சூர்யா 46 படத்தில் கேமியோ ரோலில் நடிக்கும் பிரபல தெலுங்கு நடிகர் – இணையத்தில் கசிந்த தகவல்

சூர்யா

நடிகர் சூர்யாவின் (Actor Suriya) நடிப்பில் சமீபத்தில் அவரது 44-வது படமான ரெட்ரோ திரையரங்குகளில் வெளியாகி ரசிகர்களிடையே நல்ல வரவேற்பைப் பெற்றது. இயக்குநர் கார்த்திக் சுப்பராஜ் (Director Karthik Subbaraj) இயக்கத்தில் உருவான இந்தப் படம் மே மாதம் 1-ம் தேதி 2025-ம் ஆண்டு திரையரங்குகளில் வெளியானது. இந்தப் படத்தில் சூர்யாவிற்கு நாயகியாக நடிகை பூஜா ஹெக்டே நடித்திருந்த நிலையில் அவர்களுடன் இணைந்து நடிகர்கள் நாசர், ஜோஜூ ஜார்ஜ், பிரகாஷ் ராஜ், கருணாஸ், சுவாசிகா, ஜெயராம் என பலர் இந்தப் படத்தில் நடித்திருந்தனர். கங்குவா படத்தின் தோல்விக்கு பிறகு ரெட்ரோ படத்தின் மீது சூர்யா ரசிகர்கள் பெரும் எதிர்பார்ப்பை வைத்திருந்தனர். படம் சூர்யா ரசிகர்களிடையே வெற்றிப்படமாக அமைந்தாலும் சாதாரண பார்வையாளர்கள் இடையே ரெட்ரோ படம் கலவையான விமர்சனத்தையே பெற்றது.

இந்தப் படத்தில் நடித்துக் கொண்டிருக்கும் போதே நடிகர் சூர்யா இயக்குநரும் நடிகருமான ஆர்.ஜே.பாலாஜி உடன் தனது 45-வது படத்திற்காக கூட்டணி வைத்தார். ரெட்ரோவின் பணிகள் நடைபெறும் போதே நடிகர் சூர்யா தனது 45-வது படத்தின் படப்பிடிப்பு பணிகளிலும் கலந்துகொண்டார்.

இந்த நிலையில் தற்போது 45-வது படத்தில் நடித்துக் கொண்டிருக்கும் போதே நடிகர் சூர்யா அவரது 46-வது படத்தின் கூட்டணி குறித்து அறிவித்தார். அதன்படி அவர் தெலுங்கில் பிரபல இயக்குநராக வலம் வரும் வெங்கி அட்லூரி உடன் இணைய உள்ளதை ரெட்ரோ படத்தின் புரமோஷன் விழாவில் தெரிவித்தார்.

இயக்குநர் வெங்கி அட்லூரி தமிழில் நடிகர் தனுஷை வைத்து வாத்தி என்ற படத்தை இயக்கியுள்ளார். மேலும் கடந்த தீபாவளி பண்டிகையை முன்னிட்டு வெங்கி அட்லூரி இயக்கத்தில் நடிகர் துல்கர் சல்மான் நடிப்பில் திரையரங்குகளில் வெளியாகி மாபெரும் வரவேற்பைப் பெற்றது லக்கி பாஸ்கர் படம்.

இந்தப் படம் தென்னிந்திய மொழிகளில் மட்டும் இன்றி பான் இந்திய அளவில், உலக அளவில் உள்ள ரசிகர்களிடையே பெரும் வரவேற்பைப் பெற்றது. முன்னதாக தீபாவளி பண்டிகையை முன்னிட்டு சிவகார்த்திகேயனின் அமரன் படம் திரையரங்குகளில் வெளியானதால் தமிழிகத்தில் லக்கி பாஸ்கர் படத்திற்கு குறைந்த அளவிலான திரையரங்குகளே ஒதுக்கப்பட்டிருந்தது.

ஆனால் படத்திற்கு ரசிகர்களிடையே இருக்கும் வரவேற்பைப் பார்த்த திரையரங்க உரிமையாளர்கள் லக்கி பாஸ்கர் படத்திற்கு திரைகளை அதிகப்படுத்தினர். இந்தப் படம் விமர்சன ரீதியாக வரவேற்பைப் பெற்றது போல வசூல் ரீதியாகவும் மாஸ் காட்டியது. இந்தப் படத்தை தொடர்ந்து இயக்குநர் வெங்கி அட்லூரி தற்போது சூர்யாவின் 46-வது படத்தை இயக்க உள்ளார்.

இந்த நிலையில் இந்தப் படம் குறித்த அப்டேட் ஒன்று இணையத்தில் வெளியாகி வைரலாகி வருகின்றது. அதன்படி இந்தப் படத்தில் நடிகர் சூர்யா உடன் இணைந்து பிரபல தெலுங்கு நடிகர் விஜய் தேவரகொண்டா கேமியோ ரோலில் நடிக்க உள்ளதாக தகவல்கள் தெரிவிக்கின்றது. ஆனால் இதுகுறித்த அதிகாரப்பூர்வ அறிவிப்பு எதுவும் இதுவரை வெளியாகவில்லை.