (மே 20, 2026) அரசுத் தேர்வுகள் இயக்ககத்தால் அதிகாரப்பூர்வமாக வெளியிடப்பட்டுள்ளன. இந்த ஆண்டு தேர்வு எழுதிய மொத்த மாணாக்கர்களின் எண்ணிக்கை 8,70,643 ஆகும். இதில் 8,21,105 பேர் தேர்ச்சி பெற்று, ஒட்டுமொத்த தேர்ச்சி சதவீதம் 94.31% ஆகப் பதிவாகியுள்ளது. வழக்கம்போல இந்த ஆண்டும் மாணவர்களை விட மாணவிகளே அதிகளவில் தேர்ச்சி பெற்று சாதனை படைத்துள்ளனர். மாணவிகள் தரப்பில் 96.47% பேரும், மாணவர்கள் தரப்பில் 92.15% பேரும் தேர்ச்சி பெற்றுள்ள நிலையில், மாணவர்களை விட மாணவிகள் 4.32% கூடுதலாகத் தேர்ச்சி பெற்றுள்ளனர். கடந்த 2025 ஆம் ஆண்டு பொதுத்தேர்வில் தேர்ச்சி சதவீதம் 93.80% ஆக இருந்த நிலையில், கடந்த ஆண்டை விட இந்த ஆண்டு தேர்ச்சி விகிதம் 0.51% கூடுதலாக அதிகரித்துள்ளது குறிப்பிடத்தக்கது.
மாவட்டங்களின் தேர்ச்சிப் பட்டியல் – டாப் மற்றும் கடைசி இடங்கள்
மாவட்ட வாரியான ஒட்டுமொத்த தேர்ச்சி விகித அடிப்படையில் இந்த ஆண்டு புதுக்கோட்டை மாவட்டம் 97.57% தேர்ச்சியுடன் தமிழகத்திலேயே முதலிடத்தைப் பிடித்து சாதனை படைத்துள்ளார். இதனைத் தொடர்ந்து சிவகங்கை மாவட்டம் 97.54% தேர்ச்சியுடன் இரண்டாம் இடத்தையும், தஞ்சாவூர் மாவட்டம் 97.41% தேர்ச்சியுடன் மூன்றாம் இடத்தையும் பிடித்துள்ளன. அடுத்தடுத்த இடங்களில் திருச்சி (97.31%) மற்றும் கன்னியாகுமரி (97.30%) மாவட்டங்கள் சிறப்பிடம் பெற்று டாப் 5 பட்டியலுக்குள் நுழைந்துள்ளன. அதே நேரத்தில், தமிழக மாவட்டங்களின் ஒட்டுமொத்த தேர்ச்சிப் பட்டியலில் மிகக் குறைந்த தேர்ச்சி சதவீதத்துடன் இராணிப்பேட்டை மாவட்டம் (86.58%) கடைசி இடத்தைப் பெற்றுள்ளது. இதற்கு முந்தைய இடங்களில் அரியலூர் (87.55%) மற்றும் விழுப்புரம் (87.77%) ஆகிய மாவட்டங்கள் உள்ளன. (பள்ளி கல்வித்துறையின் கீழ் தேர்வு எழுதிய புதுச்சேரி 98.03% மற்றும் காரைக்கால் 96.47% தேர்ச்சி பெற்றுள்ள போதிலும், அவை யூனியன் பிரதேசப் பிரிவில் வருவதால் முதன்மை மாவட்டப் பட்டியலில் சேர்க்கப்படவில்லை).
அரசுப் பள்ளிகளின் சாதனை மற்றும் பள்ளி வாரியான புள்ளிவிவரங்கள்
அரசுப் பள்ளிகளின் தேர்ச்சி விகிதத்தை மட்டும் தனியாகப் பார்க்கும்போது, சிவகங்கை மாவட்டம் 97.42% தேர்ச்சி பெற்று தமிழகத்திலேயே முதலிடத்தைப் பிடித்து அசத்தியுள்ளது. இதற்கு அடுத்தபடியாக புதுக்கோட்டை மாவட்டம் 97.09% தேர்ச்சியுடன் இரண்டாம் இடத்தையும், தஞ்சாவூர் மாவட்டம் 96.89% தேர்ச்சியுடன் மூன்றாம் இடத்தையும் பெற்றுள்ளன. நான்காவது இடத்தில் இராமநாதபுரம் மாவட்டமும் (96.78%), ஐந்தாவது இடத்தில் திருச்சி மாவட்டமும் (96.48%) அரசுப் பள்ளிகளுக்கான டாப் 5 பட்டியலில் இடம் பிடித்துள்ளன. பள்ளிகளின் வகைப்பாடு வாரியாகப் பார்க்கும்போது அரசுப் பள்ளிகள் 91.86%, அரசு உதவி பெறும் பள்ளிகள் 94.34%, மற்றும் தனியார் சுயநிதிப் பள்ளிகள் 98.14% தேர்ச்சி விகிதத்தைப் பதிவு செய்துள்ளன. மேலும், தமிழகம் முழுவதும் மொத்தம் உள்ள 12,467 பள்ளிகளில், 5,171 பள்ளிகள் 100% தேர்ச்சி பெற்று சாதனை படைத்துள்ளன; இதில் 1,931 அரசுப் பள்ளிகளும் அடங்கும்.
பாட வாரியான தேர்ச்சி மற்றும் நூற்றுக்கு நூறு (Centum) பெற்றவர்கள்
பாட வாரியான தேர்ச்சி சதவீதத்தில் ஆங்கிலப் பாடம் 99.44% தேர்ச்சியுடன் முதலிடத்தில் உள்ளது. மற்ற பாடங்களான தமிழ் 98.43%, அறிவியல் 98.00%, சமூக அறிவியல் 97.93%, மற்றும் கணிதம் 97.36% தேர்ச்சி விகிதத்தைப் பெற்றுள்ளன. 100-க்கு 100 முழு மதிப்பெண்கள் (Centum) பெற்ற மாணவர்களின் எண்ணிக்கையில் அறிவியல் பாடம் 10,476 மாணவர்களுடன் முதலிடத்தில் ஆதிக்கம் செலுத்துகிறது. அதற்கு அடுத்தபடியாக சமூக அறிவியலில் 3,336 பேரும், கணிதத்தில் 3,194 பேரும், ஆங்கிலத்தில் 92 பேரும், தமிழில் 34 பேரும் நூற்றுக்கு நூறு பெற்றுள்ளனர். ஏதேனும் ஒரு பாடத்தில் 100 மதிப்பெண்கள் பெற்ற ஒட்டுமொத்த மாணாக்கர்களின் எண்ணிக்கை 17,132 ஆகும்; இதில் அரசுப் பள்ளி மாணவர்கள் மட்டும் 2,774 பேர் என்பது பெருமைக்குரிய விஷயமாகும். மாற்றுத்திறனாளி மாணவர்களில் 11,416 பேரும் (85.89%), சிறைவாசிகளில் 354 பேரும் (95.68%) இந்த ஆண்டு தேர்ச்சி பெற்று சாதனைப் பட்டியலில் இணைந்துள்ளனர்.
