Donald Trump : எலான் மஸ்க் உடனான உறவு முறிந்துவிட்டது.. டொனால்ட் டிரம்ப் திட்டவட்டம்!

அமெரிக்கா, ஜூன் 08 : எலான் மஸ்க் (Elon Musk) உடனான உறவு முறிந்துவிட்டது. அவருடன் பேச்சுவார்த்தை நடத்துவதற்கு நேரம் இல்லை என்று அமெரிக்க அதிபர் டொனால்ட் டிரம்ப் (American President Donald Trump) திட்டவட்டமாக தெரிவித்துள்ளார். உலக பணக்காரர் எலான் மஸ்கிற்கும், டொனால்ட் டிரம்பிற்கு இடையே கடந்த சில நாட்களாக மோதல் போக்கு நிலவி வரும் நிலையில், தொலைக்காட்சி நிகழ்ச்சியில் பங்கேற்ற டொனால்ட் டிரம்ப் இவ்வாறு தெரிவித்துள்ளார். இந்த நிலையில், டிரம்ப் மற்றும் மஸ்க் உறவில் விரிசல் ஏற்பட காரணம் என்ன, தொலைக்காட்சி நிகழ்ச்சியில் டிரம்ப் பேசியது என்ன என்பது குறித்து விரிவாக பார்க்கலாம்.

டொனால்ட் டிரம்ப் மற்றும் எலான் மஸ்க் இடையே ஏற்பட்ட விரிசல்

அமெரிக்கா அதிபர் டொனால்ட் டிரம்ப் மற்றும் உலக பணக்காரர் எலான் மஸ்க் ஆகிய இருவருக்கும் இடையே நல்ல நட்பு நீடித்து வந்தது. குறிப்பாக சொல்ல வேண்டும் என்றால், அமெரிக்கா அதிபர் தேர்தலில் டிரம்ப் வெற்றி பெறுவதற்காக எலான் மஸ்க் சாலைகளில் இறங்கி பிரச்சாரம் செய்தது மட்டுமின்றி, தேர்தல் செலவுக்காக 250 மில்லியன் அமெரிக்க டாலர்களை வழங்கியுள்ளார். இவ்வாறு மிக நெருக்கமாக இருந்த டிரம்ப் மற்றும் மஸ்க் நட்புறவில் தற்போது மிகப்பெரிய விரிசல் ஏற்பட்டுள்ளது.

டிரம்ப் – மஸ்க் நட்புறவில் விரிசல் ஏற்பட காரணம் என்ன?

ஜூன் 5, 2025 அன்று அமெரிக்க அதிபர் டொனால்ட் டிரம்ப் One Big Beautiful Bill என்ற மசோதாவை அறிமுகம் செய்தார். இந்த மசோதாவில் பெரிய அளவிலான வரி குறைப்புகள் இடம் பெற்றிருந்தன. இது குறித்து கூறியிருந்த டிரம்ப், இது நாடாளுமன்றத்தில் தாக்கல் செய்யப்பட்ட மிகச்சிறந்த மசோதா. இது அரசாங்கத்தின் செலவினங்களில் பெரும் தொகையை மிச்சப்படுத்தும் என கூறியிருந்தார். ஆனால், டிரம்பின் இந்த புதிய மசோதாவுக்கு எலான் மஸ்க் மாறுபட்ட கருத்து தெரிவித்திருந்தார். அது குறித்து கூறிய மஸ்க், அந்த புதிய மசோதாவால் நாட்டின் கடன் அதிகரிக்கும் என கூறியிருந்தார். இதுவே டிரம்ப் மற்றும் மஸ்க் நட்பில் விரிசல் ஏற்பட ஆரம்ப புள்ளியாக இருந்தது.

எலான் மஸ்க் எக்ஸ் பதிவு

The Trump tariffs will cause a recession in the second half of this year https://t.co/rbBC11iynE

— Elon Musk (@elonmusk) June 5, 2025

இதனை தொடர்ந்து எலான் மஸ்க், அமெரிக்க அதிபர் டொனால்ட் டிரம்ப் பதவி விலக வேண்டும் என்றும், அவருக்கு பதிலாக துணை அதிபர் ஜே.டி வான்ஸ் அதிபராக வேண்டும் என்று கூறியிருந்தார். மஸ்கின் இந்த கருத்துக்கள் கடும் அதிர்வலைகளை ஏற்படுத்தின. இந்த நிலையில், மஸ்க் குறித்து பேசிய டிரம்ப் அவர் புத்தியை இழந்துவிட்டார் என்று கூறியிருந்தார். தற்போது தொலைக்காட்சி நிகழ்ச்சியில் பேசிய டிரம்ப், எலான் மஸ்க் உடனான உறவு முறிந்துவிட்டது. அவருடன் பேச்சுவார்த்தை நடத்துவதற்கு நேரம் இல்லை என்று கூறியுள்ளார் என்பது குறிப்பிடத்தக்கது.