தொடர் விடுமுறை: சென்னையில் இருந்து சொந்த ஊர் செல்வோர் கவனத்திற்கு.. சிறப்புப் பேருந்துகள் பற்றிய முழு வழிகாட்டி!!

சென்னை, அக்.16: தமிழகத்தில் வரவிருக்கும் ஆயுத பூஜை மற்றும் விஜயதசமி திருவிழாக்கள் மிகக் கோலாகலமாகக் கொண்டாடப்படவுள்ளன. இதனைத் தொடர்ந்து சனி மற்றும் ஞாயிற்றுக்கிழமை வார இறுதி விடுமுறையும் இணைவதனால், தொடர்ச்சியாக 4 நாட்கள் விடுமுறை கிடைக்கவுள்ளது. இதனால் சென்னையில் தங்கிப் பணிபுரியும் ஊழியர்கள், ஐ.டி. தொழிலாளர்கள் மற்றும் கல்லூரி மாணவர்கள் லட்சக்கணக்கானோர் தங்களது சொந்த ஊர்களுக்குப் படையெடுக்கத் தொடங்கியுள்ளனர். பயணிகள் தங்களது பயணங்களை எவ்வித சிரமமுமின்றி மேற்கொள்ளவும், பேருந்து நிலையங்களில் ஏற்படும் தேவையற்ற கூட்ட நெரிசலைத் தவிர்க்கவும் போக்குவரத்துத் துறை சார்பில் சிறப்பான முன்னெச்சரிக்கை ஏற்பாடுகள் செய்யப்பட்டுள்ளன. இதன் பகுதியாக, சென்னையிலிருந்து ஆயிரக்கணக்கான சிறப்புப் பேருந்துகள் இயக்கப்படும் என அதிகாரப்பூர்வமாக அறிவிக்கப்பட்டுள்ளது.

மேலும் படிக்க: அதிமுக வளர்ச்சியில் என் பங்கு உண்டு.. ஜெயலலிதா நம்பிக்கையை காக்க ஒன்றிணையும் நேரம்.. சின்னம்மா அழைப்பு!

5 இடங்களில் பேருந்து நிலையங்கள் பிரிப்பு:

பயணிகள் தங்களின் பயண வழிகளுக்கு ஏற்ப சிரமமின்றிப் பேருந்துகளைப் பிடிக்கும் பொருட்டு, வழக்கமான பேருந்து நிலையங்களுடன் தற்காலிகப் பேருந்து நிலையங்களும் சேர்த்து மொத்தம் 5 இடங்களில் இருந்து பேருந்துகள் இயக்கப்படுகின்றன. அதன்படி, கிளாம்பாக்கம் கலைஞர் நூற்றாண்டு பேருந்து முனையத்திலிருந்து திருச்சி, மதுரை, திருநெல்வேலி, தூத்துக்குடி, செங்கோட்டை, சேலம், கோயம்புத்தூர், புதுச்சேரி, கடலூர் மற்றும் சிதம்பரம் ஆகிய தென் மற்றும் மேற்கு மாவட்டப் பகுதிகளுக்குப் பேருந்துகள் இயக்கப்படுகின்றன. அதேபோல, கிளாம்பாக்கம் அருகே கால்நடை பூங்கா பகுதியில் அமைக்கப்பட்டுள்ள தற்காலிகப் பேருந்து நிலையத்திலிருந்து திருவண்ணாமலை, போளூர், வந்தவாசி மார்க்கப் பேருந்துகளும், மறைமலைநகர் தற்காலிகப் பேருந்து நிலையத்திலிருந்து கும்பகோணம், தஞ்சாவூர், திருவாரூர், நாகப்பட்டினம், மயிலாடுதுறை செல்லும் பேருந்துகளும் புறப்படுகின்றன.

கோயம்பேடு, மாதவரம் இயக்க விவரங்கள்:

கோயம்பேடு புரட்சித் தலைவர் டாக்டர் எம்.ஜி.ஆர். பேருந்து நிலையத்தைப் பொறுத்தவரை, கிழக்கு கடற்கரை சாலை (ECR) வழியாகச் செல்லும் பேருந்துகள், காஞ்சிபுரம், வேலூர், பெங்களூரு மற்றும் திருத்தணி செல்லும் பேருந்துகள் இயக்கப்படுகின்றன. மேலும், மாதவரம் பேருந்து நிலையத்திலிருந்து பொன்னேரி, ஊத்துக்கோட்டை வழியாக ஆந்திர மாநிலத்திற்குச் செல்லும் பேருந்துகள் வழக்கம்போல் இயக்கப்பட்டு வருகின்றன. பயணிகள் தங்களுக்குரிய பேருந்து நிலையங்களைச் சரியாக அறிந்து சென்று தங்களின் பயணங்களைத் திட்டமிடுமாறு போக்குவரத்துத் துறை கேட்டுக்கொண்டுள்ளது.

இதையும் படிக்க: செஞ்சி சிறுமி மாயமான வழக்கில் அதிரடி திருப்பம்.. கரும்பு தோட்டத்திற்குள் நுழைந்த மோப்ப நாய்.. 5வது நாளாக தீவிர தேடுதல் வேட்டை!!

14,963 சிறப்பு பேருந்துகள் இயக்க ஏற்பாடு:

அரசுப் போக்குவரத்துத் துறை சார்பில் வழக்கமாக இயக்கப்படும் 8,764 பேருந்துகளுடன் கூடுதலாக 6,199 சிறப்புப் பேருந்துகள் சேர்க்கப்பட்டு, மொத்தம் 14,963 பேருந்துகள் இந்த தொடர் விடுமுறைக் காலத்தில் இயக்கப்படுகின்றன. பயணிகள் அதிகளவில் இன்று மாலை முதலே சொந்த ஊர்களுக்குப் பயணிக்கத் தொடங்குவார்கள் என்பதால், முக்கியப் பேருந்து நிலையங்களில் பாதுகாப்பு மற்றும் கூட்டத்தைக் கட்டுப்படுத்தும் பணிகள் பலப்படுத்தப்பட்டுள்ளன. பயணிகள் அனைவரும் இந்த வசதிகளைப் பயன்படுத்திப் பாதுகாப்பான மற்றும் சீரான பயணத்தை மேற்கொள்ளுமாறு அறிவுறுத்தப்பட்டுள்ளனர்.