7 நாட்களுக்கு தமிழகத்தில் கொட்டப்போகும் மழை.. வெப்பநிலை எப்படி இருக்கும் ?

ஜூன் 1, 2026: தமிழகத்தில் கோடை வெயிலின் தாக்கம் கடுமையாக இருந்து வரும் சூழலில், கடந்த 24 மணி நேரத்தில் அதிகபட்சமாக வேலூரில் 41.2 டிகிரி செல்சியஸ் வெப்பநிலை பதிவாகியுள்ளது. வரக்கூடிய நாட்களிலும் வெப்பநிலையில் பெரிய அளவு மாற்றம் இருக்காது என்றும், ஒரு சில இடங்களில் இயல்பை விட 2 டிகிரி செல்சியஸ் வரை அதிகமாக பதிவாகக்கூடும் என்றும் கணிக்கப்பட்டுள்ளது. அதே சமயத்தில், அதிக வெப்பநிலையும் அதிக ஈரப்பதமும் நிலவும் காரணமாக கடலோர தமிழக மற்றும் தென் தமிழகத்தின் ஓரிரு இடங்களில் அசௌகரியம் ஏற்படலாம் எனவும் எச்சரிக்கை விடுக்கப்பட்டுள்ளது.

அடுத்த 7 நாட்களுக்கு எங்கெல்லாம் கனமழை இருக்கும் ?

வெயிலின் தாக்கம் ஒரு பக்கம் இருந்தாலும், தமிழகத்தில் தொடர்ந்து பல்வேறு மாவட்டங்களில் கனமழை பதிவாகி வருகிறது. அந்த வகையில், தென்மேற்கு பருவமழை கேரள பகுதிகளில் அடுத்த 2 அல்லது 3 தினங்களில் துவங்கக்கூடும் என வானிலை ஆய்வு மையம் தெரிவித்துள்ளது. அதே சமயத்தில், பல்வேறு பகுதிகளில் காற்றழுத்த தாழ்வுப் பாதை நிலவி வருகிறது.

இதன் காரணமாக, ஜூன் 1ஆம் தேதி இன்று நீலகிரி, கோவை, திருப்பூர், திண்டுக்கல், தேனி, கரூர், நாமக்கல், ஈரோடு, சேலம், திருச்சி, தர்மபுரி, கிருஷ்ணகிரி, திருப்பத்தூர், வேலூர், ராணிப்பேட்டை, திருவண்ணாமலை, மதுரை, விருதுநகர், தென்காசி, நெல்லை மற்றும் குமரி ஆகிய மாவட்டங்களில் ஓரிரு இடங்களில் இடிமின்னல் மற்றும் பலத்த காற்றுடன் கூடிய கனமழை பெய்யக்கூடும் என தெரிவிக்கப்பட்டுள்ளது.

மேலும் படிக்க: கோடை விடுமுறை நிறைவு.. கோவை விமான கட்டணம் 3 மடங்கு உயர்வு.. அதிர்ச்சியில் உறைந்த பயணிகள்!

அதேபோல், ஜூன் 2ஆம் தேதி நீலகிரி, கோவை, திருப்பூர், திண்டுக்கல், தேனி, கரூர், நாமக்கல், ஈரோடு, சேலம், திருச்சி, தர்மபுரி, கிருஷ்ணகிரி, திருப்பத்தூர், வேலூர், ராணிப்பேட்டை, திருவண்ணாமலை, மதுரை, விருதுநகர், தென்காசி, நெல்லை, தூத்துக்குடி மற்றும் கன்னியாகுமரி மாவட்டங்களில் ஒரு சில இடங்களில் இடிமின்னல் மற்றும் பலத்த காற்றுடன் கூடிய கனமழை பெய்யக்கூடும் என தெரிவிக்கப்பட்டுள்ளது.

தென் தமிழகத்தில் தொடரும் மழை:

ஜூன் 3 மற்றும் 4ஆம் தேதிகளில் நீலகிரி, கோவை, தேனி, திருப்பூர், தென்காசி, திண்டுக்கல், நெல்லை, குமரி, ஈரோடு, நாமக்கல், சேலம், தர்மபுரி, கிருஷ்ணகிரி, திருப்பத்தூர், வேலூர், ராணிப்பேட்டை மற்றும் திருவண்ணாமலை ஆகிய மாவட்டங்களில் கனமழை பதிவாகக்கூடும்.

ஜூன் 5ஆம் தேதி நீலகிரி, கோவை, திருப்பூர், தேனி, தென்காசி, நெல்லை, குமரி, திண்டுக்கல், தூத்துக்குடி, விருதுநகர், ஈரோடு, சேலம், நாமக்கல், திருச்சி, அரியலூர், பெரம்பலூர், கள்ளக்குறிச்சி, கரூர், சிவகங்கை மற்றும் மயிலாடுதுறை ஆகிய மாவட்டங்களில் இடிமின்னல் மற்றும் பலத்த காற்றுடன் கூடிய கனமழை பதிவாகக்கூடும்.

அதனைத் தொடர்ந்து, ஜூன் 6ஆம் தேதி நீலகிரி, கோவை, திருப்பூர், திண்டுக்கல், தேனி, தென்காசி, நெல்லை, குமரி, தூத்துக்குடி, ராமநாதபுரம், புதுக்கோட்டை, தஞ்சாவூர், நாகப்பட்டினம் மற்றும் மயிலாடுதுறை ஆகிய மாவட்டங்களில் இடிமின்னல் மற்றும் பலத்த காற்றுடன் கூடிய கனமழை பெய்யக்கூடும் என குறிப்பிடப்பட்டுள்ளது.

ஜூன் 7ஆம் தேதியைப் பொருத்தவரையில், ஈரோடு, சேலம், நாமக்கல், விருதுநகர், நீலகிரி, கோவை, திருப்பூர், திண்டுக்கல், தேனி, தென்காசி, நெல்லை மற்றும் குமரி ஆகிய மாவட்டங்களில் இடிமின்னலுடன் கூடிய கனமழை பதிவாகக்கூடும் என தெரிவிக்கப்பட்டுள்ளது.

சென்னையில் வானிலை எப்படி இருக்கும் ?

சென்னை மற்றும் புறநகர் பகுதிகளைப் பொருத்தவரையில், வானம் ஓரளவு மேகமூட்டத்துடன் காணப்படலாம். அதிகபட்ச வெப்பநிலை 40 டிகிரி செல்சியஸ் ஆகவும், குறைந்தபட்ச வெப்பநிலை 29 டிகிரி செல்சியஸை ஒட்டியும் இருக்கக்கூடும். இதனால் வெப்பம் சார்ந்த அசௌகரியம் ஏற்படலாம் என சென்னை வானிலை ஆய்வு மையம் தெரிவித்துள்ளது.