TV9 Tamil News Lifestyle > Secret Tips for Making Thick and Creamy Homemade Curd

கடைத் தயிர் தோத்துப்போகும்.. வீட்டிலேயே ஐஸ் க்ரீம் போல கெட்டி தயிர் தயார் செய்ய சூப்பர் டிப்ஸ்!

Published:

30 Apr 2026 14:00 PM

IST

Creamy Homemade Curd: தண்ணீர் சேர்க்காத முழு கொழுப்புள்ள பாலை நன்கு சுண்டக் காய்ச்சிய பிறகு, கை பொறுக்கும் மிதமான சூட்டிற்கு வரும் வரை ஆறவைத்து பின் உறை ஊற்ற வேண்டும். ஒரு ஸ்பூன் புளிக்காத பழைய தயிரைச் சேர்த்து பால் முழுவதும் நன்கு கலக்கும்படி ஆற்றி, மண்பானை அல்லது பீங்கான் பாத்திரத்தில் ஊற்றி வைத்தால் தயிர் கூடுதல் கெட்டியாகக் கிடைக்கும்.

கெட்டியான தயிர் கிடைப்பதற்கு தண்ணீரைச் சேர்க்காத 'ஃபுல் கிரீம் மில்க்' (Full Cream Milk) எனப்படும் முழு கொழுப்புள்ள பாலைப் பயன்படுத்துவது மிகவும் அவசியமாகும். பாலை நன்றாகக் காய்ச்சிய பிறகு, சிறுது நேரம் குறைந்த தீயில் வைத்து சுண்டக் காய்ச்சுவது பாலில் உள்ள நீர்ச்சத்தை குறைத்து தயிரை அதிக கெட்டித்தன்மையுடன் மாற்ற உதவும். அதிக தண்ணீர் கலந்த பால் பயன்படுத்தினால் தயிர் நீர்த்துப்போக வாய்ப்புள்ளது என்பதால் பாலின் தரத்தில் கவனம் செலுத்த வேண்டும்.

2 / 5

பால் காய்ச்சிய பிறகு அது மிகவும் சூடாகவோ அல்லது முற்றிலும் குளிர்ந்தோ இருக்கக்கூடாது, மாறாக இதமான சூட்டில் (Lukewarm) இருப்பது மிக முக்கியம். உங்கள் விரலை பாலில் வைக்கும்போது அந்தச் சூட்டை உங்களால் தாங்கிக்கொள்ளும் பதத்தில் இருக்கும்போது மட்டுமே உறை ஊற்ற வேண்டும். பால் அதிக சூடாக இருந்தால் தயிர் திரிந்து போகவும், சூடு குறைவாக இருந்தால் தயிர் சரியாக உறையாமல் போகவும் வாய்ப்புள்ளது.

3 / 5

தயிர் உறைய வைப்பதற்குப் பயன்படுத்தும் பழைய தயிர் (Starter) புளிக்காததாகவும், நல்ல தரமானதாகவும் இருப்பதை உறுதி செய்து கொள்ள வேண்டும். இதமான சூட்டில் உள்ள பாலில் ஒரு ஸ்பூன் தயிரைச் சேர்த்து, ஒரு கரண்டியால் அல்லது பாத்திரத்தை வைத்து நன்கு ஆற்றி நுரை வரும்படி கலக்குவது பாக்டீரியாக்கள் சீராகப் பரவ உதவும். இவ்வாறு பாலை நன்கு ஆற்றுவதன் மூலம் தயிர் அனைத்து இடங்களிலும் சமமாக உறைந்து கட்டித் தயிராக மாறும்.

4 / 5

தயிரை உறை ஊற்ற மண்பானைகளைப் பயன்படுத்துவது மிகவும் சிறந்த முறையாகும், ஏனெனில் மண்பானையில் உள்ள நுண்துளைகள் பாலில் உள்ள அதிகப்படியான ஈரப்பதத்தை உறிஞ்சிக்கொள்ளும். இதனால் தயிர் நீண்ட நேரம் கெட்டியாகவும், சுவையாகவும் இருப்பதோடு சீக்கிரத்தில் புளித்துப் போகாமலும் பாதுகாக்கப்படுகிறது. மண்பானை இல்லாதவர்கள் எஃகு (Steel) பாத்திரங்களுக்குப் பதிலாக பீங்கான் அல்லது கண்ணாடி பாத்திரங்களைப் பயன்படுத்தலாம்.

5 / 5

பாலை உறை ஊற்றிய பிறகு, அந்தப் பாத்திரத்தை ஒரு மிதமான வெப்பம் உள்ள இடத்தில் 6 முதல் 8 மணி நேரம் வரை அசைக்காமல் அப்படியே வைக்க வேண்டும். தயிர் நன்கு செட் ஆனவுடன், அதனை உடனடியாக குளிர்சாதனப் பெட்டியில் (Fridge) வைத்துவிடுவது தயிர் மேலும் புளிக்காமல் இருக்கவும், அதன் கெட்டித்தன்மை மாறாமல் இருக்கவும் உதவும். வெயில் காலங்களில் தயிர் சீக்கிரம் உறைந்துவிடும் என்பதால் நேரத்தைக் கண்காணிப்பது அவசியமாகும்.

Food Recipes