புதுசா வீடு கட்டுறீங்களா? மணல் விலையை உயர்த்தி அறிவித்த தமிழக அரசு…

சென்னை ஏப்ரல் 22: கனிம வரி (Mineral tax) உயர்வை எதிர்த்து போராடிய கல் குவாரி உரிமையாளர்கள் (Quarry owners), அரசுடன் நடந்த பேச்சுவார்த்தையையடுத்து வேலைநிறுத்தத்தை வாபஸ் பெற்றனர். அரசு அனுமதியுடன் 2025 ஏப்ரல் 22 இன்று முதல் ஜல்லி, எம்.சாண்ட், பி.சாண்ட் ஆகியவற்றின் விலை உயர்த்தப்படுகிறது. ஜல்லி ஒரு யூனிட் (Gravel per unit) ரூ.4,000-ல் இருந்து ரூ.5,000, எம்.சாண்ட் ரூ.6,000, பி.சாண்ட் ரூ.7,000 ஆக உயர்வு பெற்றுள்ளன. இது கட்டுமானச் செலவை அதிகரிக்கச் செய்யும் நிலையில், பொதுமக்களிடம் அதிர்ச்சி ஏற்படுத்தியுள்ளது. கல் வளங்களை பாதுகாத்து தொழில் வளர வேண்டும் என்றே நாங்கள் போராடினோம் என சங்கத்தினர் தெரிவித்தனர். அரசு, பல கோரிக்கைகளை பரிசீலித்து நடவடிக்கைகள் எடுக்கப்படும் என உறுதியளித்துள்ளது.

கல் குவாரி மற்றும் கிரஷர் உரிமையாளர்கள் சங்க போராட்டம்

கல் குவாரி மற்றும் கிரஷர் உரிமையாளர்கள் சங்கம் கடந்த சில தினங்களாக வேலைநிறுத்த போராட்டத்தில் ஈடுபட்டு வந்தது. இவர்களின் 24 அம்ச கோரிக்கைகள், குறிப்பாக கனிம வரி உயர்வு தொடர்பான எதிர்ப்பை அரசு கவனத்தில் எடுத்ததால், 2025 ஏப்ரல் 21 நேற்று தலைமைச் செயலகத்தில் நீர்வளத்துறை அமைச்சர் துரைமுருகனுடன் நடந்த பேச்சுவார்த்தையில், போராட்டம் வாபஸ் பெறப்பட்டது.

விலை உயர்வுக்கு அரசு ஒப்புதல்

பேச்சுவார்த்தையில், கனிம வரி குறித்த விளக்கங்களை அரசு தரப்பில் அதிகாரிகள் வழங்கினர். உடனடியாக வரியை குறைப்பது சாத்தியமில்லை என தெரிவித்தாலும், வரி உயர்வால் ஏற்படும் செலவுகளை ஈடுகட்ட, கட்டுமானப் பொருட்களின் விலையை உயர்த்த அரசு அனுமதி அளித்துள்ளது.

இதன் தொடர்ச்சியாக, ஜல்லி மற்றும் எம்.சாண்ட் உள்ளிட்ட கட்டுமானப் பொருட்களின் விலை 2025 ஏப்ரல் 22 இன்று முதல் உயர்த்தப்படுவதாக அறிவிக்கப்பட்டுள்ளது.

ஒரு யூனிட் விலை ரூ.1000 வரை உயர்வு

கல் குவாரி உரிமையாளர்கள் சங்கத் தலைவர் சின்னசாமி தெரிவித்ததாவது: “ஜல்லி, எம்.சாண்ட், பி.சாண்ட் ஆகியவையின் விலைகள் இன்று முதல் உயர்த்தப்படும். எடுத்துக்காட்டாக, ஜல்லி ஒரு யூனிட் ரூ.4,000-ல் இருந்து ரூ.5,000 ஆக, எம்.சாண்ட் ரூ.6,000-ல் இருந்து ரூ.7,000 ஆகவும், பி.சாண்ட் ரூ.7,000 ஆகவும் உயர்வு பெறும்.” என கூறினார்.

விலை உயர்ந்தாலும், அது அரசுக்கு செலுத்தும் வரியைவிட குறைவானதாகவே இருப்பதாகவும், பொதுமக்கள் இது தொடர்பாக புரிந்துணர்வுடன் இருக்க வேண்டும் என்றும் அவர் வேண்டுகோள் விடுத்தார்.

அரசு அறிக்கையின் முக்கிய அம்சங்கள்

தமிழ்நாடு அரசு வெளியிட்டுள்ள அறிக்கையில், குவாரி உரிமங்களுக்கான கால நீட்டிப்பு, குவாரி இணைப்புகள் (Amalgamation), நிலத்தடி நீர்மட்டம் வரை சுரங்கம் செய்வது, வருடாந்த உச்ச உற்பத்தி அளவுகள், இரண்டாவது தடையில்லா சான்று தேவையில்லை போன்ற முக்கிய கோரிக்கைகள் தொடர்பாக முடிவுகள் எடுக்கப்பட்டுள்ளதாக தெரிவிக்கப்பட்டுள்ளது.

பொதுமக்கள் அதிர்ச்சி

இந்த விலை உயர்வு, ஏற்கனவே அதிகரித்து வரும் கட்டுமானச் செலவுகளை மேலும் உயரும் நிலையில் கொண்டுவந்துள்ளது. பொதுமக்கள் மத்தியில் இதனால் பெரும் அதிர்ச்சி ஏற்பட்டுள்ளதாகவும், சொந்த வீடு கட்டும் கனவு, எப்போது நிறைவேறும் என்ற கேள்வி எழுந்துள்ளதாகவும் கூறப்படுகிறது.