கூடலூரில் வீட்டில் தனியாக இருந்த பெண் இரும்பு ராடால் தாக்கி கொலை…!

நீலகிரி மே 18: நீலகிரி மாவட்டம் கூடலூர் (Nilgiris District, Gudalur) அருகே உள்ள நெலாக்கோட்டை பகுதியில், வீட்டில் தனியாக இருந்த மைமூனா என்ற பெண் இரும்பு ராடால் தாக்கப்பட்டு கொடூரமாக கொலை (Woman Murder) செய்யப்பட்ட சம்பவம் பெரும் பரபரப்பை ஏற்படுத்தியுள்ளது. அவரது நகைகள் மற்றும் செல்போன் கொள்ளை செல்லப்பட்டுள்ளன. வேலை முடித்துவிட்டு வீட்டிற்கு வந்த கணவர் முகமது, மனைவியின் சடலத்தை கண்டதும் அதிர்ச்சியடைந்தார். போலீசார் சம்பவ இடத்தில் தடயங்களை சேகரித்து விசாரணை மேற்கொண்டு வருகின்றனர். கொலையாளி வீட்டிற்குள் எவ்வாறு நுழைந்தார் என்பதையும், அவர் ஏற்கனவே மைமூனாவுக்கு அறிமுகமானவரா என்பதையும் விசாரித்து வருகின்றனர். குற்றவாளியை பிடிக்க தனிப்படை அமைத்து போலீசார் தீவிரமாக தேடி வருகின்றனர்.

வீட்டில் தனியாக இருந்த பெண் இரும்பு ராடால் தாக்கி கொலை

நீலகிரி மாவட்டம் கூடலூர் அருகே உள்ள நெலாக்கோட்டை ஒன்பதாவது மயில் பகுதியில் வசித்து வந்தவர் 60 வயதான முகமது. அரபிக் கல்லூரியில் பாதுகாவலராக பணிபுரிந்து வரும் இவர், தனது மனைவி மைமூனா (வயது 55) உடன் ஒரே வீட்டில் வசித்து வந்தார். அவர்களது பிள்ளைகள் அனைவரும் வெளியூரில் வசித்து வருகிறார்கள். கணவர் பணிக்குச் சென்ற பிறகு மைமூனா வீட்டில் தனியாகவே இருந்திருக்கிறார்.

மைமூனா இரும்பு ராடால் தாக்கப்பட்டு கொலை

2025 மே 16 வெள்ளிக்கிழமை இரவு பணியை முடித்து முகமது வீட்டுக்கு சென்றபோது, வீட்டின் உள்புற கதவு பூட்டப்பட்டிருந்தது. நீண்ட நேரமாகக் கதவைத் தட்டியும் திறக்கப்படாததால், பின் கதவை உடைத்து உள்ளே சென்ற போது, மைமூனா இரும்பு ராடால் கடுமையாக தாக்கப்பட்டு ரத்த வெள்ளத்தில் உயிரிழந்த நிலையில் கிடந்ததை கண்டு அதிர்ச்சியில் உள்ளார்.

நகை, செல்போன் கொள்ளை – கொலைக்குப் பின் மர்ம நபரின் சித்ரவதை

தகவல் அறிந்த காவல்துறையினர் சம்பவ இடத்திற்கு விரைந்து வந்து ஆய்வு செய்தனர். மைமூனாவின் காதிலும் கழுத்திலும் இருந்த நகைகள் மற்றும் செல்போன் காணவில்லை. இது நகை கொள்ளைக்காக நிகழ்த்தப்பட்ட கொலை எனவும், கொலையாளி பிணியை சித்ரவதை செய்திருப்பது போன்றவையும் தெரியவந்துள்ளன.

தடயங்கள் சேகரிப்பு, கேரளாவிற்கு தகவல் – பல கோணங்களில் விசாரணை

தடயங்கள் சேகரிக்கப்பட்டு, வீட்டுக்கு அண்மையில் வந்திருந்த சந்தேக நபர்கள் குறித்து விசாரணை நடக்கிறது. சம்பவம் நடைபெறுமுன் அந்தப் பகுதியில் வெளிநாடுகளிலிருந்தவர்கள் வந்து சென்றுள்ளனர் என சந்தேகம் எழுந்துள்ளது. கேரளாவுடன் அருகாமையில் இருப்பதால் அங்கு உள்ள காவல் நிலையங்களுக்கும் தகவல் அனுப்பப்பட்டுள்ளது.

அறிமுகம் வாயிலாக வீட்டிற்குள் நுழைந்தாரா?

வீட்டின் இரு பக்க கதவுகளும் உள்ளே இருந்து பூட்டப்பட்டிருந்தது சந்தேகத்தை ஏற்படுத்தியுள்ளது. மைமூனாவின் அனுமதி இல்லாமல் யாரேனும் வீட்டிற்குள் நுழைவது எப்படி சாத்தியம்? கொலைக்காரர் அவருக்கு ஏற்கனவே அறிமுகமான நபராக இருக்க வாய்ப்புள்ளதாகவும் போலீசார் சந்தேகிக்கின்றனர்.

பெண்களுக்கு காவல்துறையின் எச்சரிக்கை

வீட்டில் தனியாக இருக்கும் பெண்கள் பாதுகாப்பாக இருக்க கதவுகளை பூட்டி வைக்க வேண்டும். புதுமுகங்களை நேரில் சந்திக்காமல், ஜன்னல் வழியாகவே பேசி அனுப்ப வேண்டும் என்றும் போலீசார் அறிவுறுத்தியுள்ளனர். குற்றவாளியை கைது செய்ய தனிப்படை அமைத்து தீவிரமாக தேடி வருகின்றனர். இந்த சம்பவம் உதகை மற்றும் கூடலூர் பகுதிகளில் பெரும் பரபரப்பை ஏற்படுத்தியுள்ளது.