Team India: எதிர்கால திட்டத்தில் அவர் இல்லை.. ஷமி குறித்த கேள்வி.. ஷாக் பதில் கொடுத்த அகர்கர்!
2027 ODI World Cup: இலங்கை சுற்றுப்பயணத்திற்கான இந்திய அணி தேர்வு செய்யப்பட்டது. ஆனால் அதில் முகமது ஷமி இடம்பெறவில்லை. ஷமி அணியில் இடம்பெற்றிருந்தாரா இல்லையா என்பது குறித்து தேர்வாளர்கள் எந்த தகவலையும் அளிக்கவில்லை. இது, அவரது சர்வதேச கிரிக்கெட் வாழ்க்கை முடிவுக்கு வந்திருக்கலாம் என்ற யூகங்களுக்கு வழிவகுத்துள்ளது.
அனுபவ வேகப்பந்து வீச்சாளர் முகமது ஷமி இந்திய அணியில் (Indian Cricket Team) தொடர்ந்து புறக்கணிக்கப்பட்டு வருகிறார். 2023 உலகக் கோப்பையில் தனது சிறப்பான ஆட்டத்தால் அனைவரையும் கவர்ந்த முகமது ஷமி (Mohammed Shami), தனது கிரிக்கெட் வாழ்க்கையில் கடைசி கட்டத்தை எதிர்கொண்டு வருகிறார் என்று தெரிகிறது. 2023 உலகக் கோப்பையில் முகமது ஷமி வெறும் 7 போட்டிகளில் மட்டுமே விளையாடி 24 விக்கெட்டுகளை வீழ்த்தினார். இங்கிருந்து அவரது கிரிக்கெட் வாழ்க்கை ஒரு புதிய உச்சத்தை எட்டும் என்று எதிர்பார்க்கப்பட்டபோது, அவருக்கு ஏற்பட்ட காயமானது ஷமியை நீண்ட காலம் விளையாட விடாமல் தடுத்துவிட்டது.
ALSO READ: உலகக் கோப்பை வரலாற்றில் அதிக போட்டிகள்.. புது சாதனை படைக்க ஐசிசி திட்டம்!
அதைத் தொடர்ந்து, 2025-ஆம் ஆண்டின் தொடக்கத்தில் முகமது ஷமி இந்திய அணிக்குத் திரும்பியபோது, தொடர்ந்து வாய்ப்புகள் கிடைக்கும் என்று ரசிகர்கள் எதிர்பார்த்தனர். ஆனால், சாம்பியன்ஸ் டிராபிக்குப் பிறகு முகமது ஷமி இந்திய அணியிலிருந்து நீக்கப்பட்டார். இதுவே ஷமிக்குக் கிடைத்த கடைசி வாய்ப்பு. அதன்பிறகு, முகமது ஷமி இந்திய அணியின் ஜெர்ஸியை அணியவில்லை. ஷமி மீண்டும் அணிக்குத் திரும்புவதற்கு தலைமைத் தேர்வாளர் அஜித் அகர்கர்தான் மிகப்பெரிய தடையாக இருப்பதாக சமூக வலைதளங்களில் விமர்சனங்கள் முன்வைக்கப்பட்டு வருகிறது. தற்போது, முகமது ஷமிக்கு ஏன் வாய்ப்பு வழங்கப்படவில்லை என்பது குறித்து தலைமை தேர்வாளர் அஜித் அகர்கர் விளக்கம் அளித்துள்ளார்.
அஜித் அகர்கர் விளக்கம்:
முகமது ஷமி குறித்து பேசிய அஜித் அகர்கர், “நாங்கள் அனைத்து வடிவங்களுக்குமான எங்கள் 15 வேகப்பந்து வீச்சாளர்களைத் தேர்ந்தெடுத்துள்ளோம். வரவிருக்கும் 2027 உலக டெஸ்ட் சாம்பியன்ஷிப் மற்றும் 2027 ஒருநாள் உலகக் கோப்பைக்காக இளம் வீரர்களுக்குத் தேவையான அனுபவத்தை வழங்க நாங்கள் தயாராக இருக்கிறோம். முகமது ஷமி எங்கள் எதிர்காலத் திட்டங்களில் இடம்பெறவில்லை. அவர் அனைத்து வடிவங்களிலும் இந்தியாவுக்காக அற்புதமாகச் செயல்பட்டுள்ளார். மேலும் ஐசிசி நிகழ்வுகளிலும் குறிப்பிடத்தக்க பங்களிப்புகளைச் செய்துள்ளார். ஆனால், ஒரு கட்டத்தில் ஒருவர் முன்னேறிச் செல்லத்தான் வேண்டும். எல்லாவற்றிற்கும் ஒரு முடிவு உண்டு. இந்த நிலையில், நாங்கள் அவரை எங்கள் எதிர்காலத் திட்டங்களில் சேர்க்கவில்லை. அவரது பங்களிப்பையும், அவர் தனது விளையாட்டு வாழ்க்கை முழுவதும் காட்டிய ஆர்வத்தையும் நான் எப்போதும் போற்றுவேன்” என்றார்.
முகமது ஷமியின் செயல்திறன்:
இந்தியாவின் அனுபவமிக்க வேகப்பந்து வீச்சாளர் முகமது ஷமி, இந்தியாவுக்காக 64 டெஸ்ட் போட்டிகளில் விளையாடி, 122 இன்னிங்ஸ்களில் 27.71 என்ற சராசரியில் 229 விக்கெட்டுகளை வீழ்த்தியுள்ளார். இந்தக் காலகட்டத்தில் அவரது எகானமி ரேட் 3.30 ஆக இருந்தது. ஷமி இதுவரை இந்திய அணிக்காக 108 ஒருநாள் போட்டிகளில் விளையாடி, 107 இன்னிங்ஸ்களில் 24.05 என்ற சராசரியில் 206 விக்கெட்டுகளை வீழ்த்தியுள்ளார். மேலும், ஷமி 25 டி20 போட்டிகளில் விளையாடி, 25 இன்னிங்ஸ்களில் 28.18 என்ற சராசரியில் 27 விக்கெட்டுகளை வீழ்த்தியுள்ளார்.
சமீபத்தில், இலங்கை சுற்றுப்பயணத்திற்கான இந்திய அணி தேர்வு செய்யப்பட்டது. ஆனால் அதில் முகமது ஷமி இடம்பெறவில்லை. ஷமி அணியில் இடம்பெற்றிருந்தாரா இல்லையா என்பது குறித்து தேர்வாளர்கள் எந்த தகவலையும் அளிக்கவில்லை. இது, அவரது சர்வதேச கிரிக்கெட் வாழ்க்கை முடிவுக்கு வந்திருக்கலாம் என்ற யூகங்களுக்கு வழிவகுத்துள்ளது.
